بيىل سەگىزىنشى رەت وتكىزىلىپ وتىرعان «مەكتەپكە جول» اكتسياسى الەۋمەتتىك جاعىنان از قامتىلعان وتباسى بالالارىنا دەگەن كومەكتىڭ جارقىن ۇلگىسى ىسپەتتى. يگى باستاما اقمولا وڭىرىندە دە مەملەكەتتىك قامقورلىقپەن قاتار, بۇقارالىق سيپات الىپ جاتقانى قۋانىشتى.
وبلىستىق ءبىلىم باسقارماسىنىڭ باسشىسى بالىم ءىزباساروۆانىڭ ايتۋىنشا, وتكەن جىلى مۇقتاج وتباسىلاردىڭ 6359 بالاسىنا بيۋدجەتتەن 30 ميلليون تەڭگە قارجى ءبولىنىپ, ماتەريالدىق كومەك كورسەتىلدى. سونىمەن ءبىرگە, الەۋمەتتىك جاعدايى تومەن وتباسىلاردىڭ 5197 بالاسىنا دەمەۋشىلەر تاراپىنان وقۋ قۇرال-جابدىقتارى مەن كيىم-كەشەكتەر الىپ بەرىلگەن. بيىل, الدىن الا جاسالعان بولجام بويىنشا, 10637 وقۋشىعا ماتەريالدىق كومەك قاجەت. ونىڭ ىشىندە 861 بالا مەكتەپ تابالدىرىعىن العاش رەت اتتاعالى وتىر. تامىز ايى كوڭىل وسىرەرلىك شارالارمەن باستالدى. گازەتىمىزدىڭ تىلشىلەر قوسىنىنا كۇن سايىن دەرلىك جاقسى حابارلار ءتۇسىپ جاتىر. ونىڭ العاشقىسىن «اكتسيانى دەپۋتاتتار باستادى» دەگەن اتاۋمەن جاريالاعان ەدىك. حالىق قالاۋلىلارى بەلسەندىلىگى ءالى دە تومەندەمەۋدە. اسىرەسە, «نۇر وتان» پارتياسى اقمولا فيليالىنىڭ ۇيىمداستىرۋىمەن «باقىتتى بالالىق» جوباسى جۇرتشىلىق نازارىن اۋدارعانىن ايتقىمىز كەلەدى. اقمولا وبلىس- تىق جانە كوكشەتاۋ قالالىق ءماسليحاتىنىڭ دەپۋتاتتارى قازىردىڭ وزىندە ءۇش دۇركىن قايىرىمدىلىق كەزدەسۋىن وتكىزدى. ماسەلەن, پارتيا فيليالى عيماراتىنىڭ الاڭىنداعى سالتاناتقا جۇزدەن استام ادام جينالدى. «جاس وتان» جاستار قاناتىنىڭ, «دوستار» مادەنيەت سارايىنىڭ جانە «ءاۋلەت» مەكتەپكە دەيىنگى وقىتۋ ورتالىعىنىڭ كونتسەرتتىك باعدارلاماسى قويىلدى. بۇل كۇنى دەپۋتاتتىق فراكتسيا مۇشەلەرى 49 وقۋشىعا 1 ميلليون تەڭگەنىڭ اقشالاي سەرتيفيكاتىن ۇلەستىردى. يگى ىستەن قازاقستان پارلامەنتى سەناتىنىڭ دەپۋتاتى, جەرلەس جازۋشى جابال ەرعاليەۆ تە شەت قالماي, ءۇش وتباسىنىڭ قۋانىشىن ەسەلەگەنى بالالار جانىن جادىراتتى. ال, وبلىستىق ءماسليحاتتىڭ دەپۋتاتى مۇرات تەمىرجانوۆ ءوز وكرۋگىندەگى 14 بالاعا قوماقتى سىيلىقتار ۇسىندى. «نۇر وتان» پارتياسى وب- لىستىق فيليالى توراعاسىنىڭ ورىنباسارى عالىم بەكماعامبەتوۆ, وبلىستىق ءماسليحاتتىڭ دەپۋتاتتارى ساعىنتاي ەلۋباەۆ, سەرىك اياعانوۆ, ەلەنا ماششينسكايا, ولاردىڭ قالالىق ماسليحاتتاعى ارىپتەستەرى سەرىك كاكەنوۆ, باۋىرجان عايسا, جانات ءابىشوۆ جۇرتشىلىقتى قايىرىمدىلىق پەن يماندىلىققا شاقىرسا, كوپ بالالى انا ناتاليا نيكۋلينا كوپشىلىك اتىنان العىسىن ءبىلدىردى. مۇنداي شارالار وبلىستىڭ بارلىق اۋداندارى مەن قالالارىندا دا وتكىزىلدى. وعان قاتىسقان 125 «نۇر وتاندىق» دەپۋتات 168 ءبۇلدىرشىنگە 3 ميلليون 485 مىڭ تەڭگەنىڭ ماتەريالدىق كومەگىن كورسەتتى.
باقبەرگەن امالبەك, «ەگەمەن قازاقستان».
اقمولا وبلىسى.