گەولوگيالىق بارلاۋ ستراتەگياسىن ىسكە اسىرۋ مەملەكەت باسشىسىنىڭ ەلدىڭ رەسۋرستىق بازاسىن كەڭەيتۋ جونىندەگى العا قويعان مىندەتتەرى شەڭبەرىندە جۇرگىزىلەدى. اتىراۋ وبلىسىنداعى «قاراتون پودسولەۆوي» ۋچاسكەسىندە جۇرگىزىلگەن تەرەڭ بارلاۋ جۇمىستارى وڭ ناتيجە كورسەتتى. ۇڭعىمانىڭ ءبىرىنشى نىسانىن سىناقتان وتكىزۋ كەزىندە بۇل جەردەن گاز اعىنى شىقتى. بۇل – ەلىمىزدىڭ مۇناي-گاز سالاسىنداعى ماڭىزدى ستراتەگيالىق جەتىستىك.
اتالعان ۇڭعىمانى بۇرعىلاۋ 2024 جىلدىڭ قاراشاسىندا باستالىپ, 2025 جىلدىڭ جەلتوقسان ايىندا 5750 مەتر تەرەڭدىكتە اياقتالدى. مۇنداي تەرەڭ گەولوگيالىق بارلاۋ جۇمىستارى تەحنولوگيالىق جاعىنان كۇردەلى سانالادى. اسىرەسە تىم جوعارى قابات قىسىمى مەن كۇكىرتتى سۋتەكتىڭ بولۋى ساقتىق شارالارىن كۇشەيتىپ, قاۋىپسىزدىك تالاپتارىن قاتاڭ ساقتاۋدى قاجەت ەتەدى. الايدا ارنايى تەحنولوگيالىق شەشىمدەردىڭ ارقاسىندا ماماندار بۇل بەلەستى دە باعىندىرىپ, مەملەكەتتىڭ دامۋى ءۇشىن ماڭىزدى ناتيجەگە قول جەتكىزدى.
«قاراتون پودسولەۆوي» — «قازمۇنايگازدىڭ» ستراتەگيالىق بارلاۋ جوبالارىنىڭ ءبىرى. ول ەلىمىزدىڭ رەسۋرستىق قورىن تولىقتىرۋ ءۇشىن قولعا الىنعان ءارى جەر استىندا تەرەڭ ورنالاسقان كۇردەلى قازبانى زەرتتەۋگە باعىتتالعان. ۇڭعىمانىڭ العاشقى نىسانىنداعى سىناق ناتيجەلەرى بۇل جەردە كومىرسۋتەك قورى بار ەكەنىن راستاپ وتىر.
گەولوگيالىق بارلاۋ جۇمىستارىن جاڭا دەڭگەيگە كوتەرۋدى ماقسات ەتكەن ماڭىزدى جوبا جاقسارتىلعان مودەلدىك كەلىسىمشارت اياسىندا جۇزەگە اسىرىلىپ كەلەدى. بۇل ەل ۇكىمەتىنىڭ جەر قويناۋىن پايدالانۋ سالاسىنداعى قولعا العان باستى رەفورمالاردىڭ ءبىرى. ول ەلىمىزدىڭ كۇردەلى كەن ورىندارىنا دەگەن ينۆەستيتسيالىق تارتىمدىلىقتى ەدəۋىر ارتتىرادى. بۇل تەتىك جەر قويناۋىنىڭ كۇردەلى ۋچاسكەلەرىن بارلاۋ مەن تەرەڭ يگەرۋگە جاعداي جاساي وتىرىپ, ماڭىزدى رەتتەۋشى ءəرى فيسكالدى پرەفەرەنتسيالاردى ۇسىنادى.
ۇڭعىمانى زەرتتەۋ جۇمىستارى وسىمەن توقتاپ قالمايدى. جۇمىس جوسپارىنا سəيكەس الداعى ۋاقىتتا تاعى بولاشاعى زور ءتورت مۇنايلى-گازدى نىساندا سىناق جۇرگىزۋ كوزدەلگەن.