اقتوبە. 13 مامىر. اقتوبەدە جەڭىستىڭ 70 جىلدىعىنا وراي وبلىستىق سوتتىڭ باستاماسىمەن ۇلى وتان سوعىسى جانە سوت جۇيەسى ارداگەرلەرىنىڭ قۇرمەتىنە مەموريالدىق تاقتا اشىلدى. بۇل تۋرالى egemen.kz ءتىلشىسى حابارلادى.
اتالعان ەسكەرتكىش وبلىستىق سوت عيماراتىنىڭ الدىندا ورناتىلدى. شاراعا وبلىس اكىمىنىڭ ورىنباسارى مۇحتار جۇماگازيەۆ, وبلىستىق ارداگەرلەر كەڭەسىنىڭ توراعاسى كەڭەس ءبىرمانوۆ, قۇقىق قورعاۋ ورگاندارىنىڭ وكىلدەرى, وبلىس ورتالىعىنا جاقىن ورنالاسقان جەرگىلىكتى سوت توراعالارى, وبلىستىق سوت سۋديالارى, وبلىستىڭ سوت جۇيەسىنىڭ ارداگەرلەرى, ومىردەن وتكەن سوعىس جانە تىل ارداگەرلەرىنىڭ جۇبايلارى, ولاردىڭ ۇرپاقتارى قاتىستى.
سالتاناتتى راسىمدە ءسوز العان وبلىستىق سوتتىڭ توراعاسى ەرلان ايتجانوۆ جينالعان قاۋىمدى ۇلى جەڭىستىڭ 70 جىلدىق مەرەيتويىمەن قۇتتىقتاپ, شاراعا قاتىسۋشىلارعا مىقتى دەنساۋلىق, ۇزاق عۇمىر, وتباسىلارىنا باقىت, تىلەدى. ارداگەرلەرگە مايدانداعى ەرلىكتەرى مەن تىلداعى ەڭبەكتەرى ءۇشىن العىس سەزىمىن ءبىلدىردى. سوت جۇيەسىندە جيىرما بەس جىلدان استام ادال قىزمەت اتقارعان ەڭبەك ارداگەرى كەڭەس ءجۇسىپوۆ اعا بۋىن ارىپتەس سۋديالار مەن ەسكەرتكىش تاقتاعا ەنگەن سوعىس ارداگەرلەرى تۋرالى جىلى لەبىزگە تولى ەستەلىكتەرىمەن ءبولىستى.
مەموريالدىق تاقتانى وبلىستىق سوت توراعاسى ەرلان ايتجانوۆ پەن سوت جۇيەسىنىڭ ارداگەرى سوۆەت مۇحامبەتقاليەۆ سالتاناتتى تۇردە اشتى. ۇلى وتان سوعىسىنىڭ جانە سوت جۇيەسىنىڭ ارداگەرى وماربەك بەرديەۆتىڭ قىزى كامشات بەرديەۆا اكەسىنىڭ اتىن مەموريالدىق تاقتاعا ەنگىزگەنى ءۇشىن وبلىستىق سوتتىڭ باسشىلىعىنا ريزاشىلىعىن جەتكىزدى.
ساتىبالدى ءساۋىرباي.
دەرەك, سۋرەت: egemen.kz.