ءاردايىم جاڭاشىلدىققا باسا نازار اۋدارىپ, ستۋدەنتتەردىڭ الاڭسىز ءبىلىم الۋىنا, دەنساۋلىعىن شىڭداپ, سالاۋاتتى ءومىر سالتىن ۇستانۋىنا ۇنەمى نازار اۋداراتىن شاكارىم ۋنيۆەرسيتەتىندە تاعى ءبىر قۋانىشتى جاڭالىقتىڭ لەبى ەستى, دەپ جازادى Egemen.kz.
وقۋ ورداسىنىڭ №1 سپورت كەشەنىندە داستۇرگە اينالعان سپارتاكيادانىڭ سالتاناتتى اشىلۋىمەن قاتار زامان تالابىنا ساي جاڭارتىلعان باسسەيننىڭ تۇساۋ كەسىلدى.
ەرتەدەن «سەمەي – ستۋدەنتتەر قالاسى» اتانعانىن ەسكەرسەك, ءبىلىم الۋشى جاستاردىڭ يگىلىگىنە بەرىلگەن بۇل سپورتتىق نىساندا بارلىق قاجەتتى جاعداي ەسكەرىلگەن.
بيىل جامبىل وبلىسىندا 13 سپورت كەشەنى اشىلادى
شاكارىم ۋنيۆەرسيتەتىنىڭ جىلدار بويعى قالىپتاسۋ كەزەڭىن جەتىك بىلەتىن ارداگەر ۇستاز اناتولي سيدەلنيكوۆ سپارتاكيادانىڭ اشىلۋ سالتاناتىندا باسسەين ورنالاسقان عيمارات تاريحىنا دا توقتالدى. ارداگەردىڭ ايتۋىنشا, بۇل سپورت كەشەنى وسىدان 46 جىل بۇرىن ستۋدەنتتەر مەن قالا تۇرعىندارىنىڭ بىرلەسكەن ەڭبەگىمەن سالىنعان.
«1980 جىلدىڭ قىركۇيەگىندە ءجۇزۋ باسسەينى ىسكە قوسىلىپ, وسى كەشەندە قالالىق, وبلىستىق, رەسپۋبليكالىق, ءتىپتى, 1982 جىلى بۇكىلوداقتىق دەڭگەيدەگى جارىستار وتكىزىلدى. ول كەزدە بۇل دەنە شىنىقتىرۋ سالاسى بويىنشا وبلىستاعى جالعىز كەشەن بولاتىن. بۇگىنگى جاڭعىرتىلعان نۇسقاسىن كورىپ, شىنىمەن دە تاڭعالىپ تۇرمىن. جوندەۋ جۇمىستارى جاقسى جۇرگىزىلگەن, كەشەننىڭ جاڭا كەلبەتىنە كوڭىلىم تولدى», دەدى قارت ۇستاز اعىنان جارىلىپ.
ۇزاق جىلدار بويى ءتۇرلى زامان قۇبىلىسىنىڭ اسەرىنەن قولدانىستان شىعىپ قالعان ءجۇزۋ باسسەينى 2025 جىلى كۇردەلى جوندەۋدەن ءوتىپ, قايتا ىسكە قوسىلعانى ۋنيۆەرسيتەت ستۋدەنتتەرى ءۇشىن جىل باستالعانداعى ۇلكەن سىي بولعانى داۋسىز.
اقتوبەدە ينكليۋزيۆتى سپورت كەشەنى اشىلدى
قازىر مۇندا زاماناۋي قۇرىلعىلارمەن جابدىقتالعان سپورت جانە جاتتىعۋ زالدارى, فيتنەس ورتالىعى جۇمىس ىستەپ تۇر. جاڭارعان ينفراقۇرىلىم ءبىلىم الۋشىلاردىڭ سپورتپەن جۇيەلى تۇردە اينالىسۋىنا, سونىڭ ىشىندە ءجۇزۋدى مەڭگەرۋىنە زور مۇمكىندىك بەرىپ وتىر.
جالپى اۋماعى 14ح25 مەتردى قۇرايتىن باسسەين زاماناۋي تالاپتارعا ساي جاڭعىرتىلىپ, الداعى ۋاقىتتا ۋنيۆەرسيتەت قاۋىمى مەن قالا تۇرعىندارىنىڭ يگىلىگىنە قىزمەت ەتپەك.