بۇل ونىڭ وسى قىزمەتكە ءۇشىنشى مارتە كەلۋى. وسىعان دەيىن وتاندىق مامان 2016–2017, 2020–2022 جىلدارى كومانداعا جەتەكشىلىك ەتتى. ودان بولەك, «ەسىل-بوگاتىر», «اقسۋ», «ەرتىس», «اقجايىق» كلۋبتارى مەن ەلىمىزدىڭ جاستار قۇراماسىن جاتتىقتىردى. بىلتىر تالعات مارۋان ۇلى بىلتىر باس باپكەردىڭ مىندەتىن اتقارۋشى قىزمەتىنە كەلگەن كەزدەن بەرى فۋتبولشىلارىمىز الەم چەمپيوناتىنىڭ ىرىكتەۋ تۋرنيرىندە ليحتەنشتەيندى (4:0) ۇتىپ, سولتۇستىك ماكەدونيا (1:1) مەن بەلگياعا (1:1) قارسى كەزدەسۋدى تەڭ اياقتادى.
ەلىمىزدىڭ تاۋ شاڭعىشىسى الەكساندرا سكوروحودوۆا پوتستسە-دي-فاسسە قالاسىندا جالاۋى جەلبىرەگەن يتاليانىڭ اشىق بىرىنشىلىگىن كۇمىس مەدالمەن قورىتىندىلادى. سلالومشىلاردىڭ سايىسىندا جەرگىلىكتى سپورتشى فرانچەسكا فانتي توپ جارسا, ونىڭ وتانداسى ۆالەنتينا فيلل ءۇشىنشى ورىنعا تابان تىرەدى.
بۇل كۇندەرى پولشانىڭ ياكۋشيتسەسىندە پاراشاڭعىدان الەم كۋبوگىنىڭ كەزەڭدىك سايىسى ءوتىپ جاتىر. 1 000 مەترلىك سپرينتتە ەربول حاميتوۆ كۇمىس مەدال يەلەندى. ول امەريكالىق دجوشۋا سۋنيدەن عانا قالىپ قويدى. قولا جۇلدە ۋكراينالىق پاۆلو بەلگە بۇيىردى. 6 شاقىرىمدىق سايىستا دا قانداسىمىز مارە سىزىعىن ەكىنشى بولىپ قيدى.
وزبەكستاندا تۋىپ-وسكەن بىلعارى قولعاپ شەبەرى سايات ءىلياسوۆ جۋىردا ەلىمىزگە قونىس اۋداردى. ول 2022 جىلى جاستار اراسىنداعى ازيا بىرىنشىلىگىندە قولا مەدالدى يەلەنىپ, قۇرلىق بىرىنشىلىگىندە (U-22) باس جۇلدەنى قانجىعاسىنا بايلادى. بىلتىر IBA-نىڭ مۇرىندىق بولۋىمەن دۋبايدا ۇيىمداستىرىلعان ەرەسەكتەردىڭ الەمدىك دوداسىنا قاتىسىپ, ەكىنشى كەزەڭدە جەڭىلىس تاپتى. ەندى سايات ەلىشىلىك جارىستاردا ماڭعىستاۋ وبلىسى اتىنان سىنعا تۇسەدى.