اقمولانىڭ استانالىق ءوڭىرى تسەلينوگراد اۋدانىنىڭ تاستاق ستانساسى قاسىنداعى وسى ءبىر كەنىش كوپتەن بەرى قولعا الىنعانىمەن, تولىققاندى يگەرىلمەي كەلىپ ەدى. حالىقارالىق«Heidelberg Cement» توبىنا كىرەتىن «بەكتاس grup» جشس ونى تولىقتاي ءوز يەلىگىنە وتكىزبەي تۇرىپ, گەولوگيالىق جان-جاقتى زەرتتەۋ جۇرگىزىپ, بۇل جەردەگى تاستىڭ كولەمى 25 جىلعا دەيىن جۇمىس ورنى بولاتىنىنا كوز جەتكىزگەن. ونىڭ ۇستىنە تابيعي تاستىڭ قاتتىلىعى, عالىمداردىڭ پىكىرىنشە, بارلىق ىسكە جارامدى بوپ شىقتى. – ءبىزدىڭ كومپانيا قازاقستان اۋماعىندا 2005 جىلدان بەرى جۇمىس ىستەپ جاتىر, – دەدى سەرىكتەستىك ديرەكتورى سەرگەي پچەلينتسەۆ. – بىزبەن ۇزەڭگىلەس ءبىر ماقساتتا جۇمىس ىستەپ جاتقان سەرىكتەس كاسىپورىندار دا وسى قازاق ەلىندە جەتەرلىك. «بۇقتىرما تسەمەنت», «كاسپي تسەمەنت», «بايكازبەتون» كومپانيالارى سولاردىڭ الدىڭعى قاتارلارىندا تۇر دەر ەدىم. وسى نەمىس كومپانياسى كەلگەنگە دەيىن بۇل جەردە قۋاتى ماردىمسىز «بەكتاس grup» سەرىكتەستىگى جۇمىس ىستەپ كەلگەن. وندىرىستىك ونىمدىلىگى شامالى بولعاننان كەيىن ولار نارىق سىناعىنا تويتارىس بەرە الماعان. نەمىستىڭ «Heidelberg Cement» كومپانياسى الەمنىڭ 40 ەلىندە جۇمىس ىستەپ جاتىر. قيىرشىق تاس ءوندىرىسى بويىنشا ولار دۇنيەجۇزىندە ءبىرىنشى ورىندى, ال بەتون مەن تسەمەنت بويىنشا 3-ءشى ورىندى يەلەنىپ وتىر. ءبىر سوزبەن ايتقاندا, ادىمى الشاڭ, بەلى جۋان ىرگەلى كاسىپورىن. ولار وسى جەردە ىسكە كىرىسكەننەن بەرى جاڭا ءوندىرىستىڭ قۋاتى ارتتى. قازاقستان زاڭناماسى اياسىندا ولار جەرگىلىكتى ەلدى مەكەندەردىڭ الەۋمەتتىك باعدارلامالارىنا دا اتسالىسۋدى ءجون ساناپتى. ەكولوگيا ماسەلەسى دە ارقاشاندا ولاردىڭ ويىندا جۇرەدى. سول سەبەپتى, بۇل جەردەگى بۇرىنعى ءالسىز ەسكى قۇرال-جابدىقتار تولىقتاي جويىلىپ, ونىڭ ورنىنا قۋاتتى شەتەلدىك جابدىقتار اكەلىندى. الەمدىك ستاندارتتار شارتتارىنا سايكەس كەلەتىن تەحنيكانىڭ جۇمىسى كورگەن كوزدى تويىندىرادى. 3 ءىرى تاس وڭدەۋشى ماشينا, 15 جابىق كونۆەيەرلى تاسىمال جەلىسى, 100 توننالىق ەلەكتروندى سالماق ولشەگىش قۇرىلعى سولاردىڭ بىرەگەيى دەسە دە بولادى. – قازىرگى كەزدە ءبىزدىڭ زاۋىتتا 34 مامان جۇمىس ىستەپ جاتىر, – دەپ اڭگىمەسىن ساباقتادى سەرگەي پچەلينتسەۆ. – ال ولارعا اسپازداردى, جۇرگىزۋشىلەردى, جۇمىسكەرلەر مەن تاۋ قوپارعىش مامانداردى قوسساڭىز كىسى سانى 100-دەن اسىپ كەتەدى. ايلىق ەڭبەكاقىلارى دا تۇرعىنداردىڭ كوڭىلىنەن شىعۋدا. 