ماجىلىستە حالىقارالىق ىستەر, قورعانىس جانە قاۋىپسىزدىك كوميتەتىنىڭ مۇشەسى, قازاقستان رەسپۋبليكاسى پرەزيدەنتى جانىنداعى ادام قۇقىقتارى جونىندەگى كوميسسيا توراعاسى, جۋرناليست, ساياسي عىلىمدار دوكتورى, پروفەسسور قۋانىش سۇلتانوۆتىڭ «ەلباسى جانە قازاق مەملەكەتتىگى» كىتابىنىڭ تۇساۋكەسەر ءراسىمى ءوتتى, دەپ حابارلادى ءماجىلىستىڭ ءباسپاسوز قىزمەتى.
كىتاپ قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆتىڭ ەلىمىزدىڭ جاڭا داۋىردەگى مەملەكەت قۇرىلىسى مەن ونىڭ دۇنيەجۇزىلىك قوعامداستىققا ەركىن ارالاسىپ, باسەكەگە لايىقتى توپتان كورىنۋ ماقساتىنداعى وراسان مەملەكەتتىك قايراتكەرلىك ەڭبەگىنە ارنالعان.
شارانى ءماجىلىس سپيكەرى قابيبوللا جاقىپوۆ اشىپ, جۇرگىزدى. العى سوزىندە ءماجىلىس توراعاسى قۋانىش سۇلتانوۆتىڭ ومىرلىك تاجىريبەسى مول دارىندى ساياساتكەر, قوعامداعى بەدەلى زور مەملەكەت قايراتكەرى رەتىندە ەلىنە تانىمال, حالقىنا سىيلى دا ارداقتى ازامات ەكەنىن ايتا كەلىپ, كىتاپتىڭ مازمۇنىنا, ءاربىر تاراۋىنا جەكە-جەكە توقتالىپ, باعاسىن ءبىلدىردى.
ودان كەيىن ءسوز العان قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىحالىقوۆا مەرەيتوي يەسىنە ەلباسىنىڭ العىس حاتىن وقىپ بەرىپ, ومىراۋ بەلگىسىن تاقتى.
سەنات توراعاسى قاسىم-جومارت توقاەۆ قۋانىش سۇلتان ۇلىنىڭ ەل يگىلىگى جولىنداعى قاجىرلى ەڭبەگىن جان-جاقتى بايانداي كەلىپ, كىتاپ مازمۇنىنا ايرىقشا نازار اۋداردى. قازاقستاننىڭ ايتىلعان بارلىق بولجامدارعا قاراماستان, ەل پرەزيدەنتىنىڭ ارقاسىندا تۇراقتى ەكونوميكالىق دامۋ قارقىنىنا يە, رەفورمالاردى تابىستى جۇزەگە اسىرىپ, ايماقتىق جانە جاھاندىق قاۋىپسىزدىكتى نىعايتۋ ىسىنە ەلەۋلى ۇلەس قوسىپ كەلە جاتقان, كۇللى الەم قاۋىمداستىعى مويىنداعان ەلگە اينالعانىن, بۇل ەڭبەك ەل ومىرىندەگى وسىنداي ايرىقشا كۇردەلى وقيعالاردىڭ قۇندى جىلناماسى ەكەنىن ايتتى.
– بۇل كىتاپ جاڭا مەملەكەت قۇرۋ جولىندا بارشا قازاقستان حالقىنىڭ ەل پرەزيدەنتىمەن بىرگە جۇمىلا وتىرىپ جاساعان اۋقىمدى ەڭبەگىنىڭ ايرىقشا كورىنىسى ەكەنىن اتاپ ءوتۋ قاجەت, – دەي كەلىپ, قاسىم-جومارت توقاەۆ سەناتتا اتقارعان ەلەۋلى ەڭبەگى ءۇشىن قۇرمەت گراموتاسىن تابىس ەتتى.
ودان كەيىن «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەككە ءسوز بەرىلىپ, ول قۋانىش سۇلتان ۇلىنىڭ پارتيانىڭ بەدەلىن كوتەرۋ جولىنداعى ەسەلى ەڭبەگىنە توقتالىپ, مەرەيتوي يەسىنە «نۇر وتان» پارتياسىنىڭ ماجىلىستەگى فراكتسياسىنىڭ جەتەكشىسى د. نازارباەۆانىڭ ۇسىنىسىمەن, پارتيانىڭ ساياسي بيۋرو شەشىمىمەن, ەلباسىنىڭ كەلىسىمى بويىنشا بەرىلگەن پارتيانىڭ ەڭ جوعارعى ناگراداسى «التىن بەلگى» ومىراۋ بەلگىسىن تاقتى.
كىتاپ تۇساۋكەسەرىندە ەل ۇكىمەتىنىڭ اتىنان قر پرەمەر-ءمينيسترىنىڭ كەڭسە باسشىسى ەرلان قوشانوۆ ىستىق لەبىزىن ءبىلدىرىپ, پرەمەر-مينيستر كارىم ءماسىموۆتىڭ قۇتتىقتاۋ حاتىن تابىس ەتتى.
شارا بارىسىندا قۋانىش سۇلتان ۇلىمەن ۇزاق جىلداردان بەرى ارىپتەس ءارى زامانداس بولعان, پارتيادا دا, سەناتتا دا بىرلەسە ەڭبەك ەتكەن پارلامەنت سەناتىنىڭ 1995-2000 جىلدارداعى توراعاسى, ءبىراز جىلدار سەنات دەپۋتاتى بولعان بەلگىلى مەملەكەت جانە قوعام قايراتكەرى ومىربەك بايگەلدى, «ەلباسى جانە قازاق مەملەكەتتىگى» كىتابىنىڭ العىسوزىن جازعان, مەملەكەت تاريحى ينستيتۋتىنىڭ ديرەكتورى, پروفەسسور بۇركىتباي اياعان, قۋانىش سۇلتان ۇلى تۇلەگى سانالاتىن ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى, پروفەسسور عالىمقايىر مۇتانوۆ ءسوز سويلەدى. ع.مۇتانوۆ اتالعان ۋنيۆەرسيتەتتىڭ باستاماسىمەن شىعارىلىپ كەلە جاتقان, 45-ءشى شىعارىلىمى تولىعىمەن قۋانىش سۇلتانوۆتىڭ ءومىرى مەن ەڭبەگىنە ارنالعان «ونەگەلى ءومىر» كىتابىن تانىستىردى.
ءراسىم سوڭىندا قۋانىش سۇلتانوۆ شاراعا قاتىسقان بارشا ازاماتتارعا ەلباسىنىڭ ەڭبەگى تۋرالى دەرەكتى كىتاپقا قىزىعۋشىلىق ءبىلدىرىپ, ساليقالى وي, سالماقتى ءسوز ايتقاندارى ءۇشىن العىسىن ءبىلدىردى.
شاراعا سونداي-اق, قوس پالاتا دەپۋتاتتارى, تانىمال ساياسي جانە قوعام قايراتكەرلەرى, جوعارى وقۋ ورىندارىنىڭ, بۇقارالىق اقپارات قۇرالدارىنىڭ وكىلدەرى قاتىستى.
وسىعان دەيىن قۋانىش سۇلتانوۆتىڭ ەلىمىزدىڭ قوعامدىق-ساياسي ومىرىنە ارنالعان 10 كىتابى مەن 200-دەن استام ماقالاسى جارىققا شىققان بولاتىن.