«Egemen Qazaqstan» گازەتى – ەسىمى ەلگە تانىمال تالاي مايتالمان تۇلەپ ۇشقان التىن ۇيا. ءبىزدىڭ بۇگىنگى كەيىپكەرىمىز دە ەڭبەك جولىن وسى گازەتتەن باستاپ, جۋرناليستيكانىڭ مارتەبەلى مەكتەبىنەن ءوتىپ, كەيىن سىرتقى ساياسات سالاسىنا بەت بۇرعان ديپلوماتيا سالاسى ماماندارىنىڭ ءبىرى – گۇلسىم ەڭسەپوۆا.
گۇلسىم باقىتقىزىنىڭ جۋرناليستيكادان ديپلوماتيا سالاسىنا كەلۋىنىڭ وزىندىك جولى بار. اتىراۋ ءوڭىرىنىڭ تۋماسى ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىنە وقۋعا تۇسكەندە بولاشاقتا حالىقارالىق ساياسات سالاسىندا ەڭبەك ەتەمىن دەپ ويلاماسا كەرەك. تالاپتى جاس ستۋدەنت كەزىنەن-اق «سوتسياليستىك قازاقستان» گازەتىمەن قويان-قولتىق بايلانىس ورناتىپ, وندىرىستىك تاجىريبەدەن ءوتىپ, رەداكتسيا باسشىلىعىنىڭ نازارىنا ىلىگەدى. قارىمدى جازۋ قابىلەتىمەن سول كەزدەگى گازەتتىڭ باس رەداكتورى كورىك دۇيسەەۆ, ونىڭ ورىنباسارلارى سارباس اقتاەۆ, ءابىراش جامىشەۆ, جاۋاپتى حاتشى مىڭباي ىلەسوۆ, ونىڭ ورىنباسارى سوۆەت شيمانباەۆ, ءبولىم مەڭگەرۋشىلەرى – قويشىعارا سالعارا ۇلى, جانات ەلشىبەك, ەربول شايمەردەن, نۇريدەن مۋفتاح, ءادىل دۇيسەنبەك, قۇلبەك ەرگوبەك, ايان نىسانالى, جۇمابەك كەنجالين سىندى كورنەكتى قالامگەرلەردىڭ سەنىمىنە يە بولادى. ونىڭ ىشىندە نۇريدەن مۋفتاح گۇلسىم ەڭسەپوۆانى ءوز قاراماعىنا الىپ, كەڭەس قۇرىلىسى بولىمىنە شتاتقا تىلشىلىك قىزمەتكە تارتادى.
گازەتتە التى جىلدان اسا ەڭبەك ەتكەن گ.ەڭسەپوۆا قوعامداعى وزەكتى, كوپتى تولعاندىرعان ماسەلەلەردى قوزعاۋمەن قاتار, حالىقارالىق تاقىرىپتاردا دا باتىل قالام تەربەدى. بۇل ماقالالارى اياعىن ءتاي-ءتاي باسقان جاس مەملەكەت ءۇشىن وزەكتىلىگىمەن قوسا تاقىرىپتارىنىڭ تارتىمدىلىعىمەن دە كوپتىڭ ەسىندە قالدى. بۇعان قوسا سىرتقى ساياساتقا جاۋاپتى لاۋازىمدى تۇلعالاردان, ەلشىلەردەن دە گازەت بەتىندە تىكەلەي سۇحباتتار ۇيىمداستىردى. سونىڭ ارقاسىندا جۋرناليست سىرتقى ىستەر مينيسترلىگى باسشىلىعىنىڭ كوزىنە ءتۇسىپ, ەلىمىزدىڭ تۇڭعىش سىرتقى ىستەر ءمينيسترى تولەۋتاي سۇلەيمەنوۆتىڭ بۇيرىعىمەن 1993 جىلى ديپلوماتيا سالاسىنا ءبىرجولا اۋىستى. بۇعان ونىڭ حالىقارالىق ساياساتتان حاباردار بولۋى, قازاق جانە ورىس تىلدەرىمەن قاتار, نەمىس ءتىلىن مەڭگەرگەنى سەبەپشىلىك ەتتى. العاشقىدا مينيسترلىكتىڭ ءباسپاسوز قىزمەتىندە ەڭبەك جولىن باستاعان گ.ەڭسەپوۆا كەيىن يۋنەسكو-مەن مادەني بايلانىستار بولىمىندە ءۇشىنشى حاتشى, اراعا جىل تولماي جاتىپ قازاقستاننىڭ گەرمانياداعى ەلشىلىگىنە ءباسپاسوز-اتتاشە رەتىندە بونن قالاسىنا جۇمىسقا جىبەرىلدى.
