مەملەكەت باسشىسى سەربيا پرەزيدەنتىن «التىن قىران» وردەنىمەن ماراپاتتادى

«سەربيا ءسىز جۇرگىزىپ وتىرعان ساليقالى ساياساتتىڭ ارقاسىندا زور جەتىستىكتەرگە جەتىپ, وركەندەپ كەلەدى. حالىقارالىق بەدەلى دە ارتا ءتۇستى. الداعى ۋاقىتتا ەلىڭىز ءسىزدىڭ پاراساتتى باسشىلىعىڭىزبەن جاڭا بەلەستەردى باعىندىرا بەرەدى دەپ سەنەمىن. سەربيا – قازاقستاننىڭ بالقان تۇبەگىندەگى سەنىمدى سەرىكتەسى. ەكى ەلدىڭ قارىم-قاتىناسى ءوزارا قولداۋعا, تۇسىنىستىك پەن مىزعىماس دوستىققا نەگىزدەلگەن. بارلىق دەڭگەيدە بەلسەندى ساياسي ديالوگ دامىپ كەلە جاتىر. ساۋدا-ەكونوميكا, ينۆەستيتسيا جانە مادەني-گۋمانيتارلىق سالاداعى ىنتىماقتاستىق نىعايىپ كەلەدى. كوپجاقتى قۇرىلىمدار اياسىنداعى بايلانىسىمىز كۇشەيە ءتۇستى. قازىرگىدەي الماعايىپ كەزەڭدە ءوزارا ارىپتەستىكتى جانداندىرۋ وتە ماڭىزدى. سوندىقتان ءبىز وسى قارقىندى ساقتاپ, ءتۇرلى سالاداعى ىقپالداستىقتى دامىتۋعا مۇددەلىمىز. بۇعان تولىق مۇمكىندىك بار. ءوزارا سەنىم مەن دوستىق رۋحىندا وتكەن مازمۇندى كەلىسسوزدەر – سونىڭ ايقىن دالەلى. بۇگىنگى كەلىسىمدەر سەرىكتەستىگىمىزدى جاڭا دەڭگەيگە كوتەرەدى دەپ سانايمىن. ءبىز بۇل باعىتتا بىرلەسىپ ارەكەت ەتۋگە ءاردايىم دايىنبىز», دەدى پرەزيدەنت.

اقوردادا سەربيا پرەزيدەنتىن سالتاناتتى قارسى الۋ ءراسىمى ءوتتى

قاسىم-جومارت توقاەۆ قازاقستان مەن سەربيا اراسىنداعى بايلانىستى نىعايتۋعا ولشەۋسىز ۇلەس قوسقانى ءۇشىن الەكساندر ءۆۋچيچتى ەلىمىزدىڭ ەڭ جوعارى مەملەكەتتىك ناگراداسى – «التىن قىران» وردەنىمەن ماراپاتتادى.

«بۇل – قازاق جۇرتىنىڭ سىزگە جانە سەربيا حالقىنا دەگەن زور ريزاشىلىعى جانە ەرەكشە قۇرمەتىنىڭ بەلگىسى. ءوزىڭىزدى شىن جۇرەكتەن قۇتتىقتايمىن! وسى ماراپات ەكى ەلدىڭ قارىم-قاتىناسىن ودان ءارى دامىتۋعا ىقپال ەتەرىنە كامىل سەنەمىن. قوس حالىقتىڭ دوستىعى جاساي بەرسىن!», دەدى مەملەكەت باسشىسى.

قازاقستان مەن سەربيا پرەزيدەنتتەرى شاعىن قۇرامدا كەلىسسوز وتكىزدى

سەربيا پرەزيدەنتى مۇنداي ماراپاتتى يەلەنۋ زور مارتەبە ەكەنىن ايتىپ, بۇل ەكى ەل اراسىنداعى قارىم-قاتىناستى ودان ءارى نىعايتۋعا ىقپال ەتەتىنىنە توقتالدى.

«التىن قىران» وردەنىن ەرەكشە قۇرمەتپەن قابىل الدىم. بۇل ماراپات ماعان ءوزارا بايلانىستارىمىزدى ارتتىرۋ جانە بەيبىتشىلىك پەن تۇراقتىلىقتى قامتاماسىز ەتۋ جولىنداعى ورتاق ىستە زور جاۋاپكەرشىلىك جۇكتەيدى. كەلەشەك ۇرپاقتىڭ يگىلىگى ءۇشىن سەربيا مەن قازاقستاننىڭ دوستىعى نىعايا بەرۋىنە تىلەكتەسپىن», دەدى الەكساندر ۆۋچيچ.

قازاقستان مەن سەربيا پرەزيدەنتتەرى كەڭەيتىلگەن قۇرامدا كەلىسسوز جۇرگىزدى