قىزىلوردا. 13 تامىز. قىزىلوردا وبلىسىندا پوليتسەيلەر جوعالىپ كەتكەن ءبۇلدىرشىندى ىزدەستىرۋ جۇمىستارىن جالعاستىرۋدا. بۇل تۋرالى egemen.kz ءتىلشىسى حابارلادى.
2015 جىلدىڭ 5 تامىزى كۇنى 3 جاسار ءبۇلدىرشىن ەكى اعاسى مەن اكەسىنە ەرىپ, جوسالى كەنتىنىڭ شەت جاعىندا ورنالاسقان كالينين ەلدى مەكەنىنە جانتاق شابۋعا بارادى. ەكى ۇلى ۇيدەن ايىر الىپ كەلۋگە كەتكەن ۋاقىتتا اكەسى 2012 جىلى تۋعان التاي ۇلى باۋبەكتەن كوز جازىپ قالادى.
ءىز-ءتۇسسىز جوعالىپ كەتكەن ءبۇلدىرشىندى تابۋ ماقساتىندا جەدەل-ىزدەستىرۋ جۇمىستارى جۇرگىزىلىپ, اۋداندىق ىشكى ىستەر ءبولىمىنىڭ پوليتسيا جاساعى, ۇلتتىق ۇلان №5547 اسكەري ءبولىمىنىڭ قىزمەتكەرلەرى, ءيىسشىل قىزمەتتىك يتتەر, توتەنشە جاعدايلار مەكەمەسىنىڭ قىزمەتكەرلەرى مەن تەحنيكالىق قۇرال-جابدىقتارى جۇمىلدىرىلدى. ىزدەستىرۋ شارالارىنا اۋداندىق اكىمشىلىك قىزمەتكەرلەرى, جەرگىلىكتى اۋدان تۇرعىندارى مەن ەرىكتىلەر توبى دا قوسىلىپ, جوعالىپ كەتكەن جەرىنەن وڭتۇستىك جاققا قاراي 3 شاقىرىم, سولتۇستىككە قاراي 4 شاقىرىم, باتىس جاقتا ورنالاسقان كالينين, شىعىس بەتتە ورنالاسقان سارىوزەك ەلدى مەكەندەرى تولىق ارالاندى. الايدا, ىزدەستىرۋ جۇمىستارى ناتيجە بەرمەي جاتىر.
وسىعان سايكەس, پوليتسيا بالانى كورگەن-بىلگەندەر بولسا, وزىنە حابارلاسۋدى سۇرايدى. ۇستىندە بولعان كيىمدەرى قارا ءتۇستى فۋتبولكا, كوك ءتۇستى شاپكا, قارا ءتۇستى شورتى, كوك ءتۇستى سۇيرەتپە اياق كيىم كورىنەدى.
ەرجان بايتىلەس.
دەرەك, سۋرەت: egemen.kz.