بىزدەگى ءمۇيىزدى ءىرى قارانىڭ ىرگەلى ماسەلەسىنىڭ ءبىرى – تۇقىمىنىڭ كۇن ساناپ تەكتىلىگىن جوعالتىپ بارا جاتقاندىعى. بۇل كۇندە سەلەكتسيالىق جۇمىستاردىڭ ۇزاق جىلدار بويى جۇرگىزىلمەي, ءتىپتى ۇمىت قالۋى ءوز «جەمىسىن» بەرە باستاعان. سونىڭ ناتيجەسىندە ويسىل قارا تۇقىمىنىڭ سىنى كەتىپ, تەكتىلىك سيپاتىنان ايىرىلۋدىڭ از-اق الدىندا تۇر: جانۋاردىڭ دەنە تۇرقى كىشىرەيگەن, ەتى قاشىپ, ءسۇتى دە سۇيىلعان ءھام ازايعان. ياعني, مالدىڭ سانىن كوبەيتىپ قانا قويماي, ونىڭ ساپاسىنا باسا ءمان بەرۋ بۇگىنگى تاڭدا كۇن تارتىبىندە تۇرعان كوكەيكەستى ماسەلەنىڭ ءبىرى.
مىنە, وسى ماسەلەنىڭ الدىن الۋ ماقساتىندا ءبىزدىڭ ەلىمىزدە ءىرى قارانىڭ ەتىن ەكسپورتتاۋدى دامىتۋ بويىنشا شارالاردىڭ 2011-2015 جىلدارعا ارنالعان كەشەندى جوسپار ازىرلەنگەن بولاتىن. بۇل جوسپار بويىنشا قولعا الىنعان باستى جۇمىستىڭ ءبىرى – شارۋاشىلىقتار مەن قوعامدىق تابىندارعا ەتتى ءمۇيىزدى ءىرى قارانىڭ تۇقىمىن جاقسارتۋ باعىتىندا جوعارى ءونىمدى اسىل تۇقىمدى بۇقالاردى قوسۋ. قازىرگى تاڭدا مال وسىرۋمەن اينالىساتىن شارۋا قاۋىمى اسىل تۇقىمدى بۇقا ساتىپ الۋ ءۇشىن «قازاگرو» حولدينگىنىڭ قۇرامىنا ەنەتىن «KazMeat» جشس ارقىلى نەسيە الۋعا قول جەتكىزدى. اتالعان باعدارلاما بويىنشا اعىمداعى جىلدىڭ شىلدە ايىنان باستاپ ەلىمىز بويىنشا اۋىلشارۋاشىلىق تاۋارىن ءوندىرۋشى 56 شارۋاشىلىق قارجىلاندىرىلىپ, قوعامدىق تابىندارعا ارنالعان 783 بۇقا ساتىپ الىنعان. مۇنىڭ ىشىندە, قاراعاندى وبلىسىنىڭ ءۇش شارۋاشىلىعى 89 اسىل تۇقىمدى بۇقاعا يەلىك ەتتى. بۇل – وڭىرلەر اراسىندا اقمولا جانە باتىس قازاقستان وبلىستارىنان كەيىنگى ءۇشىنشى كورسەتكىش. سونىمەن قاتار, ەلىمىزدىڭ ون شارۋاشىلىعىنا تابىنعا ارنالعان اسىل تۇقىمدى بۇقا ساتىپ الۋعا نەسيەلەر ءبولىندى. بۇل قارجىعا 36 بۇقا ساتىپ الىنعان, ونىڭ تورتەۋىنە قاراعاندى وبلىسىنىڭ شارۋا قوجالىقتارىنا بۇيىردى. اسىل تۇقىمدى بۇقالاردىڭ ورتاشا باعاسى 351,8 مىڭ تەڭگەنى قۇرايدى. سونداي-اق, بيىلعى جىلى «قازاگرو» حولدينگىنىڭ قۇرامىنا ەنەتىن «قازاگروونىم» اكتسيونەرلىك قوعامى ءمۇيىزدى ءىرى قارا ەتىنىڭ ەكسپورتتىق الەۋەتىن دامىتۋ جونىندەگى