ءال-فارابي اتىنداعى قازاق ۇلتتىق ۋنيۆەرسيتەتىندە جاڭا كونستيتۋتسيا جوباسىن تالقىلاۋعا ارنالعان اكادەميالىق تىڭداۋلار ءوتتى, دەپ حابارلايدى Egemen.kz.
ءىس-شاراعا پارلامەنت ءماجىلىسىنىڭ دەپۋتاتتارى ءۇنزيلا شاپاق, ەرمۇرات باپي, ەرلان سايروۆ, سۋديالار, مەملەكەتتىك ورگانداردىڭ وكىلدەرى, اكادەميالىق قاۋىمداستىق مۇشەلەرى, جەتەكشى زاڭگەر-عالىمدار, سونداي-اق كونستيتۋتسيالىق قۇقىق سالاسىنداعى تاجىريبەلى ادۆوكاتتار مەن ساراپشىلار قاتىستى.
دوڭگەلەك ۇستەل وتىرىسىن قازۇۋ زاڭ فاكۋلتەتىنىڭ دەكانى ءۋاليحان احاتوۆ اشىپ, جاڭا كونستيتۋتسيا جوباسىنىڭ مازمۇندىق ءارى يدەيالىق وزەگى پرەامبۋلادا ايقىن كورىنىس تاپقانىن جەتكىزدى.
«جاڭارتىلعان پرەامبۋلا فورمالدى كىرىسپە ەمەس, مەملەكەتتىڭ رۋحاني-يدەيالىق تۇعىرى, كونستيتۋتسيانىڭ بۇكىل ءماتىنىن بىرىكتىرىپ تۇرعان قۇندىلىقتىق باعدار رەتىندە ۇسىنىلادى. ءدال وسى بولىمدە مەملەكەتتىڭ تاريحي جادى, قوعامدىق كەلىسىمگە دەگەن ۇمتىلىسى جانە بولاشاق دامۋدىڭ ستراتەگيالىق باعىتى جيناقتالعان», دەدى ءۋاليحان احاتوۆ.
اكادەميالىق تىڭداۋدا مەملەكەتتىك بيلىكتىڭ كونستيتۋتسيالىق نەگىزدەرىن نىعايتۋ,ادام قۇقىقتارى مەن بوستاندىقتارىنىڭ كەپىلدىگىن كەڭەيتۋ جانە قازىرگى قوعامدىق-ساياسي وزگەرىستەر جاعدايىندا قۇقىقتىق ينستيتۋتتاردىڭ ءرولىن ارتتىرۋ ماسەلەسى قاراستىرىلدى.
جيىندا دەپۋتات ءۇنزيلا شاپاق كونستيتۋتسياداعى وزگەرىستەر ازاماتتاردىڭ قۇقىقتارى مەن بوستاندىقتارىن قورعاۋدى كۇشەيتۋگە, مەملەكەتتىك باسقارۋ جۇيەسىن ودان ءارى جەتىلدىرۋگە باعىتتالعانىن ايتتى.
«جاڭا كونستيتۋتسيانىڭ جوباسى بۇقارالىق اقپارات قۇرالدارىنا جاريالانعاننان باستاپ قوعام اراسىندا كەڭىنەن تالقىلانۋدا. قازىردىڭ وزىندە كونستيتۋتسيالىق كوميسسيا تۇسكەن ۇسىنىستاردى قاراستىرىپ, جان-جاقتى تالداۋ جۇمىستارىن جۇرگىزىپ جاتىر. سوندىقتان ءالى دە جاڭا كونستيتۋتسياعا تولىقتىرۋلار مەن وزگەرىستەر ەنگىزىلەدى. وسى ورايدا, ۋنيۆەرسيتەتتىك عالىم-ساراپشىلارمەن بىرلەسىپ اكادەميالىق تىڭداۋلار وتكىزۋ اسا ماڭىزدى», دەدى دەپۋتات.
ءماجىلىس دەپۋتاتى ەرمۇرات باپي ءوز سوزىندە جاڭا كونستيتۋتسيا جوباسىن تالقىلاۋ قوعام ءۇشىن ايرىقشا ماڭىزدى كەزەڭ ەكەنىن اتاپ ءوتتى.
«كونستيتۋتسيا مەملەكەتتىڭ قۇقىقتىق قاڭقاسى عانا ەمەس, قوعام مەن بيلىكتىڭ ءوزارا سەنىمىنىڭ كەپىلى. سوندىقتان ۇسىنىلىپ وتىرعان وزگەرىستەر ەڭ الدىمەن ازاماتتاردىڭ قۇقىقتارى مەن بوستاندىقتارىن ناقتى قورعاۋعا, مەملەكەتتىك ينستيتۋتتاردىڭ جاۋاپكەرشىلىگىن ارتتىرۋعا باعىتتالۋى ءتيىس. بۇل رەتتە اكادەميالىق ورتا مەن زاڭگەر-عالىمداردىڭ ساراپتامالىق پىكىرى ەرەكشە ماڭىزعا يە. بۇل ساياسي ناۋقان ەلدىڭ بولاشاعىن ساقتاۋدا جاسالىپ جاتقان اۋقىمدى باستاما», دەدى ەرمۇرات باپي.
اكادەميالىق تىڭداۋلار كەزىندە زاڭ عىلىمىنىڭ دوكتورى, پروفەسسور الۋا يبراەۆا, زاڭ عىلىمىنىڭ كانديداتى, پروفەسسور لەيلا كۇلتەمىروۆا, الماتى قالاسى الاتاۋ اۋدانىنىڭ سۋدياسى تالعات داۋلەتنيازوۆ بايانداما جاسادى.
شارا بارىسىندا قاتىسۋشىلار جاڭا كونستيتۋتسيا جوباسىنىڭ نەگىزگى ەرەجەلەرىن جان-جاقتى ءارى كاسىبي تۇرعىدا تالقىلاپ, ۇسىنىلىپ وتىرعان وزگەرىستەر جونىندە تالداۋ جۇمىستارىن جۇرگىزدى. سونىمەن قاتار حالىقارالىق تاجىريبە مەن ۇلتتىق قۇقىقتىق داستۇرلەردى ەسكەرە وتىرىپ, عىلىمي نەگىزدەلگەن ۇسىنىستار ازىرلەدى.
ناتيجەسىندە جيناقتالعان ساراپتامالىق ۇسىنىمدار مەن تالدامالىق ماتەريالدار الداعى عىلىمي-تالدامالىق, ساراپتامالىق-كونسۋلتاتيۆتىك جانە قوعامدىق-اعارتۋشىلىق قىزمەتتە, سونداي-اق كونستيتۋتسيالىق قۇقىق پەن مەملەكەتتىك باسقارۋ سالاسىنداعى عىلىمي زەرتتەۋلەردى دامىتۋدا پايدالانۋ جوسپارلاندى.