قاسىم-جومارت توقاەۆ كونستيتۋتسيالىق كوميسسيا توراعاسى – كونستيتۋتسيالىق سوت توراعاسى ەلۆيرا ءازىموۆانى, كونستيتۋتسيالىق كوميسسيا توراعاسىنىڭ ورىنباسارى – مەملەكەتتىك كەڭەسشى ەرلان قاريندى جانە كونستيتۋتسيالىق كوميسسيا مۇشەسى – پرەزيدەنتتىڭ قۇقىقتىق ماسەلەلەر جونىندەگى كومەكشىسى ەرجان جيەنباەۆتى قابىلدادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
مەملەكەت باسشىسىنا كوميسسيانىڭ جاڭا كونستيتۋتسيا جوباسى بويىنشا بۇعان دەيىن اتقارعان جۇمىسى تۋرالى مالىمەت بەرىلدى.
ەلۆيرا ءازىموۆا حالىق قاراۋىنا ۇسىنىلعان جاڭا اتا زاڭ جوباسى جونىندە باياندادى. ونىڭ ايتۋىنشا, eGov جانە e-Otinish پورتالىنا جۇرتشىلىق تاراپىنان كەلىپ تۇسكەن وي-پىكىرلەر سانى 4 مىڭنان اسقان. ازاماتتار جوبانى بۇگىنگى تالاپ-تىلەكتەر مەن قوعام مۇددەسىنە ساي كەلەدى دەپ تانيدى. ساياسي پارتيالار, رەسپۋبليكالىق جانە وڭىرلىك قوعامدىق ۇيىمدار جاڭا كونستيتۋتسيا جوباسىنا قولداۋ ءبىلدىردى.
پرەزيدەنت كونستيتۋتسيالىق كوميسسيا جۇمىسى اشىق فورماتتا جالعاسا بەرۋگە ءتيىس ەكەنىن اتاپ ءوتتى. بۇل ازاماتتاردىڭ تالقىلاۋ بارىسىنان حاباردار بولىپ, جوبا مازمۇنىمەن ەگجەي-تەگجەيلى تانىسۋىنا مۇمكىندىك بەرەدى.
قاسىم-جومارت توقاەۆ ساراپشىلار مەن قوعام وكىلدەرى جولداعان ۇسىنىستاردىڭ بارلىعىن ءجىتى تالداۋدى تاپسىردى.
ەلۆيرا ءازىموۆا كونستيتۋتسيالىق كوميسسيا مۇشەلەرى جاڭا كونستيتۋتسيا جوباسىنىڭ جەكەلەگەن باپتارى مەن تارماقتارىن رەداكتسيالاپ جاتقانىن ايتتى. كوميسسيانىڭ كەزەكتى وتىرىستارى ەرتەڭ, ياعني 7 اقپاندا جانە كەلەسى اپتادا وتەدى.