قوستانايدا مۇمكىندىگى شەكتەۋلى ازاماتتارعا ارنالعان «مۇمكىندىك» الەۋمەتتىك-قۇقىقتىق اكتسياسى ءوتتى. «زاڭ مەن ءتارتىپ» قاعيداتى اياسىندا وڭىردە العاش رەت ۇيىمداستىرىلعان يگى شاراعا پروكۋراتۋرا قىزمەتكەرلەرى, جەرگىلىكتى اتقارۋشى ورگاندار مەن ۋاكىلەتتى قۇرىلىم وكىلدەرى, سونداي-اق جۇمىس بەرۋشىلەر, وقۋ ورتالىقتارىنىڭ باسشىلارى مەن ۆولونتەرلەر قاتىستى.
وبلىس پروكۋرورى مارات سەكسەمباەۆتىڭ ايتۋىنشا, اكتسيا وبلىستىڭ بارلىق قالاسى مەن اۋدانىندا ءبىر مەزگىلدە باستاۋ العان. ۇيىمداستىرۋشىلار شالعاي ەلدى مەكەندەردە تۇراتىن ازاماتتاردىڭ دا نازاردان تىس قالماۋىن ەسكەرىپتى.
– ءىس-شاراعا 150-دەن استام مەملەكەتتىك ورگان, 146 جۇمىس بەرۋشى كاسىپورىن, 12 وقۋ ورتالىعى, 11 ۇكىمەتتىك ەمەس ۇيىم, سونىمەن قاتار بەلسەندى جاستار قاتىسىپ جاتىر. اكتسيا بارىسىندا 1500-دەن استام مۇمكىندىگى شەكتەۋلى ازامات ۋاكىلەتتى ورگان وكىلدەرىمەن جۇزبە-ءجۇز تىلدەسىپ, تۇيتكىلدى ساۋالدارىنا جاۋاپ الادى. كەيدە مۇگەدەكتىگى بار جانداردىڭ جۇمىسقا ورنالاسۋىنا, الەۋمەتتىك-مەديتسينالىق كومەك الۋىنا نەمەسە باسپانا ماسەلەسىن شەشۋگە كەدەرگى بولاتىن جايتتار كەزدەسىپ جاتادى. سوندىقتان ەرەكشە قاجەتتىلىگى بار جانداردىڭ جاعدايىنا تەرەڭىرەك ءۇڭىلىپ, جان-جاقتى قولداۋ كورسەتەتىن وسىنداي ءىس-شارالاردى ءجيى ۇيىمداستىرىپ تۇرعان ابزال, – دەدى وبلىس پروكۋرورى.
جيىنعا ۇلكەن ءۇمىت ارقالاپ كەلگەندەردىڭ ءبىرازىنىڭ ماسەلەسى سول مەزەتتە وڭ شەشىمىن تاپتى. ماسەلەن, ەرەكشە بالا تاربيەلەپ وتىرعان قوستاناي قالاسىنىڭ تۇرعىنى ديانا قۇرمانوۆا ءبىر جىلدان بەرى ءتۇرلى بيۋروكراتيالىق كەدەرگىلەرگە تاپ بولىپ, ۇلىنا زاڭ جۇزىندە تيەسىلى ەم-شاراعا قول جەتكىزە الماي كەلگەن ەدى. وبلىستىق جۇمىسپەن قامتاماسىز ەتۋ جانە الەۋمەتتىك باعدارلامالار باسقارماسىنىڭ ماماندارى انانىڭ ءوتىنىشىن تابان استىندا قاراستىرىپ, قالاداعى بەيىمدەۋ ورتالىقتارىنىڭ بىرىنە تەگىن جولداما بەردى.
– مەن سياقتى ەرەكشە قامقورلىقتى قاجەت ەتەتىن بالا تاربيەلەپ وتىرعان اتا-انالارعا مۇنداي كەزدەسۋلەردىڭ ماڭىزى زور. كەيدە بالام ءۇشىن تالاي مەكەمەنىڭ تابالدىرىعىن توزدىرۋعا تۋرا كەلەدى, ونى جەتەلەپ ءار جەرگە بارۋ وڭاي ەمەس. مىنە, بۇگىن كوپتەن بەرى قولىمىز جەتپەي جۇرگەن جولدامانى الىپ, قۋانىپ جاتىرمىز. يگى ءىس-شارانى ۇيىمداستىرعان ازاماتتارعا العىسىم شەكسىز, – دەيدى د.قۇرمانوۆا.
جيىن بارىسىندا زاعيپ جاندار دا وزدەرىن تولعاندىرعان ساۋالدارعا تۇششىمدى جاۋاپ الىپ, بىلىكتى مامانداردىڭ كەڭەسىن تىڭدادى.
بۇگىندە وبلىس ورتالىعىندا 9 مىڭنان استام مۇمكىندىگى شەكتەۋلى جان بار بولسا, ونىڭ جارتىسىنا جۋىعى ءۇشىنشى توپقا جاتادى. بۇل دەگەنىمىز – ولاردىڭ ەڭبەككە ارالاسىپ, جۇمىس ىستەۋگە مۇمكىندىگى بار دەگەن ءسوز. وسى ورايدا, اتالعان ساناتتاعى ءبىرسىپىرا ازامات جۇمىسقا ورنالاسۋ جونىندە جۇمىس بەرۋشىلەرمەن كەلىسىمشارتقا وتىردى.
اكتسيا اياسىندا «وتباسى بانك» اق وكىلدەرى مۇگەدەكتىگى بار ادامدار مەن ولاردىڭ وتباسىن تۇرعىن ۇيمەن قامتاماسىز ەتۋ, قولدانىستاعى باعدارلامالار, جەڭىلدەتىلگەن نەسيە الۋ جولدارى تۋرالى اقپارات بەردى. كاسىپكەرلەر پالاتاسىنىڭ ماماندارى بيزنەس باستاۋعا نيەتتى جاندارعا مەملەكەتتىك قولداۋ تەتىكتەرىن ءتۇسىندىرىپ, بيزنەس-جوسپار قۇرۋ, گرانتتار مەن سۋبسيديالار الۋ جونىندە كەڭەس ۇسىندى.
قوستاناي وبلىسى