كەشە ۇكىمەت ۇيىندە پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ استاناعا جۇمىس ساپارىمەن كەلگەن قىتاي كوممۋنيستىك پارتياسىنىڭ وك ساياسي بيۋروسى تۇراقتى كوميتەتىنىڭ مۇشەسى, قحر مەملەكەتتىك كەڭەسىنىڭ ۆيتسە-پرەمەرى چجان گاوليمەن كەزدەسىپ, كەلىسسوز جۇرگىزدى.
«قىتاي قاشاندا ءبىزدىڭ سىرتقى ساياساتىمىزداعى ەڭ ماڭىزدى باسىمدىقتارىمىزدىڭ ءبىرى بولىپ كەلدى جانە بولا بەرمەك. ەكى ەل اراسىنداعى ءوزارا قاتىناس جاڭا دەڭگەيگە كوتەرىلىپ, جان-جاقتى ستراتەگيالىق سيپاتقا يە بولدى. ءبىزدىڭ ورتاق جەتىستىگىمىزدىڭ كەپىلى جوعارى دەڭگەيدەگى ساياسي ديالوگ بولدى», دەپ اتاپ ءوتتى ب.ساعىنتاەۆ كەزدەسۋ بارىسىندا.
پرەمەر-ءمينيستردىڭ ءبىرىنشى ورىنباسارىنىڭ ايتۋىنشا, قازاقستان پرەزيدەنتى نۇرسۇلتان نازارباەۆتىڭ «نۇرلى جول» جاڭا ەكونوميكالىق ساياساتى مەن قحر توراعاسى سي ءتسزينپيننىڭ «ءبىر بەلدەۋ, ءبىر جول» باستاماسى ءبىرىن ءبىرى ۇيلەسىمدى تولىقتىرىپ, ەكى ەلدىڭ ءوزارا ءتيىمدى ارىپتەستىگىنە جاڭا پەرسپەكتيۆالار اشادى.
كەلىسسوزدەر بارىسىندا تاراپتار ەكىجاقتى ىنتىماقتاستىق ماسەلەسىن تالقىلادى. اتاپ ايتقاندا, وندىرىستىك قۋاتتاردى قحر-دان قازاقستانعا كوشىرۋ, اۋقىمدى كولىك جوبالارى اياسىنداعى ءىس-قيمىل, ترانسشەكارالىق سۋ رەسۋرستارىن پايدالانۋ, ەنەرگەتيكا, اۋىل شارۋاشىلىعى سالالارىنداعى ىنتىماقتاستىق, سونداي-اق, قىتايعا ءداستۇرلى قازاقستاندىق ونىمدەر ەكسپورتىن (مىس, فەرروحروم, تەمىر كەندى تۇيىرشىكتەر, بولات پروكاتى جانە ت.ب.) ۇلعايتۋ ماسەلەلەرى قارالدى.
قىتايدىڭ شىعىس جانە وڭتۇستىك-شىعىس پروۆينتسيالارىنىڭ جوعارى ەكونوميكالىق جانە ينۆەستيتسيالىق الەۋەتىن, سونداي-اق, شۇار-ءدىڭ ەكونوميكالىق ماڭىزدىلىعى ارتىپ كەلە جاتقانىن ەسكەرە وتىرىپ, قازاقستان قر مەن قحر وڭىرارالىق ىنتىماقتاستىق فورۋمىن قۇرۋدى ۇسىنادى.
ب.ساعىنتاەۆ پەن چ.گاولي مادەني-گۋمانيتارلىق سالادا, ستۋدەنتتەرمەن جانە تاعىلىمدامادان وتۋشىلەرمەن الماسۋدا ەكى ەل اراسىنداعى ىنتىماقتاستىق نىعايا تۇسكەنىنە توقتالدى. قازىرگى تاڭدا قىتايدىڭ جوعارى وقۋ ورىندارىندا 12 مىڭعا جۋىق قازاقستاندىق ستۋدەنتتەر مەن وقۋشىلار ءبىلىم الۋدا. 2015-2016 وقۋ جىلىنا قىتايلىق تاراپ قازاقستاندىقتارعا ارناپ 59 گرانت ءبولىپ وتىر. قازاقستان وتاندىق جوو-لاردا ءبىلىم الۋ ءۇشىن 83 گرانت ءبولدى.