دەپۋتات الەۋمەتتىك وسال توپتاعى ازاماتتارعا يپوتەكا بەرۋ شارتتارىن جەڭىلدەتۋدى ۇسىندى

ول جامبىل وبلىسىنا بارعان جۇمىس ساپارى بارىسىندا تۇرعىنداردىڭ سالاعا قاتىستى تۋىنداپ وتىرعان ماسەلەلەرىن ورتاعا سالدى. دەپۋتاتتىڭ ايتۋىنشا, جامبىل وبلىسى بويىنشا, كوممۋنالدىق تۇرعىن ءۇي قورىنان پاتەر الۋ كەزەگىنە 57 434 ازامات تىركەلگەن. الايدا ساتىپ الىنعان پاتەرلەردى وسال توپتاعى ازاماتتارعا ۇلەستىرۋ ءۇشىن قولدانىستاعى زاڭناماعا ەنگىزىلگەن تولىقتىرۋلار مەن وزگەرىستەر كەدەرگى بولىپ وتىر.

قازاقستاننىڭ يپوتەكالىق نارىعى: رەفورما الدىنداعى ءۇزىلىس

«بۇرىن جەرگىلىكتى اتقارۋشى ورگانداردا بولعان فۋنكتسيالار «تۇرعىن ءۇي قۇرىلىسى جيناق» بانكىنە بەرىلدى جانە باسپاناعا مۇقتاج ازاماتتاردى ەسەپكە قويۋ ەلەكتروندىق بازاسى ارقىلى اۆتوماتتى تۇردە  جۇزەگە اسىرىلىپ جاتىر. وسى سەبەپتەرگە بايلانىستى كوممۋنالدىق تۇرعىن ءۇي قورىنان بولىنەتىن تۇرعىنجايدى كەلىسۋ تۋرالى وتىنىشكە دەر كەزىندە جاۋاپ بەرمەۋىنە جانە كەزەكتە تىركەلگەن ازاماتتاردىڭ دەرەكتەرىنىڭ تۇزەتىلىپ جاڭارتىلماۋىنا بايلانىستى باسپانامەن قامتاماسىز ەتۋ جۇمىستارى سوزىلىپ كەتتى. بۇگىنگى كۇنى كوممۋنالدىق تۇرعىن ءۇي قورىنان پاتەر الۋ كەزەگىنە تۇرعان 57 434 ازاماتتىڭ نەبارى 10 پايىزىنىڭ دەرەكتەرى تۇزەتۋلەر ەنگىزىلىپ جاڭارتىلعان», دەدى مۇقاش ەسكەندىروۆ.

سونداي-اق تۇرعىن ءۇي قۇرىلىسى جيناق اقشاسى جۇيەسى ارقىلى جەڭىلدەتىلگەن يپوتەكالىق تۇرعىن ۇيلەردى ساتۋ ىسىندە دە تۇيتكىلدەر بار. ونىڭ ايتۋىنشا, يپوتەكالىق تۇرعىن ءۇي قارىزدارىن بەرۋ باسپانا قورىنىڭ جالپى كولەمiنiڭ كەمiندە 70% الەۋمەتتىك وسال توپتاعى ازاماتتارعا,  20% جەتىم بالالار مەن اتا-اناسىنىڭ قامقورلىعىنسىز قالعان بالالارعا جانە قالعان 10% ۇلەسى كەزەكتەگى باسقا ازاماتتارعا ساتىلادى. بۇگىندە يپوتەكالىق تۇرعىن ۇيلەردىڭ كەمiندە 70%-ى الەۋمەتتىك وسال توپتاعى ازاماتتارعا ۇسىنىلۋى پاتەرلەردىڭ دەر كەزىندە تابىستالۋىنا كەدەرگى بولىپ وتىر.

ەندى جەڭىلدەتىلگەن يپوتەكانى جەكەمەنشىك بانكتەر دە ۇسىنا الادى

«مىسالى, تاراز قالاسى بويىنشا 2025 جىلى 706 پاتەر ساتىلىمعا شىعارىلسا, ازاماتتاردىڭ تولەم قابىلەتىنىڭ راستالماۋىنا بايلانىستى نەبارى 588 پاتەر عانا بەرىلدى. ال, بيىل تاراز قالاسى بويىنشا 1 278 پاتەردەن تۇراتىن 29 كوپقاباتتى ۇيلەردىڭ قۇرىلىسى اياقتالىپ ساتىلىمعا شىعارىلعالى وتىر. زاڭناماعا سايكەس اتالعان ۇيلەردىڭ 70%-ى نەمەسە 895 پاتەر الەۋمەتتىك وسال توپتاعى ازاماتتارعا ۇسىنىلسا بىلتىرعى جاعداي تاعى دا قايتالانۋى ابدەن مۇمكىن. بۇگىنگى كۇنى, باسپانا الۋ كەزەگىنە تۇرعان ازاماتتاردىڭ 31 055-ى نەمەسە 54%-ى الەۋمەتتىك وسال توپتاعى ازاماتتار. وسال توپتاعى ازاماتتاردىڭ تولەم قابىلەتىنىڭ تومەن بولۋى پاتەرلەردىڭ ۋاقىتىلى ساتىلماۋىنا اكەلىپ, جەرگىلىكتى اتقارۋشى ورگانداردىڭ وبليگاتسيالىق قارىز بورىشتارىن مەرزىمىندە وتەلۋىنە كەرى اسەرىن تيگىزەدى», دەدى ءماجىلىس دەپۋتاتى.

سوندىقتان دەپۋتات ونەركاسىپ جانە قۇرىلىس ءمينيسترىنىڭ بۇيرىعىنا ءتيىستى وزگەرتۋلەردى ەنگىزۋ ارقىلى وسال توپتاعى ازاماتتارعا ساتىلاتىن پاتەرلەردىڭ ۇلەسىن 70%-دان 50%-عا دەيىن تومەندەتۋدى نەمەسە يپوتەكالىق تۇرعىن ءۇي قارىزدارىن بەرۋ شارتتارىن جەڭىلدەتۋدى ۇسىندى.

ۇلتتىق بانك توراعاسى ازاماتتارعا يپوتەكاعا ءۇي الۋدى كەيىنگە قالدىرۋعا كەڭەس بەردى