شەتەلدە تاجىريبەسىن شىڭداپ, ابىرويمەن ەلگە كەلگەن سوڭ گۇلسىم باقىتقىزى سىرتقى ىستەر مينيسترلىگى جانىنان شىعاتىن «ديپلوماتيا جارشىسى» جۋرنالىنىڭ قازاق ءبولىمىن باسقاردى. كەيىن ءبىلىمىن جەتىلدىرۋ ماقساتىندا ءسىم جانىنان اشىلعان ديپلوماتيالىق اكادەمياعا وقۋعا ءتۇستى. اكادەميادا وقي ءجۇرىپ, اعىلشىن ءتىلىن مەڭگەرىپ, نەمىس ءتىلىن كاسىبي دەڭگەيدە تەرەڭدەتە ءتۇستى. كەيىن ماسكەۋدە رف ءسىم ديپلوماتيا-لىق اكادەمياسىن دا تامامداعانىن ايتا كەتۋ كەرەك. وسىلايشا, ديپلوماتيا سالاسىنا دەندەپ ەنىپ, كاسىبي حالىقارالىق قاتىناستار ماماندىعىن يەلەنگەن ول 1999 جىلى سول كەزدەگى سىرتقى ىستەر ءمينيسترى قاسىم-جومارت توقاەۆتىڭ ارنايى بۇيرىعىمەن الماتىدان استاناعا قونىس اۋدارۋشىلار قاتارىنداعى مەملەكەتتىك قىزمەتكەرلەرمەن بىرگە ەلورداعا كوشىپ كەلەدى. حالىقارالىق قۇقىق دەپارتامەنتىندە جۇمىس ىستەپ, مەملەكەتتىك كەلىسىمدەر مەن شارتتاردى ازىرلەۋگە بەلسەنە قاتىستى. كاسىبي بىلىكتىلىگىنىڭ ارقاسىندا پارلامەنت ءماجىلىسىنىڭ حالىقارالىق قاتىناستار, قاۋىپسىزدىك جانە قورعانىس كوميتەتىنە كونسۋلتانت بولىپ اۋىسىپ, ءۇش جىل بويى كوپتەگەن زاڭدى دايىنداۋ ۇدەرىسىنە قاتىسىپ, «ديپلوماتيالىق قىزمەت تۋرالى» العاشقى زاڭنىڭ ازىرلەنۋىنە تىكەلەي ۇلەس قوستى. الايدا ونىڭ تاجىريبەسى مەن الەۋەتىن جوعارى باعالاعان سىرتقى ىستەر مينيسترلىگى باسشىلىعى ونى قايتادان ديپلوماتيالىق قىزمەتكە شاقىرىپ, 2003 جىلى ونى ماجارستانداعى قازاقستان ەلشىلىگىنە ديپلومات-ەكىنشى حاتشى ەتىپ جىبەرەدى. بۇل ەلدە دە ەكى جىلدان اسا ۋاقىت قىزمەت اتقارىپ, ەلگە ورالىپ, ءسىم-ءنىڭ رەسەيمەن قارىم-قاتىناس باسقارماسىندا ەڭبەك ەتىپ, كەڭەسشى دارەجەسىنە دەيىن كوتەرىلدى. كەيىن باقىلاۋ جانە قۇجات اينالىمى جانە اقپاراتتى قورعاۋ باسقارمالارىنىڭ باسشىسى قىزمەتتەرىن اتقاردى. سودان كەيىن قازاقستاننىڭ بەلارۋس ەلىندەگى ەلشىلىگىنە كەڭەسشى لاۋازىمىندا ديپلومات بولىپ جەمىستى ەڭبەك ەتتى.