جوبانى ىسكە اسىرۋ ماقساتىندا 3000 باس مالعا ارنالعان بورداقىلاۋ الاڭىنىڭ قۇرىلىسىن باستاپ كەتتى. بۇل يگى باستاماعا قاتىسۋ ءۇشىن ارنايى ىرىكتەۋدەن وتكەن, ءتيىستى تالاپتارعا ساي كەلەتىن 10 شارۋاشىلىق ىرىكتەلىپ الىنعان بولاتىن. ولاردىڭ قاتارىندا قاراعاندىلىق مال شارۋاشىلىعى كاسىپورنى «سارىارقا» ءاوش» جشس دە بار. جالپى, بۇل زاماناۋي ستاندارتتار مەن تالاپتارعا ساي كەلەتىن بورداقىلاۋ الاڭدارى سيىر ەتى ءونىمىنىڭ ءوندىرىسى سالاسىن ورگە سۇيرەيتىن شارۋا بولماق. مامانداردىڭ بۇعان سەنىمى مول. نەگە دەسەڭىز, قازاقتىڭ اقباس سيىرىنىڭ سالماعى 500-550 كيلوگرامعا دەيىن جەتەدى. ال بۇقالارى بولسا, 850 كيلوعا دەيىن سالماق تارتاتىن كورىنەدى. ونىڭ ۇستىنە, بۇل تۇقىمنىڭ ەتى جوعارى ساپالى جۇعىمدىلىعىمەن دە تانىمال. بيىلعى جىلدىڭ 12 تامىزىندا قوستاناي وبلىسىنداعى ۆوستوك سەلوسىندا «قاراسۋ» شارۋاشىلىعىنىڭ بازاسىندا قازاقتىڭ اقباس جانە اۋليەكول تۇقىمدارىن ساتۋ بويىنشا «KarasuFarm-2015» دەپ اتالاتىن رەسپۋبليكالىق اۋكتسيون وتپەكشى. ساتىلىمعا 60 باس مال شىعارىلادى: ونىڭ 20-سى اۋليەكول تۇقىمىنىڭ بۇزاۋى بولسا, 10-ى قازاقتىڭ اقباس سيىرىنىڭ بيىلعى ءتولى. قالعان وتىز باس قازاقتىڭ اقباس سيىرىنىڭ تايىنشا بۇقالارى. بۇل شاراعا قازاقستاننىڭ بارلىق وڭىرىنەن مال وسىرۋشىلەر شاقىرىلعان. اۋكتسيوندى ۇيىمداستىرۋشىلار ساتىلىمعا شىعارىلاتىن اسىل تۇقىمدى تايىنشا بۇقالاردىڭ ەتىنىڭ ساپالىلىعىمەن جانە جوعارى ونىمدىلىگىمەن ەرەكشەلەنەتىنىن ءبىراۋىزدان ايتىپ وتىر. مىسالى, تۋعانىنا 15 اي بولعان ءاربىر بۇقاشىقتىڭ سالماعى 450-480 كيلوگرامعا دەيىن جەتەتىن كورىنەدى. ياعني, ورتاشا العاندا ولار تاۋلىگىنە 900-1000 گرامنان سالماق قوسىپ وتىرادى ەكەن. مال تۇقىمىن اسىلداندىرۋدىڭ ماڭىزىن ۇعىپ, ونىڭ تابىستىڭ قاينار كوزى ەكەندىگىنە كوز جەتكىزگەن شارۋاشىلىق يەلەرىنىڭ بۇگىنگى كۇندەگى جاڭالىق اتاۋلىعا دەگەن قۇلشىنىسى مەن ۇمتىلىسى كوڭىلگە سەنىم ۇيالاتادى. ال مالىنىڭ تۇقىمى اسىلدانعان شارۋانىڭ ءتۇبى تابىسقا كەنەلەرى نارىقتىڭ سۇرانىسى سۇمدىق زامانىندا كۇمان تۋدىرمايدى.
قايرات ءابىلدينوۆ, «ەگەمەن قازاقستان».
قاراعاندى.