100-120 مىڭ تەڭگە ارالىعىندا. بۇعان مەديتسينالىق ساقتاندىرۋدى, كيىم-كەشەك, اقىسىز تاماقتى قوسساڭىز – جاعدايدىڭ جامان ەمەس ەكەندىگىن ءوزىڭىز دە تۇسىنەسىز. جاڭا زاۋىتتىڭ جۇمىسى ۆاحتالىق تاسىلگە ەسەپتەلگەن. قيىرشىق تاستىڭ ءتۇرى 10-نان اسادى. كىشى فراكتسياسى 0,5 مم. بولسا, ۇلكەندەرى 40 پەن 70-ءتىڭ اراسىندا. استانا قالاسىنىڭ قۇلاشىن كەڭگە سالىپ جاتقان بارلىق قۇرىلىسىنا, اسفالتى مەن تەمىرجولىنا تاپتىرماس ماتەريال وسى جەردە ازىرلەنەدى. زاۋىتتىڭ ۋچاسكە باستىعى يگور گريشين «قازاقستان پرەزيدەنتى ن.ءا. نازارباەۆتىڭ «نۇرلى جول» باعدارلاماسى بىزگە بيزنەس سالاسىن وركەندەتۋگە كەڭ جول اشىپ وتىر», دەدى. سەبەبى, ءبىزدىڭ مەملەكەتىمىز شىعىس پەن باتىستى قوساتىن, ءبىر سوزبەن ايتقاندا, توعىز جولدىڭ تورابىندا تۇرعان ەل. – كولىك لوگيستيكاسىن دامىتۋ ءۇشىن الدىمەن جاقسى اۆتوكولىك جولدارى كەرەك. ءبىزدىڭ جۇمىسىمىز سوعان نەگىزدەلىپ وتىر. يگور يۋرەۆيچتىڭ پايىمداۋىنشا, ساپاسى جوعارى قيىرشىق تاستى سۇراۋشى ءىرى قۇرىلىس كومپانيالارى استانادا جەتكىلىكتى. سولاردىڭ ءبىرى «بىرىكتىرىلگەن قۇرىلىس كورپوراتسياسى», «قۇرىلىس كونسترۋكتسياسى» اكتسيونەرلىك قوعامى مەن بىرنەشە تەمىرجول سالۋشى ءىرى ۇيىمدار ەكەن. زاۋىت ىسكە قوسىلعاننان بەرى تاستاق ستانساسىنداعى تۇرعىندارعا دا ەداۋىر كومەك كورسەتىلىپتى. بىرىنشىدەن, اۋىز سۋ تاسىمالدايتىن جۇمىس وسى كاسىپورىننىڭ ەنشىسىنە تيگەن. ەكىنشىدەن, وسى كاسىپورىن بيىلعى كوكتەمگى سۋ تاسقىنىنان بۇزىلعان اۋدانارالىق جولداردى جوندەۋ ءۇشىن 3 مىڭ توننا تابيعي تاس تاسىمالداپتى. ال, ەڭ باستىسى, ولار تسەلينوگراد اۋدانىنىڭ بيۋدجەتىن كوبەيتۋگە قوماقتى ۇلەس قوسىپ وتىر. اڭگىمە بارىسىندا حالىقارالىق «Heidelberg Cement» كومپانياسىنىڭ باس مەنەدجەرى رومان كەمپە بۇل كاسىپورىننىڭ الداعى ۋاقىتتا اقمولا وبلىسىنىڭ ەنشىسىندەگى كوپتەگەن ەلدى مەكەندەردىڭ الەۋمەتتىك-ەكونوميكالىق دامۋىنا ايتارلىقتاي كومەك كورسەتەتىنىنە سەنىمدى ەكەندىگىن جەتكىزدى. بۇل ءسوزدى تاستى اۋىلدىق ايماعىنىڭ اكىمى بەيسەنباي اپپاسوۆ تا راستاپ وتىر. سەبەبى, قىس كەزىندە جولداردى تازالاۋعا, اۋىزسۋ جەتكىزۋگە زاۋىت تەحنيكامەن, سونداي-اق كىسىلەرمەن ايتارلىقتاي كومەك كورسەتىپتى. ءبىر سوزبەن ايتقاندا, ەكى جاققا ءتيىمدى ءىستىڭ قۇلاش جايعانىنا جەرگىلىكتى تۇرعىندار دا ريزا. مامان مەحانيزاتورلار مەن جۇرگىزۋشىلەر وسى جەردەن وزدەرىنىڭ تۇراقتى جۇمىستارىن تاپقان. بۇل «نۇرلى جولدىڭ» ەلگە بەرىپ وتىرعان ۇلكەن ءبىر بەرەكەسى دەۋگە بولارلىقتاي ءىس.
جانات تۇگەلباەۆ.
اقمولا وبلىسى, تسەلينوگراد اۋدانى.