كاتونقاراعاي – تۋريستىك اۋدان. بيىل التايدىڭ اسقارلارى مەن القىمىندا جاتقان اۋداننىڭ جولدارى جوندەلىپ جاتىر. بۇل شارۋانىڭ تۋريستىك سالانى جانداندىرۋعا ىقپالى زور, دەيدى اۋدان اكىمى قاليحان بايعونىسوۆ. ايتالىق, اۋدان اۋماعىنداعى تۋريستەردى جىل بويى قابىلدايتىن «راحمان قاينارى» جانە ماۋسىمدىق «نۇربۇلاق» شيپاجايلارى رەسپۋبليكالىق جولدىڭ بويىندا ورنالاسقان. سونىمەن قاتار, 11 پانتىمەن ەمدەۋ ورىندارى, جانارماي قۇيۋ ستانسالارى, ساۋدا ورىندارى, قوناقۇيلەر مەن مەيرامحانالار, قىمىزحانالار دا رەسپۋبليكالىق, وبلىستىق جانە اۋداندىق ماڭىزى بار اۆتوجولداردا ورىن تەپكەن.
جالپى, كاتونقاراعاي اۋدانىنداعى اۆتوكولىك جولىنىڭ ۇزىندىعى 721,7 شاقىرىمدى قۇرايدى. ونىڭ ىشىندە رەسپۋبليكالىق ماڭىزى بار جول – 227 شاقىرىم, وبلىستىق ماڭىزى بار – 111 شاقىرىم جانە اۋداندىق ماڭىزى بار جول 383,7 شاقىرىمدى قۇراپ وتىر.
«وسكەمەن – زىريان – ۇلكەن نارىن – كاتونقاراعاي – راحمان قاينارى» رەسپۋبليكالىق جولىن كۇتىپ-ۇستاۋ جۇمىسى «قازاۆتوجول» ءوجۋ-27 امك-گە تيەسىلى. بۇل باعىتتاعى جولداردى جوندەۋگە رەسپۋبليكالىق بيۋدجەتتەن 2 ملرد. تەڭگەدەن استام قارجى ءبولىندى. بيىل مامىر ايىندا اتالعان جولدىڭ «399-418 شاقىرىم» ۋچاسكەسىندەگى 20 شاقىرىمىنا قارا جابىندى توسەۋ جۇمىستارى باستالدى. كۇردەلى جوندەۋدى «كاتونقاراعاي وندىرىستىك جول ۋچاسكەسى» جشس جۇرگىزۋدە. اعىمداعى جىلى جوندەۋ جۇمىستارىنا 496 ملن. تەڭگەدەن استام قاراجات ءبولىندى.
جاقىندا اۋدانعا جۇمىس ساپارىمىزدىڭ اياسىندا ورەل اۋىلى جانىنداعى قۇرىلىس جۇمىستارىمەن تانىستىق. اۋىل تۇرعىندارىنىڭ ايتۋىنشا, ورەل وزەنىندەگى كوپىر كوكتەمگى الاپات تاسقىنعا توتەپ بەرە المايتىندىقتان, ءجيى سۋ الىپ كەتە بەرەدى ەكەن. بيىل اتالعان كوپىر تولىعىمەن اۋىستىرىلىپ, ءجوندەۋدەن وتكىزىلىپ جاتىر. ءبىز مەردىگەرلەردىڭ كوپىرگە دەيىنگى وزەن ارناسىن كەڭەيتىپ جاتقانىن بايقادىق. جول جوندەۋشىلەر قاجەتتى ماتەريالدى جەتى شاقىرىم جەردە ورنالاسقان تاس كارەرىنەن تاسىپ جۇرگەندىكتەرىن جەتكىزدى. بوگەتتىڭ ۇزىندىعى – 300 مەتر. قۇرىلىس ۋچاسكەسىنىڭ بريگاديرى اندرەي ترۋدنيكوۆتىڭ ايتۋىنشا, كوپىر كۇزگە دەيىن اياقتالادى. مۇندا كران, بۋلدوزەر, كاماز تەحنيكالارى جۇمىس ىستەپ جاتىر ەكەن. قازىرگى كەزدە كوپىردىڭ بەتونداۋ-مونتاجداۋ جۇمىستارى جۇرگىزىلۋدە. ال ورەل مەن بەرەل اۋىلدارىنىڭ ورتاسى – 20 شاقىرىم. بيىل وسى جولدى سالۋعا 2 ملن. 800 مىڭ تەڭگە ءبولىنىپتى. اعىمداعى جىلى 6 شاقىرىمىن جاساماق. ەكى جولاقتى بولاتىن جول قۇرىلىسىندا 35 ادام, 15 تەحنيكا جۇمىس ىستەپ جاتىر, دەدى مەردىگەر كومپانيا وكىلى نۇرجان مۇساباەۆ. ازىرگە جول جامىلعىسى سالىنىپ, كوپىر مەن قۇبىرلار ورناتىلۋدا. سونداي-اق, اۋداندا «ۇلكەن نارىن – كۇرشىم» جولىنىڭ 23 شاقىرىمىنا جابىندى توسەۋ جۇمىستارى جۇرگىزىلۋدە. وعان رەسپۋبليكالىق بيۋدجەتتەن 330 ملن. تەڭگە قاراجات بولىنگەن. ال اۋداندىق دارەجەدەگى جولداردى كۇتىپ-ۇستاۋ جۇمىستارىمەن «نارىن-سەرۆيس» جشس اينالىسادى. بيىل جەرگىلىكتى جەلىدەگى جولدارعا اعىمداعى جوندەۋ جۇمىستارىن جۇرگىزۋگە اۋدان بيۋدجەتىنەن 42 ملن. تەڭگە ءبولىندى. وسى ارقىلى جاڭا ۇلگى – جامبىل – بەرەل باعىتىنداعى 20 شاقىرىم, نوۆوپولياكوۆكا – ۋليانوۆكا باعىتىنداعى 13 شاقىرىم, نوۆوپولياكوۆكا – سەننوە باعىتىنداعى 14 شاقىرىم جول جوندەلمەك. ايتا كەتەرلىگى, التايعا الىستان كەلەتىن تۋريستەرگە قولايلى جاعداي جاساۋ ماقساتىندا ۇلكەن نارىن اۋىلىندا اۋەجاي عيماراتى مەن ۇشۋ الاڭىنىڭ قۇرىلىسىنا ارنالعان تەحنيكالىق-ەكونوميكالىق نەگىزدەمە جوباسى ازىرلەندى. ەگەر اتالعان جوبا ساتىمەن جۇزەگە اسار بولسا, كەلەشەكتە تۋريستەر مەن جولاۋشىلار اۋدانعا ۇشاقپەن كەلەتىن مۇمكىندىككە يە بولادى.
دۋمان اناش, «ەگەمەن قازاقستان».
شىعىس قازاقستان وبلىسى, كاتونقاراعاي اۋدانى.