اقتاۋ. 28 ءساۋىر. ماڭعىستاۋ وبلىسىندا دەنەسى تاجىك جەرىندە قالعان حالىق اقىنى, جورىق جىرشىسى قالنياز باتىردىڭ سۇيەگى تۋعان جەرىنە اكەلىپ جەرلەندى. بۇل تۋرالى egemen.kz ءتىلشىسى حابارلادى.
قالنياز شوپىق ۇلى 1816 جىلى قازىرگى بەينەۋ اۋدانىنا قاراستى سام قۇمىندا دۇنيەگە كەلگەن. جاستايىنان «قىرىمنىڭ قىرىق باتىرىن» جىرلاپ, جىرشى ءارى جىراۋ رەتىندە تانىلعان. اقىن جانە باتىر قالنياز حيۋا حاندارىنا قارسى جورىقتارعا قاتىسىپ, ساربازداردى ولەڭ-تولعاۋلارىمەن ەرلىككە ۇندەدى. 1870 جىلى پاتشا ۇكىمەتىنە نارازىلىق بىلدىرگەن يسا-دوسان كوتەرىلىسىنە قاتىسادى. كوتەرىلىس جەڭىلىس تاپقان سوڭ قۋدالاۋعا ۇشىراپ, اۋىل-ەلى اۋعانستان, تاجىكستان جەرىنە كوشەدى. 1902 جىلى تاجىكستاننىڭ گيسسار القابىندا ومىردەن ءوتىپ, توپىراق جات جەردەن بۇيىرعان ەدى.
قالنياز جىراۋدىڭ بىرنەشە ەرلىك داستاندارى, ايتىستارى, تولعاۋ-تەرمەلەرى, جىرلارى مەن كۇيلەرى قازاق ەلىنە, ماڭعىستاۋ, اتىراۋ وڭىرلەرىنە, سونداي-اق, ورتا ازيا ەلدەرىنە كەڭ تانىس. بۇگىندە ۇرپاقتارى ماڭعىستاۋ, وڭتۇستىك قازاقستان وبلىستارىندا تۇرادى. وسىلايشا, ءبىر عاسىردان استام ۋاقىت جات جەردە جاتقان بابا سۇيەگى تۋعان توپىراعىنا ورالىپ, وبلىس اۋماعىنداعى وتپان تاۋدان جاي تاپتى. اتا رۋحىنا مەشىتتە قۇران وقىلدى.
ماڭعىستاۋ وبلىستىق بەكەت اتا مەشىتىنىڭ باس يمامى سمايىل سەيتبەكوۆ بەس جاعدايدا عانا ءمايىتتى قايتا جەرلەۋگە رۇقسات بەرىلەتىنىن ءتۇسىندىرىپ بەردى. ونىڭ بىرىندە «ءمايىت جات جەرگە جەرلەنسە, سونداي-اق, بىرەۋدىڭ جەرىنە جەرلەنسە, جاقىندارى كەيىن قازىپ الىپ, باسقا جەرگە جەرلەۋگە بولادى», – دەلىنگەن ەكەن.
گۇلايىم شىنتەمىرقىزى.
دەرەك: egemen.kz.
سۋرەت: تالانت قۇسايىن.