الماتىداعى №2 قالالىق پەريناتالدىق ورتالىعىنىڭ دارىگەرلەرى اناسىنىڭ قۇرساعىنا بىتكەنىنە 27 اپتا تولعاندا دۇنيەگە كەلىپ قويعان قىز بالانى امان الىپ قالدى, دەپ حابارلايدى Egemen.kz.
بولاشاق انا امنيوتيكالىق سۇيىقتىقتىڭ مەرزىمىنەن كەتۋىنە بايلانىستى ورتالىققا شۇعىل تۇردە جەتكىزىلگەن. ۋلترادىبىستىق زەرتتەۋ ناتيجەسىندە ماماندار ىشتەگى نارەستەنىڭ ومىرىنە قاۋىپ ءتونىپ تۇرعانىن انىقتاپ, شۇعىل وتا جاساۋعا شەشىم قابىلدايدى.
كەسار تىلىگى ورتالىق ديرەكتورى سۆەتلانا راحيموۆا باستاعان دارىگەرلەر توبىنىڭ قاتىسۋىمەن جۇرگىزىلىپ, سالماعى نەبارى 730 گرامم بولاتىن قىز بالا دۇنيەگە كەلدى.
نارەستە ءومىرىنىڭ العاشقى ساتىنەن باستاپ جاڭا تۋعان بالالاردىڭ جانساقتاۋ جانە قارقىندى تەراپيا بولىمىندە بولدى. 28 كۇن بويى دارىگەرلەر مەن مەدبيكەلەر ونىڭ جاعدايى ءۇشىن تاۋلىك بويى كۇرەستى.
جاعدايى تۇراقتانعان سوڭ ءسابي كۇتىمنىڭ ەكىنشى كەزەڭىنە, ياعني جاڭا تۋعان نارەستەلەر پاتولوگياسى بولىمىنە اۋىستىرىلدى. وتباسى ورتالىقتا 56 كۇن بولدى. وسى ۋاقىت ىشىندە بالانىڭ سالماعى ەكى ەسەدەن استام ارتىپ, 1 800 گرامعا جەتتى.
ء«بىز بۇل جەرگە كۇتپەگەن جەردەن تۇستىك, ەشكىمدى تانىمايتىن ەدىك. الايدا العاشقى كۇننەن باستاپ شىنايى قامقورلىقتى سەزىندىك. دارىگەرلەر مەن مەدبيكەلەر قىزىمىزدىڭ دەنساۋلىعى مەن بولاشاعى ءۇشىن بار كۇشىن سالدى. ولاردىڭ كاسىبيلىگى مەن جانقيارلىعى ءبىزدى وتە ءتانتى ەتتى», دەپ بالانىڭ اناسى مەديتسينا قىزمەتكەرلەرىنە العىس ءبىلدىردى.
بۇل وقيعا ورتالىق ماماندارىنىڭ ەڭ نازىك پاتسيەنتتەرگە ومىرگە العاشقى قادام جاساۋعا كومەكتەسىپ جۇرگەن كۇندەلىكتى ەڭبەگىنىڭ تاعى ءبىر جارقىن مىسالى.
زاڭعار, ايبار, اسەل: الماتىدا ۇشەم دۇنيەگە كەلدى
ايتا كەتەيىك, الماتى قالاسىنىڭ №2 قالالىق پەريناتالدىق ورتالىعىنداعى بالالار رەانيماتسياسى بولىمشەسىندە سالماعى وتە تومەن بولىپ تۋعان, سونداي-اق تاۋلىك بويى قارقىندى تەراپيانى قاجەت ەتەتىن اۋىر حالدەگى جاڭا تۋعان نارەستەلەرگە مەديتسينالىق كومەك كورسەتىلەدى.
تۇركىستان وبلىسىندا الىپ ءسابي دۇنيەگە كەلدى
ورتالىق جۇمىس ىستەگەن جىلدار ىشىندە مىڭداعان بالانى امان الىپ قالدى. بولىمشە دارىگەرلەرى مەن مەدبيكەلەرى كۇندىز-ءتۇنى جاڭا تۋعان سابيلەردىڭ ءومىرى ءۇشىن كۇرەسىپ, زاماناۋي ەمدەۋ, كۇتىم جاساۋ جانە جاعدايىن باقىلاۋ ادىستەرىن قولدانادى.