بۇگىن مەملەكەت باسشىسى قاسىم-جومارت توقاەۆ ۆولونتەرلەر فورۋمىندا ءسوز سويلەدى. پرەزيدەنت ءوز سوزىندە كورپوراتيۆتىك ەرىكتىلەر قوزعالىسىن دامىتۋ ماڭىزدى مىندەت ەكەنىن اتاپ ءوتىپ, بيزنەس وكىلدەرىن وسى باعىتتاعى جوبالارعا بارىنشا قولداۋ كورسەتۋگە شاقىردى, دەپ جازادى Egemen.kz.
مەملەكەت باسشىسى بيزنەس الەۋمەتتىك جاۋاپكەرشىلىكتى سەزىنە بىلۋگە ءتيىس ەكەنىن ايرىقشا اتاپ ءوتتى.
«كورپوراتيۆتىك ەرىكتىلەر قوزعالىسىن دامىتۋ – وتە ماڭىزدى مىندەت. بيزنەس الەۋمەتتىك جاۋاپكەرشىلىكتى سەزىنە بىلۋگە ءتيىس. مەملەكەتىمىز ۇلتتىق بۋرجۋازيانى ۇنەمى قولداۋدا, ال ءبىزدىڭ كاسىپكەرلەر حالقىمىزعا قامقور بولىپ, ءاردايىم كومەكتەسۋى كەرەك. تاريحتا مۇنداي مىسالدار از ەمەس. باقۋاتتى ازاماتتار مەكتەپ سالىپ, وقۋ-اعارتۋ ءىسىن دامىتۋعا ۇلەس قوسقان. كىتاپتار, گازەت-جۋرنالدار شىعارۋعا, حالىقتىڭ ساۋاتىن اشۋعا زور ەڭبەك سىڭىرگەن. ءبىر سوزبەن ايتقاندا, ۇلتتىڭ بويىندا, بولمىسىندا جاڭا قاسيەتتەر قالىپتاستىرۋعا بەلسەنە اتسالىسقان», دەدى پرەزيدەنت.
قاسىم-جومارت توقاەۆ قازىر دە كوپتەگەن جومارت جاندى ازاماتتار بار ەكەنىنە نازار اۋداردى.
قاسىم-جومارت توقاەۆ ۆولونتەرلەر فورۋمىندا ءسوز سويلەدى
«ولار قايىرىمدىلىق جانە باسقا دا الەۋمەتتىك ماڭىزى بار شارالارعا ەرىكتىلەردى كوپتەپ تارتاتىن بولدى. بيزنەس وكىلدەرى كورپوراتيۆتىك ۆولونتەرلىك قىزمەتكە نازار اۋدارىپ, وسى باعىتتاعى جوبالارعا بارىنشا قولداۋ كورسەتۋى كەرەك. قىزمەتكەرلەردىڭ قوعامدىق جۇمىسقا بەلسەنە اتسالىسۋىنا جاعداي جاساۋى قاجەت. مەملەكەت جۇرتقا جاقسىلىق جاساپ, قوعامدىق ىستەرگە ۇيىتقى بولىپ جۇرگەن كاسىپكەرلەردى قولدايدى. سوندىقتان مەن بىلتىر ارنايى «مەيىرىم» وردەنىن تاعايىنداۋ تۋرالى شەشىم قابىلدادىم. بۇل ماراپات حالىقتىڭ قامىن ويلايتىن وتانشىل ازاماتتارعا دەگەن شىنايى قۇرمەتتىڭ بەلگىسى بولماق», دەدى مەملەكەت باسشىسى.
پرەزيدەنت ۆولونتەرلەر فورۋمى ەلدىڭ تاعدىرى, ۇلتتىڭ بولاشاعى ايقىندالاتىن شەشۋشى ساتتە ءوتىپ جاتقانىنا توقتالدى.
«مەن بىلتىرعى جولداۋىمدا الداعى ساياسي جاڭعىرۋدىڭ نەگىزگى باعىتتارى تۋرالى ۇسىنىستارىمدى ايتتىم. بۇل باستامالار قوعامنىڭ كەڭ قولداۋىنا يە بولدى, ونى بۇكىل ەل بولىپ تالقىلادىق. جارتى جىلدان بەرى كونستيتۋتسيالىق رەفورماعا قاتىستى قىزۋ پىكىرتالاس ءجۇرىپ جاتىر. پارتيالاردان, دەپۋتاتتار مەن ساراپشىلاردان, زاڭگەرلەر مەن قوعام بەلسەندىلەرىنەن مىڭداعان ۇسىنىس كەلىپ ءتۇستى. وندا مەملەكەتتىڭ ينستيتۋتسيونالدىق نەگىزدەرىن وزگەرتۋدەن باستاپ, اتا زاڭنىڭ ءماتىنىن رەداكتسيالاۋعا دەيىن, وتە كوپ ماسەلە قامتىلدى. ازاماتتاردىڭ بەلسەندىلىگىن ەسكەرە وتىرىپ, مەن ۇلتتىق قۇرىلتايدىڭ قىزىلورداداعى وتىرىسىندا بىرقاتار باستامانى جۇرتشىلىقتىڭ نازارىنا ۇسىندىم. ونىڭ ءبارى بۇكىل مەملەكەتتى باسقارۋ جۇيەسىن ءتيىمدى, ورنىقتى ءارى تەڭگەرىمدى ەتۋدى كوزدەيدى. بارشا الەم وزگەرىپ, زامان ب ۇلىڭعىر بولىپ تۇرعان قازىرگى الماعايىپ كەزەڭدە, بۇل – وتە ماڭىزدى ماسەلە», دەدى قاسىم-جومارت توقاەۆ .
ايتا كەتەيىك, قازىر ەلىمىزدە ۆولونتەرلەر سانى 300 مىڭعا جەتكەن.
سونداي-اق پرەزيدەنت ۆولونتەردىڭ تسيفرلى پاسپورتىن جاساۋ تۋرالى ۇسىنىسقا قولداۋ ءبىلدىردى.