8 ناۋرىز – حالىقارالىق ايەلدەر كۇنى قارساڭىندا شىعىس قازاقستان وبلسىندا كوپبالالى انالارعا 15 مىڭ تەڭگە كولەمىندە بىرجولعى الەۋمەتتىك تولەم بەرىلەدى. بۇل قولداۋ شاراسى جىل سايىنعى داستۇرگە اينالىپ, وبلىستىق بيۋدجەت ەسەبىنەن جۇزەگە اسادى, دەپ حابارلايدى Egemen.kz.
وڭىردە كوپبالالى وتباسىلاردى قولداۋ باعىتىنداعى جۇمىستار جۇيەلى تۇردە جۇرگىزىلىپ كەلەدى. سونىڭ ءبىرى – مەرەكە قارساڭىندا كورسەتىلەتىن الەۋمەتتىك كومەك. تولەم ماراپاتتالعان انالارعا, سونداي-اق ءتورت جانە ودان دا كوپ كامەلەتكە تولماعان بالاسى بار انالارعا بەرىلەدى.
8 ناۋرىز قارساڭىندا كوپبالالى انالارعا بەرىلەتىن جاردەماقى مولشەرى قانداي؟
وبلىس اكىمدىگىنىڭ مالىمەتىنشە, 2026 جىلدىڭ 1 ناۋرىزىنداعى جاعداي بويىنشا وڭىردە 13 492 كوپبالالى انا تۇرادى. ولاردىڭ ىشىندە 4 234 انا «كۇمىس القا» القاسىمەن ماراپاتتالعان, سونداي-اق «باتىر انا» اتاعىن العان نەمەسە I جانە II دارەجەلى «انا داڭقى» وردەندەرىنىڭ يەگەرلەرى بار. ال 9 258 انا ءتورت جانە ودان دا كوپ بىرگە تۇراتىن كامەلەتكە تولماعان بالانى تاربيەلەپ وتىر.
بۇل ساناتقا كامەلەت جاسىنا تولعانىمەن, كوللەدجدەردە نەمەسە جوعارى وقۋ ورىندارىندا كۇندىزگى بولىمدە ءبىلىم الىپ جۇرگەن بالالار دا وقۋىن اياقتاعانعا دەيىن ەسەپكە الىنادى.
وڭىردە كوپبالالى انالاردى الەۋمەتتىك تۇرعىدا قولداۋ ماسەلەسىنە ەرەكشە نازار اۋدارىلىپ, ولاردىڭ ءال-اۋقاتىن ارتتىرۋعا باعىتتالعان شارالار الداعى ۋاقىتتا دا جالعاسادى.
8 ناۋرىز مەرەكەسىنە وراي پويىزدارعا قوسىمشا ۆاگوندار قوسىلدى