2026 جىلعى قىسقى وليمپيادا ويىندارىنىڭ التىن جۇلدەگەرى ميحايل شايدوروۆ الەۋمەتتىك جەلىدەگى پاراقشاسىندا وزىنە قولداۋ كورسەتكەن بارشا جانكۇيەرلەرىنە العىسىن ءبىلدىردى, دەپ جازادى Egemen.kz.
سپورتشى ەڭ الدىمەن وليمپيادا ويىندارى كەزىندە جانكۇيەر بولعان بارشا حالىققا ريزاشىلىعىن جەتكىزدى.
«وليمپيادا ويىندارىندا ماعان جانكۇيەر بولعان بارلىق وتانداستارىما كوپ راقمەت ايتقىم كەلەدى. سونداي-اق كورسەتىلگەن زور قولداۋ ءۇشىن مەملەكەت باسشىسىنا ايرىقشا العىسىمدى بىلدىرەمىن», دەدى ول.
شايدوروۆ قازاقستان مانەرلەپ سىرعاناۋ فەدەراتسياسىنىڭ پرەزيدەنتى باۋىرجان ەرالىعا دا ەرەكشە العىس ايتتى. ونىڭ ايتۋىنشا, سوڭعى ءبىر جىلدا فەدەراتسيا تاراپىنان كورسەتىلگەن قولداۋ مەن اتقارىلعان جۇمىس سپورتتىڭ دامۋىنا ۇلكەن ۇلەس قوستى.
ميحايل شايدوروۆ: وليمپياداداعى جەڭىسىمە دەنيس تەننىڭ ىقپالى زور
سونىمەن قاتار سپورتشى بۇكىل ماۋسىم بويى جانىنان تابىلعان ماماندارعا, جاتتىقتىرۋشىلارعا جانە كوماندا مۇشەلەرىنە ريزاشىلىعىن جەتكىزدى.
«ماۋسىم وتە اۋىر بولدى. وسى جولدا جانىمدا بولعان بارلىق ماماندارعا, جاتتىقتىرۋشىلارعا جانە قولداۋ كورسەتكەن جاندارعا شىن جۇرەكتەن العىس ايتامىن», دەدى چەمپيون.
ول تريبۋنادا وتىرىپ, ەكران الدىندا قولداۋ بىلدىرگەن جانكۇيەرلەرگە, الەۋمەتتىك جەلىدە جازبا جاريالاپ, جىلى لەبىزىن بىلدىرگەن ازاماتتارعا دا ەرەكشە ريزاشىلىق تانىتتى.
ارماننان التىنعا دەيىن: ميحايل شايدوروۆتىڭ چەمپيوندىق جولى
«سوڭعى ەكى كۇندە نە سەزىنىپ جۇرگەنىمدى سوزبەن جەتكىزۋ مۇمكىن ەمەس. ءالى دە ۇيىقتاعان جوقپىن, بىراق بارشاڭىزعا ۇلكەن ەنەرگيا جولداپ, زور العىسىمدى ايتامىن», دەدى ميحايل شايدوروۆ.
ايتا كەتەيىك, ديماش قۇدايبەرگەن ەرلەر اراسىنداعى مانەرلەپ سىرعاناۋدان وليمپيادا چەمپيونى ميحايل شايدوروۆتى ميلاندا وتكەن قىسقى وليمپياداداعى جەڭىسىمەن قۇتتىقتاپ, سپورتشىعا اۆتوكولىك سىيلايتىنىن ايتقان ەدى.