قورعانىس ءمينيسترى, اۆياتسيا گەنەرال-لەيتەنانتى داۋرەن قوسانوۆتىڭ بۇيرىعىمەن ەلىمىزدىڭ بارلىق اسكەري بولىمىندە بىرىڭعاي اشىق ەسىك كۇنى ءوتىپ, وعان ساربازداردىڭ 4000-نان استام تۋعان-تۋىسى جينالدى. قوناقتارعا قارۋ-جاراق پەن اسكەري تەحنيكا كورمەلەرى ۇيىمداستىرىلىپ, اتا-انالار ۇلدارىنىڭ جاعدايىن كوزبەن كوردى, دەپ جازادى Egemen.kz.
كەلۋشىلەرگە تاربيە جۇمىسىن ۇيىمداستىرۋ مەن اسكەري ءتارتىپتى ساقتاۋ بويىنشا قورعانىس ۆەدومستۆوسى تاراپىنان قابىلدانىپ جاتقان شارالار تۋرالى جان-جاقتى اقپارات بەرىلدى. سونىمەن قاتار قارۋ قولدانۋ, ساباقتار مەن جاتتىعۋلار وتكىزۋ كەزىندەگى قاۋىپسىزدىك قالاي قامتاماسىز ەتىلەتىنى ەگجەي-تەگجەيلى ءتۇسىندىرىلدى. قوناقتار كازارمالاردى ارالاپ, جاتىن بولمەلەر مەن تۇرمىستىق ايماقتاردى كوردى.
ەڭ ماڭىزدى ءساتتىڭ ءبىرى – اشىق ەسىك كۇنىنە كەلگەن سارباز تۋىستارى اسحانا مازىرىمەن تانىسىپ قانا قويماي, سول جەردەن ءدام تاتىپ, بىرگە تۇسكى اس ءىشۋى بولدى. ءمانى ايرىقشا بۇل كەزدەسۋ اتا-انالارعا ەرەكشە اسەر ەتتى.
اسكەري بولىمدەردە بولعان جاس قوناقتاردى دا ەرەكشە اتاپ وتكەن ءجون. تاراز قالاسىنان كەلگەن ون جاسار الەنا «وڭتۇستىك» وڭىرلىك قولباسشىلىعىنا قاراستى بايلانىس پولكىندە قىزمەت ەتەتىن اعاسى ۆلاديمير رومانوۆتى كورىپ, ءماز-مايرام بولدى. اسكەري بولىمگە جاسالعان بۇل ساپار مەكتەپ وقۋشىسىنا زور اسەر قالدىرىپ, اعاسىنا دەگەن ماقتانىش سەزىمىن وياتقانى ءسوزسىز.
گۆاردەيسك گارنيزونىنداعى تانك بريگاداسىنىڭ بارلاۋ باتالونىندا قىزمەت ەتەتىن ايبار كاليفانوۆتىڭ ءۇش جاسار ءىنىسى امىرە اعاسىنىڭ قولىنان تۇسكەن جوق. ۇرپاقتان ۇرپاققا جالعاساتىن اسكەري ءداستۇر ءدال وسىلاي قالىپتاسسا كەرەك.
ەلورداداعى بريگاداداعا قاراعاندى, شىمكەنت, قىزىلوردا, قوستاناي جانە استانا قالالارىنان 170-تەن استام اتا-انا جينالدى. ولار ءتيردى, سپورت زالىن, كىتاپحانانى ارالاپ, جاۋىنگەرلەر جاتتىعاتىن تاكتيكالىق الاڭدى كورىپ, تانىسىپ شىقتى. قاتارداعى جاۋىنگەر دياس بازكەنوۆتىڭ اكەسى اسحات پەن ونىڭ تۋعان اعاسى ءسابيت بازكەنوۆ قاراعاندى قالاسىنان ارنايى كەلگەن. جاۋىنگەرلىك جارىستىڭ جەڭىمپازى اتانعان دياس بازكەنوۆتىڭ سۋرەتى بولىمشەنىڭ قۇرمەت تاقتاسىنا ىلىنگەن.
ءسابيت بازكەنوۆتىڭ ءوزى كەزىندە تاجىك-اۋعان شەكاراسىندا اسكەري بورىشىن وتەگەن. ول قازىرگى اسكەردىڭ جاعدايىن كورىپ, ەرەكشە اسەر العانىن ايتتى.
ء«بىز تاجىك-اۋعان شەكاراسىندا قىزمەت اتقارعاندا, ول كەزدىڭ قيىندىعى از بولعان جوق. بۇگىنگى جاستاردىڭ اسكەري بورىشىن ابىرويمەن وتەپ جۇرگەنىن كورىپ, كوڭىلىم مارقايدى. دياس سياقتى ءتارتىپتى, نامىستى ۇلدار ەلدىڭ قورعانى بولارى ءسوزسىز. جاستارعا ايتارىم – وتان الدىنداعى بورىشتى ادال وتەپ, اسكەري تارتىپكە ءاردايىم بەرىك بولسىن», دەدى ول.
اقتاۋ گارنيزونىنىڭ اسكەري بولىمدەرى 400-دەن استام قوناقتى قابىلدادى. اسكەري-تەڭىز كۇشتەرىنىڭ ارتەكتى كەمەلەر ديۆيزيونىندا اتا-انالار تەڭىز قىزمەتىنىڭ اتموسفەراسىنا قانىقتى. ولار ماتروستاردىڭ تۇرمىسىمەن تانىسىپ, كايۋت-كومپانيالار مەن كامبۋزدى ارالادى.
تەڭىز جاياۋ اسكەرلەرى بريگاداسىندا اتا-انالاردىڭ قاتىسۋىمەن سپورتتىق جارىستار ءوتتى. ماڭعىستاۋ وبلىسى مەن اقتاۋ قالاسى بويىنشا «انالار جۇرەگى» سارباز انالارى كوميتەتىنىڭ ءتورايىمى گۇلميرا جانىسباەۆا جارىستىڭ باستاماشىسى بولدى.
دەسانتتىق-شابۋىلداۋ اسكەرلەرىنىڭ بولىمشەلەرى دە 400-دەن استام قوناقتى قارسى الدى. 37-دەسانتتىق-شابۋىلداۋ بريگاداسىندا قوناقتارعا ءپاراشيۋتتى قالاي كيۋ كەرەكتىگى كورسەتىلىپ, ارنايى كەشەندە اۋە-دەسانتتىق دايىندىق ەلەمەنتتەرى تانىستىرىلدى.