2026 جىلعى 2 ناۋرىزدا استاناداعى Nurorda ليتسەيىندە «انا ءتىلى» رەسپۋبليكالىق زياتكەرلىك وليمپياداسىنىڭ جەڭىمپازدارى ماراپاتتالدى. بيىل وليمپيادا ەكىنشى رەت عىلىم جانە جوعارى ءبىلىم مينيسترلىگىنىڭ قولداۋىمەن, حالىقارالىق «قازاق ءتىلى» قوعامىنىڭ باستاماسىمەن جانە ء«بىلىم-يننوۆاتسيا» حالىقارالىق قوعامدىق قورىنىڭ ۇيىمداستىرۋىمەن ءوتتى, دەپ حابارلايدى Egemen.kz.
سالتاناتتى شاراعا مەملەكەت جانە قوعام قايراتكەرلەرى, دەپۋتاتتار, ءتىل جاناشىرلارى, سونداي-اق قازاق ءتىلىن قولداپ جۇرگەن كاسىپكەرلەر قاتىستى.
ىرىكتەۋ كەزەڭىنە ەلىمىزدىڭ بارلىق وڭىرىنەن 9-11-سىنىپتىڭ 2000-نان استام وقۋشىسى قاتىستى. ۇزدىك ناتيجە كورسەتكەن 64 كوماندا (192 وقۋشى) رەسپۋبليكالىق كەزەڭگە جولداما الدى. فينالدا قاتىسۋشىلار «پىكىرسايىس», «تىلشىلەر» جانە ء«بىلىمپازدار» باعىتتارى بويىنشا باق سىنادى.
وليمپيادانىڭ باس جۇلدەسىن تۇركىستان وبلىسىنان كەلگەن ء«ۇشارىس» كومانداسى يەلەندى. سونداي-اق 11-سىنىپتىڭ 14 وقۋشىسىنا ەلىمىزدىڭ جەتەكشى جوعارى وقۋ ورىندارىنىڭ ءبىلىم گرانتتارى تابىستالدى. اتاپ ايتقاندا, اباي اتىنداعى قازاق ۇلتتىق پەداگوگيكالىق ۋنيۆەرسيتەتى – 5 گرانت, قازاق ۇلتتىق قىزدار پەداگوگيكالىق ۋنيۆەرسيتەتى – 5 گرانت, SDU ۋنيۆەرسيتەتى – 2 گرانت, Narxoz ۋنيۆەرسيتەتى – 1 گرانت جانە Coventry University Kazakhstan – 1 گرانت ءبولدى.
بۇدان بولەك, كوماندالار «ۇزدىكتەر», «وزاتتار», «مىقتىلار» جانە «بەلسەندىلەر» اتالىمدارى بويىنشا ماراپاتتالدى.
قازىلار القاسىنىڭ قۇرامىنا فيلولوگ-عالىمدار, ء«بىلىم-يننوۆاتسيا» ليتسەيلەرىنىڭ ماماندارى, تاجىريبەلى ادىسكەرلەر مەن بەلگىلى قالامگەرلەر كىردى.
«انا ءتىلى» وليمپياداسىنىڭ باستى ماقساتى – قازاق ءتىلىن جاستار اراسىندا كەڭىنەن ناسيحاتتاۋ, ونى عىلىم مەن ءبىلىمنىڭ ءتىلى رەتىندە دامىتۋ, سونداي-اق وقۋشىلاردىڭ وقۋ ساۋاتتىلىعى مەن جازۋ مادەنيەتىن ارتتىرۋ. وسى باعىتتا حالىقارالىق «قازاق ءتىلى» قوعامى مۇعالىمدەرگە ادىستەمەلىك قولداۋ كورسەتىپ, ءتىل جاناشىرلارىن بىرىكتىرەتىن كاسىبي الاڭدار ۇيىمداستىرىپ كەلەدى.
ء«بىزدىڭ باستى ماقساتىمىز – سوزگە, ادەبيەتكە, تىلگە قىزىعۋشىلىعى بار دارىندى وقۋشىلاردىڭ جولىن اشىپ, ولارعا جاڭا مۇمكىندىكتەر ۇسىنۋ. سونىمەن قاتار وقۋشىلار اراسىندا قازاق ءتىلى ءپانىنىڭ تارتىمدىلىعىن ارتتىرىپ, ونىڭ زياتكەرلىك الەۋەتىن كورسەتۋگە ءمان بەردىك. بۇل وليمپيادا جاستاردىڭ قازاق تىلىنە قىزىعۋشىلىعىن ارتتىراتىنىنا سەنىمدىمىز», دەيدى حالىقارالىق «قازاق ءتىلى» قوعامىنىڭ پرەزيدەنتى راۋان كەنجەحان ۇلى.
جوبا قازاق ءتىلىن تەرەڭ مەڭگەرۋگە ىنتالاندىرىپ, ونى جاستار اراسىندا بەدەلدى زياتكەرلىك قۇندىلىق رەتىندە ورنىقتىرۋدى كوزدەيدى. ۇيىمداستىرۋشىلاردىڭ ايتۋىنشا, وليمپيادا الداعى جىلدارى ءداستۇرلى تۇردە جالعاسادى.
شارانىڭ باس دەمەۋشىسى – Freedom Holding Corp. – قارجىلىق قىزمەت كورسەتەتىن, بروكەرلىك قىزمەتپەن, باعالى قاعازدارمەن ساۋدا جاساۋمەن, ينۆەستيتسيالىق زەرتتەۋلەرمەن جانە كونسۋلتاتسيا بەرۋمەن, ينۆەستيتسيالىق بانكتىك جانە اندەررايتينگتىك كورسەتىلەتىن قىزمەتتەرمەن, يپوتەكامەن, ساقتاندىرۋمەن, تەلەكوممۋنيكاتسيامەن, اۋە بيلەتتەرى مەن مادەني جانە سپورتتىق ءىس-شارالارعا بيلەتتەردى ونلاين ساتۋمەن اينالىساتىن, ونلاين سۋپەرماركەت قىزمەتتەرىن جانە ت.ب. ۇسىناتىن ارتاراپتاندىرىلعان كومپانيا بولىپ سانالادى.