كەشە قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىندا «مەملەكەتتىك باسقارۋداعى جوبا-مەنەدجمەنت» تاقىرىبىنداعى ءۇش كۇندىك سەمينار باستالدى. ول «ا» كورپۋسىنداعى مەملەكەتتىك قىزمەتشىلەردىڭ جوبالاردى باسقارۋدىڭ ماڭىزدى ەلەمەنتتەرىن ۇيرەنۋلەرىنە ارنالدى.
سەمينارعا ەلىمىزدىڭ ورتالىق جانە جەرگىلىكتى اتقارۋشى ورگاندارىندا قىزمەت اتقاراتىن «ا» كورپۋسىنىڭ مەملەكەتتىك قىزمەتشىلەرى قاتىسىپ جاتىر. اكادەميا رەكتورى بولاتبەك ءابدىراسىلوۆ ءوزىنىڭ قۇتتىقتاۋ سوزىندە سەميناردىڭ ماڭىزدىلىعى مەن وزەكتىلىگىن, مەملەكەتتىك قىزمەتشىلەرگە حالىقارالىق تاجىريبەنى نەگىزگە الا وتىرىپ, جوبا-مەنەدجمەنتتىڭ تەتىكتەرى مەن تەحنولوگيالارىن جان-جاقتى زەردەلەۋگە مۇمكىندىك بەرەتىنىنە توقتالدى. ول سونىمەن بىرگە قاتىسۋشىلاردىڭ قۇرىلىمدىق جوبا-مەنەدجمەنت پەن PRINCE2 جۇيەسىنىڭ قاعيداتتارىن ۇعىنۋ ارقىلى جوبالارعا جانە مەملەكەتتىك سەكتورداعى جوبالاردى باسقارۋ كەزەڭدەرىنە ەلەۋلى ۇلەس قوسا الاتىندىعىن اتاپ ءوتتى.
سەميناردى ۇلىبريتانيادان كەلگەن جەتەكشى حالىقارالىق ساراپشى پول ەنتوني برەدلي جۇرگىزۋدە. ول SPOCE Project Management Ltd باس ديرەكتورى بولىپ قىزمەت اتقارادى. ال PRINCE2 جۇيەسى بويىنشا جوبا-مەنەدجەنتتى ەنگىزۋ سالاسىندا 20 جىلدان اسا جۇمىس تاجىريبەسى بار.
سەمينار بارىسىندا جوبالاردى باسقارۋ كەزىندە ماڭىزدى شەشىمدەر قابىلداۋ ساتتەرى, PRINCE2 قۇرىلىمى, جەتىستىككە جەتۋ كريتەريلەرى, سونداي-اق جوبالاردى باسقارۋ, اتاپ ايتقاندا جوبالىق كوميسسياعا تاعايىنداۋ كەزىندەگى باستى ەلەمەنتتەر قاراستىرىلادى. قاتىسۋشىلار جوبا-مەنەدجمەنتتىڭ دەڭگەيلەر جۇيەسىنىڭ ديزاينىن كريتەريلەرىمەن بىرگە تالقىلايتىن بولادى.
قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىندا قۇرىلعان جوبالىق باسقارۋ ورتالىعى مەملەكەتتىك قىزمەتشىلەر ءۇشىن ءتيىستى وقىتۋ باعدارلامالارىن ازىرلەۋمەن, سونداي-اق, جوبالىق مەنەدجمەنت قاعيداتتارىن مەملەكەتتىك باسقارۋ جۇيەسىنە ەنگىزۋ ماسەلەلەرىن زەرتتەۋمەن اينالىسادى.
سەرىك ءپىرنازار,
«ەگەمەن قازاقستان».