جاڭا كونستيتۋتسيا جوباسى جاريالانعاننان كەيىن ەلىمىزدە جالعان اقپارات پەن ارانداتۋشىلىق سيپاتتاعى حابارلامالاردىڭ ارتقانى بايقالىپ وتىر, دەپ حابارلايدى Egemen.kz ىشكى ىستەر مينيسترلىگىنە سىلتەمە جاساپ.
ىشكى ىستەر مينيسترلىگى جالعان اقپارات پەن ارانداتۋشىلىق ءۇشىن جاۋاپكەرشىلىك بار ەكەنىن ەسكەرتتى.
«قوعامدىق كەڭىستىكتە, ونىڭ ىشىندە قازاقستان رەسپۋبليكاسى جاڭا كونستيتۋتسياسىنىڭ جوباسىنا قاتىستى, فاكتىلەردى ادەيى بۇرمالاۋ جانە جالعان مالىمەتتەر تاراتۋ جاعدايلارى تىركەلۋدە. مۇنداي ارەكەتتەر ازاماتتاردى جاڭىلىستىرىپ, قوعامدىق تۇراقتىلىققا قاۋىپ توندىرەدى», دەپ ەسكەرتتى مينيسترلىك.
مىسالى, الماتى قالاسىنىڭ تۇرعىنى ينتەرنەتتە جاڭا كونستيتۋتسيا جوباسىندا جەردى شەتەلدىكتەرگە ساتۋعا تىيىم الىنىپ تاستالدى دەگەن جالعان اقپارات تاراتقان.
ىشكى ىستەر مينيسترلىگى دەپارتامەنتىنىڭ باستىعى – رەسمي وكىلى شىڭعىس الەكەشەۆتىڭ ايتۋىنشا, بۇل مالىمەتتەر شىندىققا سايكەس كەلمەيدى جانە ولاردى جالعان اقپاراتقا قارسى ءىس-قيمىل ورتالىعى رەسمي تۇردە جوققا شىعارعان.
وسىعان بايلانىستى اتالعان ازامات جالعان اقپارات تاراتقانى ءۇشىن جاۋاپكەرشىلىككە تارتىلدى.
سونداي-اق, اباي وبلىسىندا سەمەي قالاسىنىڭ تۇرعىنى جاڭا كونستيتۋتسيا جوباسىندا مەملەكەتتىڭ ۋنيتارلىعى مەن اۋماقتىق تۇتاستىعىنا كۇمان كەلتىرەتىن تۇزەتۋلەر بار دەگەن جالعان اقپارات جاريالاعانى ءۇشىن جاۋاپكەرشىلىككە تارتىلدى. شىن مانىندە, بۇل قاعيداتتار جاڭا كونستيتۋتسيا جوباسىندا كەرىسىنشە تىكەلەي بەكىتىلىپ, كۇشەيتىلگەن.
ىشكى ىستەر مينيسترلىگى كونستيتۋتسيا جوباسىن تالقىلاۋ, ازاماتتاردىڭ ءوز پىكىرلەرى مەن ۇستانىمدارىن ءبىلدىرۋى زاڭ بۇزۋشىلىققا جاتپايتىنىن ەسكە سالادى.
جاۋاپكەرشىلىك تەك قانا كورىنەۋ جالعان اقپارات تاراتۋ جانە فاكتىلەردى ادەيى بۇرمالاۋ ءۇشىن كوزدەلگەن.
قازىرگى ۋاقىتتا, ازاماتتاردى جاڭىلىستىرۋعا جانە قوعامدىق احۋالدى تۇراقسىزداندىرۋعا باعىتتالعان وزگە دە جالعان اقپارات تاراتۋ فاكتىلەرى انىقتالۋدا.
ء«بىز ازاماتتاردى سىن تۇرعىسىنان ويلاۋعا, ارانداتۋعا ەرمەۋگە جانە تەك رەسمي ءارى تەكسەرىلگەن اقپارات كوزدەرىنە سۇيەنۋگە شاقىرامىز. ىشكى ىستەر مينيسترلىگى جاعدايدى تولىق باقىلاۋدا ۇستاپ وتىر جانە كەز كەلگەن تۇراقسىزداندىرۋ ارەكەتتەرىنە قاتاڭ دەن قويادى», دەپ اتاپ ءوتتى شىڭعىس الەكەشەۆ.
ىشكى ىستەر مينيسترلىگى كورىنەۋ جالعان اقپارات تاراتۋ مەن ارانداتۋشىلىق ارەكەتتەر, سەبەپ-سالدارىنا قاراماستان, قازاقستان رەسپۋبليكاسىنىڭ زاڭناماسىنا سايكەس قىلمىستىق جانە اكىمشىلىك جاۋاپكەرشىلىككە اكەپ سوعاتىنىن اتاپ ءوتتى.
ايتا كەتەيىك, 31 قاڭتار كۇنى الەۋمەتتىك جەلىلەردە قازاقستان جەرىن شەتەلدىكتەرگە ساتۋ تۋرالى اقپارات تاراعان ەدى. الايدا, جالعان اقپاراتقا قارسى ءىس-قيمىل ورتالىعى قازاقستان جەرىن شەتەلدىكتەرگە ساتۋ تۋرالى تاراعان اقپاراتتىڭ شىندىققا جاناسپايتىنىن, فاكتىلەردىڭ بۇرمالانعانىن مالىمدەدى.