بۇگىن «ەگەمەن قازاقستان» گازەتىندە پرەمەر-مينيستر ولجاس بەكتەنوۆتىڭ «جاسامپازدىققا جەتەلەگەن جەتى جىل» اتتى كولەمدى ماقالاسى جارىق كوردى. ماقالادا قاسىم-جومارت توقاەۆتىڭ تۇتاس ۇلت تاعدىرىن موينىنا العان جەتى جىلدا ەلىمىزدىڭ الەۋمەتتىك-ەكونوميكالىق جانە ساياسي دامۋ مودەلىندە اۋقىمدى ءارى جۇيەلى وزگەرىستەر بولعانى قامتىلعان. ۇكىمەت باسشىسى وسكەلەڭ ۇرپاقتىڭ جاعدايىنا دا ەرەكشە كوڭىل ءبولىنىپ جاتقانىن اتاپ ءوتتى, دەپ جازادى Egemen.kz.
«ۇلتتىق قور – بالالارعا» باعدارلاماسى – پرەزيدەنتتىڭ ماڭىزدى باستامالارىنىڭ ءبىرى», دەدى ۇكىمەت باسشىسى.
ەسكە سالا كەتەيىك, اتالعان باعدارلاما شەڭبەرىندە بالالاردىڭ شوتىنا ۇلتتىق قوردىڭ ينۆەستيتسيالىق كىرىسىنەن جىل سايىن قاراجات اۋدارىلادى, ونى ءار بالا 18 جاسقا تولعاننان كەيىن ءبىلىم الۋعا نەمەسە تۇرعىن ءۇي جاعدايلارىن جاقسارتۋ ماقساتىندا پايدالانا الادى.
«باعدارلاما جۇزەگە اسىرىلعان ءۇش جىل ىشىندە ەلىمىزدەگى جەتى ملن بالانىڭ شوتىنا 2,5 ملرد دوللاردان استام قاراجات اۋدارىلدى», دەدى پرەمەر-مينيستر.
ۇلتتىق قور بالالارعا 888 ملن دوللار اۋداردى
سونىمەن قاتار ولجاس بەكتەنوۆ مەملەكەت باسشىسىنىڭ تاپسىرماسى بويىنشا 2026-2030 جىلدارعا ارنالعان «قازاقستان بالالارى» بىرىڭعاي باعدارلاماسى بەكىتىلگەنىن, ول قازاقستانداعى بالالاردىڭ قۇقىقتارى مەن ءال-اۋقاتىن قامتاماسىز ەتۋ بويىنشا بارلىق قولدانىستاعى جانە جوسپارلانعان ءىس-شارالاردىڭ باسىن بىرىكتىرەتىنىنە توقتالدى.
«اتالعان قۇجات ەلدەگى ءاربىر بالانىڭ قۇقىقتارى مەن ءال-اۋقاتىن جۇيەلى تۇردە قورعاۋدى قامتاماسىز ەتەتىن ورنىقتى مەملەكەتتىك ساياساتتىڭ نەگىزى بولىپ تابىلادى», دەدى ولجاس بەكتەنوۆ.
جاسامپازدىققا جەتەلەگەن جەتى جىل