«Greenhouse-Qaztomat» جىلىجاي كەشەنى – ورتالىق ازياداعى ەڭ ءىرى ءارى وڭىردەگى اۋقىمدى جوبانىڭ ءبىرى. مۇندا جىل سايىن شامامەن 15 مىڭ توننا قىزاناق پەن قيار ءوسىرىلىپ, ءونىم ىشكى نارىققا دا, ەكسپورتقا دا جونەلتىلەدى.
ەكىباستۇزداعى «Greenhouse-Qaztomat» جىلىجاي كەشەنى باسشىلىعى جۋىقتا شارۋاشىلىقتى كەڭەيتۋ جوسپارىن تانىستىردى. ايتۋلارىنشا, جوباعا سالىناتىن جالپى ينۆەستيتسيا كولەمى – 10,7 ملرد تەڭگە. جوبانى ىسكە اسىرۋ ناتيجەسىندە كەشەن اۋماعى 10 گەكتارعا ۇلعايىپ, جىلدىق ءونىم كولەمى 20 مىڭ توننادان اسپاقشى. جاڭا جىلىجايدى ىسكە قوسۋ جەلتوقسان ايىنا جوسپارلانعان. قازىرگى ۋاقىتتا كاسىپورىندا 450 ادام ەڭبەك ەتسە, كەڭەيتۋ اياسىندا قوسىمشا 120 جاڭا جۇمىس ورنى اشىلادى. كومپانيا جەرگىلىكتى كادرلارعا باسىمدىق بەرىپ, باسەكەگە قابىلەتتى جالاقى مەن كاسىبي ءوسۋ مۇمكىندىگىن ۇسىنىپ وتىر.
جالپى, ەكىباستۇزدىق جىلىجايداعى كوكونىستەر جاساندى جارىقتاندىرۋ ارقىلى گوللاند تەحنولوگياسىمەن قورعالعان توپىراقتا وسەدى. ال تۇقىم تولىقتاي نيدەرلاندتان, وسىمدىكتەردى توزاڭداندىرۋعا ارنالعان ارالار انگليادان جەتكىزىلىپ وتىر. تىڭايتقىشتار دا شەتتەن ساتىپ الىنادى. تەك ءوسىپ شىققان ءونىم عانا وتاندىق سانالادى. بۇل دا جىلىجاي شارۋاشىلىعى ءۇشىن – ماڭىزدى ماسەلە.
مۇنداعى ونىمدەر نارىقتا ۇزاق ۋاقىتقا ساقتالاتىن قاسيەتىمەن تانىمال. ماسەلەن, قىزاناق ءونىپ شىققان سوڭ 12 اي بۇزىلمايدى. ەكىباستۇزدىڭ قىزاناقتارى ەلىمىزدەگى «Small» جانە «Magnum» سياقتى ءىرى ساۋدا جەلىلەرىندە تۇراقتى ساتىلادى. كوكونىستەر وبلىستاعى الەۋمەتتىك دۇكەندەردە دە قولجەتىمدى باعامەن شىعىپ وتىر: قياردىڭ كيلوسى – 980 تەڭگە, قىزاناق – 925 تەڭگە.
پاۆلودار وبلىسى,
ەكىباستۇز قالاسى