ەلىمىزدىڭ تاريحىندا تۇڭعىش رەت 26-29 ناۋرىز ارالىعىندا سەمسەرلەسۋدەن الەم كۋبوگىنىڭ كەزەڭى استانادا وتەدى. بەدەلدى حالىقارالىق تۋرنير QAZAQSTAN جەڭىل اتلەتيكا سپورت كەشەنىندە ۇيىمداستىرىلادى, دەپ جازادى Egemen.kz.
جارىسقا الەمنىڭ 96 ەلىنەن 600-دەن استام سپورتشى قاتىسادى دەپ جوسپارلانىپ وتىر. الەم كۋبوگىنىڭ كەزەڭى ەرلەر مەن ايەلدەر اراسىندا جەكەلەي جانە كوماندالىق سىندار بويىنشا ۇيىمداستىرىلادى.
الەم كۋبوگى كەزەڭىندە ەل نامىسىن ەرلەر قۇراماسى ساپىندا شپاگادان رۋسلان قۇربانوۆ, ەلمير ءالىمجانوۆ, ەرلىك سەرتاي, كيريلل پروحودوۆ جانە ۆاديم شارلايموۆ قورعايدى.
قازاقستاننىڭ ۇلتتىق سەمسەرلەسۋ فەدەراتسياسىنىڭ مالىمدەۋىنشە, مۇنداي دەڭگەيدەگى جارىستاردى مارراكەش پەن بۋەنوس-ايرەس قالالارى وتكىزگەن. ال ءباا, گەرمانيا, شۆەيتساريا جانە كانادا الەم كۋبوگى كەزەڭدەرىن تۇراقتى تۇردە قابىلداپ كەلەدى. بيىل قازاقستان العاش رەت قابىلداۋشى ەلدەردىڭ ەليتالىق تىزىمىنە قوسىلدى.
تاريحي جەتىستىك: قازاقستان سەمسەرلەسۋدەن الەم چەمپيوناتىندا قولا جۇلدە جەڭىپ الدى
«مەن سەمسەرلەسۋمەن العاش اينالىسا باستاعان كەزدە الەم كۋبوگىنىڭ ءبىر كەزەڭى قازاقستاندا وتەدى دەگەندى ەلەستەتە دە الماعان ەدىم. ءبىز ءۇشىن مۇنداي تۋرنيرلەر ءاردايىم الىس ەلدەردە – يتاليا, فرانتسيا, ۆەنگريا سەكىلدى سەمسەرلەسۋ ءداستۇرى قالىپتاسقان مەملەكەتتەردە وتەتىن, الەمنىڭ ۇزدىك سپورتشىلارى سوندا جينالاتىن. بۇگىن ءبىز الەم كۋبوگىنىڭ ماڭىزدى كەزەڭدەرىنىڭ ءبىرىن ءوز ەلىمىزدە قابىلداپ وتىرمىز. بۇل – ەل ءۇشىن دە, قازاق سەمسەرلەسۋى ءۇشىن دە زور ماقتانىش. مۇنداي ءىرى جارىستار جايدان-جاي سەنىپ تاپسىرىلمايدى. مۇنداي شەشىم ءبىزدىڭ دەڭگەيىمىزدىڭ مويىندالعانىن بىلدىرەدى. سوندىقتان ءبىز, سپورتشىلار ءۇشىن, تەك شەتەلدە عانا ەمەس, ءوز جەرىمىزدە دە سول دەڭگەيگە ساي ونەر كورسەتۋ – ۇلكەن جاۋاپكەرشىلىك», دەدى سەمسەرلەسۋدەن ۇلتتىق قۇرامانىڭ سپورتشىسى رۋسلان قۇربانوۆ.