رەفەرەندۋمدا مۇمكىندىگى شەكتەۋلى ازاماتتار ەركىن ءارى كەدەرگىسىز داۋىس بەرە الادى. ماسەلەن, كورۋ جانە ەستۋ قابىلەتى بۇزىلعان جاندار برايل قارپىندەگى ترافارەتتەر, اۋديوبيۋللەتەندەر مەن سۋردواۋدارمالى اقپاراتتىق ماتەريالداردى قولدانادى, دەپ حابارلايدى Egemen.kz.
بۇل تۋرالى ورتالىق سايلاۋ كوميسسياسىنىڭ جانىنداعى مۇگەدەكتەگى بار ادامداردىڭ سايلاۋ قۇقىقتارىن قامتاماسىز ەتۋ جونىندەگى جۇمىس توبىنىڭ وتىرىسىندا ايتىلدى.
ماڭىزدىسى – سايلاۋ ۋچاسكەلەرى ءبىرىنشى قاباتتا ورنالاسادى. سونداي-اق ولار پاندۋستار, كىرەبەرىستەگى شاقىرۋ باتىرمالارى, اۆتوكولىكتەرگە ارنالعان ارنايى تۇراق ورىندارى, تاكتيلدى جولاقتار مەن ارنايى بەيىمدەلگەن كابينالارمەن جابدىقتالادى. ياعني ۋچاسكەلەردە مۇگەدەكتىگى بار ادامدارعا ارنالعان بۇرىشتار ۇلكەيتكىشتەر, قۇلاققاپتار, وتكىزىلىپ جاتقان ناۋقان تۋرالى اقپاراتتىق ماتەريالدار, تىرەك-قيمىل اپپاراتى بۇزىلعان ازاماتتاردىڭ قولجەتىمدىلىگىن ەسكەرە وتىرىپ جابدىقتالعان داۋىس بەرۋ كابينالارىمەن قامتاماسىز ەتىلەدى.
وعان قوسا كورۋ قابىلەتى بۇزىلعان ازاماتتارعا ارنالعان اۋديواقپارات, ەستۋىندە ەرەكشەلىگى بار وتانداستارىمىزعا سۋردواۋدارماسى بار بەينەماتەريالدار, كرەسلو-اربامەن جۇرەتىندەر ءۇشىن بەيىمدەلىپ ورنالاستىرىلعان اقپاراتتىق ماتەريالدار قولجەتىمدى فورماتتا سۇيەمەلدەنەدى. رەفەرەندۋم كوميسسيالارى رەفەرەندۋم تۋرالى بارلىق قاجەتتى اقپاراتتى قامتيتىن QR-كودى بار شاقىرۋ قاعازدارىن ازىرلەۋدە, سونداي-اق ۇيلەردى ارالاۋ بارىسىندا ازاماتتاردىڭ ارنايى قىزمەتتەرگە مۇقتاجدىعى ناقتىلاناتىنىن ايتتى.
«بيۋللەتەنگە برايل قارپىمەن ترافارەتتەر ازىرلەنەدى جانە ولار ەلدەگى بارلىق سايلاۋ ۋچاسكەلەرىندە ۇسىنىلاتىن بولادى, بۇل فورمات تولىقتاي كورمەيتىن ازاماتتار مەن ناشار كورەتىن داۋىس بەرۋشىلەردىڭ قاجەتتىلىگىن قامتاماسىز ەتەدى, سونداي-اق ءار داۋىس بەرۋ ۋچاسكەسىندە مىندەتتى تۇردە اۋديوبيۋللەتەن قولجەتىمدى بولادى», دەدى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ۆيكتوريا شەگاي.
جيىندا بارلىق دەڭگەيدەگى رەفەرەندۋم كوميسسيالارىنىڭ مۇشەلەرى ءۇشىن مۇگەدەكتىگى بار ادامداردىڭ سايلاۋ قۇقىقتارىن قامتاماسىز ەتۋ ماسەلەلەرى بويىنشا بەينەكۋرس ۇيىمداستىرىلعانى اتاپ ءوتىلدى.
«كونستيتۋتسيا ءماتىنىن دىبىستاۋ جوباسى – قۇقىقتىق اقپاراتتىڭ قولجەتىمدىلىگىن ارتتىرۋعا باعىتتالعان ءتيىمدى قادام. اۋديونۇسقانىڭ ەلىمىزدەگى 10 مىڭنان اسا سايلاۋ ۋچاسكەسىندە ورنالاستىرىلاتىنى قۋانتادى. بۇل باستاما, اسىرەسە, مۇمكىندىگى شەكتەۋلى جاندارعا, ەگدە جاستاعى ازاماتتارعا, كورۋ قابىلەتى تومەن نەمەسە برايل قارپىن وقي المايتىن ادامدارعا ۇلكەن قولداۋ بولماق. وسىلايشا ءار ازاماتتىڭ سانالى تۇردە تاڭداۋ جاساۋىنا جاعداي جاسايدى», دەدى پرەزيدەنت جانىنداعى حالىقتىڭ الەۋمەتتىك جاعىنان وسال ساناتتارىنىڭ قۇقىقتارى جونىندەگى ۋاكىل, ءماجىلىس دەپۋتاتى كەنجەعۇل سەيتجان.
جاڭا كونستيتۋتسيا ءماتىنىن برايل قارپىمەن جازۋ ۇسىنىلدى
جۇمىس توبىنىڭ وتىرىسىندا اقتوبە جانە پاۆلودار وبلىستارىنىڭ ۋچاسكەلەردە ەلەكتروندىق ۇلكەيتكىشتەر, ەستۋ قابىلەتى تومەن ازاماتتارعا ارنالعان يندۋكتسيالىق ىلمەكتەر, جارىقتىق جانە دىبىستىق اقپاراتتاندىرعىشتار, سونداي-اق برايل قارپىمەن كورسەتىلگەن ۋچاسكە سىزبالارى تۇرىندە يننوۆاتسيالىق قۇرالدارمەن جابدىقتاۋ تاجىريبەسى تۋرالى ەسەپتەرى تىڭدالدى. قازىرگى ۋاقىتتا مۇنداي تاجىريبەلەردى باسقا وڭىرلەردە ەنگىزۋ ءتيىستى جەرگىلىكتى اتقارۋشى ورگاندارمەن بىرلەسىپ, پىسىقتالىپ جاتىر.
ازاماتتاردىڭ 78%-دان استامى جاڭا كونستيتۋتسيانى قولدايدى