سەنات دەپۋتاتتارى بيبىگۇل جەكسەنباي مەن دارحان قىدىرالى ۇلتتىق ارحيۆ قىزمەتكەرلەرىمەن جۇزدەسىپ, «جاڭا كونستيتۋتسيا جوباسى: نەگىزگى باعىتتار جانە قوعامداعى ءرولى» تاقىرىبىن تالقىلادى. كەزدەسۋ مازمۇنى ەل دامۋىنىڭ جاڭا كەزەڭىنە جول اشاتىن قۇجاتتىڭ ءمانىن تەرەڭ تۇسىندىرۋگە ارنالدى, دەپ جازادى Egemen.kz
جيىندا سەناتورلار جاڭا كونستيتۋتسيا جوباسىنىڭ مەملەكەتتىگىمىزدى نىعايتىپ, باسقارۋ جۇيەسىن جاڭعىرتۋداعى ستراتەگيالىق سالماعىنا توقتالدى. قۇجات قوعام سۇرانىسىنا جاۋاپ بەرەتىن, قۇقىقتىق كەڭىستىكتى زامان تالابىنا ساي تۇزەيتىن باعىتتاردى قامتيتىنى ايتىلدى.
سەناتور بيبىگۇل جەكسەنباي جاڭا اتا زاڭ جوباسىنىڭ قوعامدىق ماڭىزىن ايقىنداي كەلە, ونىڭ تەك قۇقىقتىق قۇجات ەمەس, ازاماتتار مەن بيلىك اراسىنداعى جاڭا قوعامدىق كەلىسىمنىڭ كورىنىسى ەكەنىن ايتتى.
«بۇل رەفورما ازاماتتاردىڭ قۇقىقتارى مەن بوستاندىقتارىن كەڭەيتىپ, مەملەكەتتىك باسقارۋ جۇيەسىن زاماناۋي ستاندارتتارعا ساي جەتىلدىرۋگە باعىتتالعان. دەربەس دەرەكتەردىڭ قاۋىپسىزدىگى, ادامنىڭ جەكە ءومىرىن قورعاۋ, بالالار مەن قوعامدى زياندى اقپاراتتان ساقتاۋ – جاڭا كونستيتۋتسيا جوباسىنىڭ نەگىزگى قاعيداتتارى. بۇل نورمالار ءاربىر ازاماتتىڭ كۇندەلىكتى ومىرىنە, قۇندىلىقتارىنا تىكەلەي اسەر ەتەدى. رەفەرەندۋم – ءار ازاماتقا ءوز تاڭداۋىن جاساپ, تاريحي ۇدەرىستەرگە تىكەلەي قاتىسۋ مۇمكىندىگى. ءسىزدىڭ داۋىسىڭىز – جاڭا اتا زاڭنىڭ قالىپتاسۋىنا جانە ەلىمىزدىڭ بولاشاعىنا ىقپال ەتەدى. ال ارحيۆ قىزمەتكەرلەرى – تاريحي قۇجاتتاردى ساقتاۋشىلار عانا ەمەس, ەلدىڭ رۋحاني جادىنا جاۋاپتى, وسى تاريحي كەزەڭنىڭ ءمانىن تەرەڭ تۇسىنەتىن قاۋىم», دەدى ول.
ەلىمىزدىڭ سپورتشىلارى مەن ونەر يەلەرى جاڭا كونستيتۋتسيا جوباسىن قولدادى
ءوز سوزىندە سەناتور دارحان قىدىرالى ارحيۆ سالاسىنىڭ رەفورمالارداعى ورنىن اتاپ ءوتتى.
«سىزدەردىڭ ەڭبەكتەرىڭىز جاڭا زاڭ جوباسىنىڭ ىسكە اسۋىنا تىكەلەي ۇلەس قوسادى. مۇراعات ءىسىن تسيفرلاندىرۋ, دەرەكتەر قورىن دامىتۋ, ماتەريالدىق-تەحنيكالىق بازانى نىعايتۋ, ارحيۆ قۇجاتتارىن ساقتاۋمەن قاتار, ولاردىڭ قاۋىپسىز ءارى قولجەتىمدى بولۋىن قامتاماسىز ەتۋ – بۇل رەفورمانىڭ ناقتى جانە ماڭىزدى باعىتتارىنىڭ ءبىرى», دەدى ول.
اقسۋ جاستارى وبلىس اكىمىمەن جاڭا كونستيتۋتسيا جوباسىن تالقىلادى
كەزدەسۋ سوڭىندا سەناتورلار 15 ناۋرىزدا وتەتىن رەسپۋبليكالىق رەفەرەندۋمنىڭ ەل تاعدىرى ءۇشىن ءمانى زور ەكەنىن ايتىپ, ارحيۆ ۇجىمىن جانە بارشا ازاماتتى ماڭىزدى ساياسي ناۋقانعا بەلسەندى قاتىسۋعا ۇندەدى.
رەفەرەندۋم جانە جاڭا كونستيتۋتسيا: حالىق كوپ جينالاتىن ورىنداردا اقپاراتتىق جۇمىس جانداندى