استانا. 13 مامىر. قازاقستاننىڭ ەڭبەك سىڭىرگەن قايراتكەرى, پرەزيدەنت سىيلىعىنىڭ لاۋرەاتى, جۋرناليست-جازۋشى قايسار قاجى ءالىمنىڭ «مەككە, ءمادينام مەنىڭ!» اتتى كىتابى جارىق كوردى. بۇل تۋرالى egemen.kz حابارلادى.
ەڭبەكتە اۆتوردىڭ مەككە, ماديناعا جاساعان قاجىلىق ساپارى, يماندىلىق قۇندىلىقتارىنا نەگىزدەلگەن وي-پايىمى, ىشكى سەزىم-سىرى باياندالادى.
كىتاپتىڭ جازىلۋى تۋرالى قايسار قاجىنىڭ العى ءسوز رەتىندە بەرىلگەن «جۇرەك ءسوزى» نەمەسە جولاي جوعالعان جۇگىمنىڭ اللانىڭ قۇدىرەتىمەن قولىما تۇتاستاي تابىستالعانى تۋرالى» اتتى تۇسىندىرمە جازباسىندا كەڭىنەن ايتىلعان.
قاجىلىقتان ەلگە ورالعان كەزدە استانا اۋەجايىندا قالامگەردىڭ قولىنا جۇگىنىڭ ءبىر بولىگى عانا تيەدى. ال جوعالعان جۇكتىڭ ىشىندە قۇران كىتاپتارى, قاعبا بەينەلەنگەن كىلەمشەلەر, جايناماز, تاسبيح سەكىلدى سىي-سياپاتتارى بولعان ەكەن. جانىنا باتقانى – قاستەرلى مەكەندە شىن ىقىلاسپەن جۇرگىزگەن كۇندەلىك-قولجازباسى دا سول قاپشىقتىڭ ىشىندە كەتۋى ەدى.
«سول كۇندەلىك-قولجازبام قايتپاعاندا, بۇل كىتابىم – قاجىلىق پايىمىم قالاي جازىلار ەدى دەپ, كۇڭىرەنىپ, ىلە تاۋبەمە كەلەمىن! جازىلار-اۋ, بىراق ءىزىن سۋىتپاي داپتەرىمە تۇرتكەن, دەرەكتەردىڭ دالمە-دالدىگى, تۋلاعان سەزىم ۇشقىنى, يماندىلىق ءيىرىمى, تازارعان جۇرەك ءسوزى, ءبارى-ءبارى اينا قاتەسىز سول كۇيىندە ءتىل ۇشىنا ورالار ما ەدى, ورالماس پا ەدى...» – دەگەن قالامگەر بولعان ىسكە شۇكىرشىلىك ايتادى.
جاڭا تۋىندى «مەككە» جانە «ءمادينا» اتتى ەكى بولىمنەن تۇرادى. مازمۇنىن ساپالى سۋرەتتەر ايشىقتاعان كىتاپ وقىرمانىن رۋحاني كەمەلدىلىككە تاربيەلەيدى.
ەلامان قوڭىر.
دەرەك, سۋرەت: egemen.kz.