العاشقى اياقالىسىن جۋرناليستيكادان باستاعان, ال بۇگىندە ديپلوماتيا مامانىنا اينالعان گۇلسىم باقىتقىزى ەشۋاقىتتا قالامىن قولىنان تاستاعان ەمەس. عىلىمي جۇمىستاردان دا قول ۇزبەدى. ونىڭ ءبىر دالەلى – 2008 جىلى «فاريزا وڭعارسىنوۆا – پۋبليتسيست» اتتى كانديداتتىق ديسسەرتاتسياسىن قورعاپ, فيلولوگيا عىلىمدارىنىڭ كانديداتى اتانۋى. ال 2016 جىلى «فاريزا – كوسەمسوز پاتشايىمى» اتتى كىتابى, 2023 جىلى پۋبليتسيستيكالىق ماقالالارى, سۇحباتتارى مەن ەسسەلەرى توپتاستىرىلعان «ۇشقىر قالام» اتتى كىتابى جارىق كوردى. 2024 جىلى «بالعىن داۋىس» دەپ اتالاتىن كىتابىن بالاپاندارعا بازارلىق رەتىندە ۇسىنسا, بىلتىر «وتىز جىلدىڭ وي-تولعاۋى» اتتى كىتابى كوپشىلىك قولىنا ءتيدى. وندا اۆتور مەملەكەت جانە قوعام قايراتكەرى قۋانىش سۇلتانوۆپەن بايىپتى سۇحباتتاسادى.
بۇگىندە كاسىبي مامان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى جۋرناليستيكا جانە الەۋمەتتىك عىلىمدار فاكۋلتەتىندە دوتسەنت-پراكتيك رەتىندە ءدارىس وقيدى. ءبىر ايتا كەتەرلىك جايت, ونىڭ وتباسىن «جۋرناليستەر وتباسى» دەۋگە تولىق نەگىز بار. جۇبايى سەيسەنحان ماحانبەت – بىرقاتار باسىلىمدى باسقارعان تاجىريبەلى جۋرناليست ءارى كاسىبي سۋرەتشى. پەرزەنتى اقەركە سەيسەنحانقىزى ل.ن.گۋميلەۆ اتىنداعى ەۇۋ جۋرناليستيكا فاكۋلتەتىن ۇزدىك ءتامامداپ, قازىر باق سالاسىندا ەڭبەك ەتىپ ءجۇر.
بۇگىندە گ.ەڭسەپوۆا – سىرتقى ىستەر مينيسترلىگىنىڭ ساياسي دەپارتامەنتىندە تمد ەلدەرىمەن بايلانىس باسقارماسىندا كەڭەسشى. ديپلوماتيا سالاسىنداعى ۇزاق جىلعى ەڭبەگى ەلەنىپ, «قۇرمەت» وردەنىمەن, «ەرەن ەڭبەگى ءۇشىن» مەدالىمەن ماراپاتتالدى. بۇدان باسقا حالىقارالىق جانە سالالىق توسبەلگىلەرى دە بار. ول – I سىنىپتى كەڭەسشى ديپلوماتيالىق رانگ يەسى. سىرتقى ىستەر مينيسترلىگى سالاسىندا 33 جىل ءوتىلى بار ديپلومات – مەملەكەتتىك ءتىل مەن مادەنيەتتىڭ ناسيحاتشىسى.