سەمەي قالاسىندا ۇلتتىق ويىنداردى دارىپتەۋگە باعىتتالعان «ابايدىڭ زياتكەرلىك ىزىمەن» توعىزقۇمالاق ۇيىرمەسى ءوز جۇمىسىن باستادى. ۇيىرمە اباي وبلىسىنىڭ قوعامدىق كەلىسىم ورتالىعى مەن وڭىرلىك توعىزقۇمالاق فەدەراتسياسىنىڭ بىرلەسۋىمەن اشىلدى.
ۇيىرمەنىڭ اشىلۋ ءراسىمى وبلىستىق دوستىق ۇيىندە ءوتتى. اتالعان مادەني-سپورتتىق ءىس-شارا مەملەكەت باسشىسى قاسىم-جومارت توقاەۆتىڭ 2025 جىلعى 29 جەلتوقسانداعى جارلىعىمەن بەكىتىلگەن قازاقستان حالقى اسسامبلەياسىن 2030 جىلعا دەيىن دامىتۋ تۇجىرىمداماسىندا كورسەتىلگەن جاستاردىڭ وي-ءورىسىن كەڭەيتۋ جانە قوعامدىق كەلىسىمدى نىعايتۋ مىندەتتەرى اياسىندا ۇيىمداستىرىلدى.
توعىزقۇمالاق – حالقىمىزدىڭ سانعاسىرلىق وي-ءورىسىن دامىتقان زياتكەرلىك دودا. ول ەسەپكە جۇيرىك بولۋدى, الداعى قادامدى الدىن الا سارالاۋدى جانە تاكتيكالىق ۇتىمدى شەشىم قابىلداۋدى قالىپتاستىراتىن ويىن. سونىمەن قاتار توعىزقۇمالاق – حاكىم ابايدىڭ دا سۇيىكتى ويىندارىنىڭ ءبىرى. بۇل تۋرالى ابايتانۋشىلارمەن قاتار م.اۋەزوۆتىڭ «اباي جولى» رومانىندا دا كورىنىس بەرەدى. سوندىقتان توعىزقۇمالاق ويىنىنىڭ اباي ەلىندە دامۋى زاڭدى قۇبىلىس بولسا كەرەك.
ۇيىرمەنى تاجىريبەلى جاتتىقتىرۋشى لەونيد پارفيەۆ جۇرگىزەدى. ول توعىزقۇمالاق ويىنىمەن 2000 جىلدان بەرى اينالىسىپ كەلەدى.
– 2016 جىلدان باستاپ سپورت مەكتەبىندە كاسىبي جاتتىقتىرۋشى رەتىندە جۇمىس ىستەدىم. كەيىنگى جىلدارى شاكىرتتەرىم حالىقارالىق جارىستاردا جوعارى ناتيجەلەرگە قول جەتكىزگەن. اتاپ ايتقاندا, بىلتىرعى جىلدىڭ قاراشا ايىندا ماليكا اسەمحانوۆا الەم چەمپيونى اتاندى, – دەدى جاتتىقتىرۋشى.
ارداگەرلەر كەڭەسىنىڭ توراعاسى مۇراتقازى ءالين «توعىزقۇمالاق ويىنى جاستار مەن بالالاردىڭ ويلاۋ جۇيەسىن دامىتاتىن ماڭىزدى قۇرال», دەيدى.
جيىنعا قازاقستان حالقى اسسامبلەياسىنىڭ مۇشەلەرى مەن ەتنومادەني بىرلەستىكتەردىڭ وكىلدەرى قاتىستى. ۇيىرمەنىڭ اشىلۋىنا قاتىسقان ۋليانا اباشەۆا:
– ويىن بارىسىندا قاتىسۋشىلار قارسىلاستىڭ ءاربىر ءجۇرىسىن تالداپ, دۇرىس شەشىم قابىلداۋعا, ءوز ارەكەتتەرىن الدىن الا جوسپارلاۋعا ۇيرەنەدى. ساباق بارىسىندا بارشا قاتىسۋشىلار بەلسەندىلىك تانىتىپ, ويىنعا دەگەن ۇلكەن قىزىعۋشىلىق كورسەتتى. الداعى ۋاقىتتا ۇيىرمە جۇمىسىنا تۇراقتى تۇردە قاتىسىپ, توعىزقۇمالاق ويىنىن تەرەڭىرەك مەڭگەرىپ, ويىن شەبەرلىگىن جەتىلدىرگىمىز كەلەدى, – دەيدى.
ۇيىمداستىرۋشىلاردىڭ ايتۋىنشا, ۇيىرمەنىڭ باستى ماقساتى – ۇلتتىق زياتكەرلىك ويىنداردى كەڭىنەن ناسيحاتتاۋ عانا ەمەس, سونىمەن قاتار ەتنوسارالىق تاتۋلىقتى نىعايتىپ, ورتاق قىزىعۋشىلىق نەگىزىندە جاستاردى بىرىكتىرۋ. توعىزقۇمالاق ادال باسەكەنى دارىپتەپ قانا قويماي, جاستاردىڭ ءبىر-بىرىمەن جاقىن ارالاسىپ, ورتاق ىسكە ۇيىسۋىنا مۇمكىندىك بەرمەك.
اباي وبلىسى