قازىر بۇل قىزدى كوپ ادام بىلە بەرمەيدى. الايدا كەڭەس وداعى كەزىندە جامبىل سەكىلدى ول دا ءبىراز دارىپتەلدى. جىر الىبىمەن كەزدەسۋى ۇيىمداستىرىلدى. ول قازاقتىڭ العاشقى ارتىستەرىنىڭ ءبىرى حاسيا كاماردينوۆا ەدى.
«ليتەراتۋرنايا گازەتا» باسىلىمىنىڭ 1936 جىلعى №27 سانىندا «تەاترالنايا سمەنا كازاحستانا» دەگەن ماقالا جاريالانعان. وسى ماقالادا: «حاسيا كاماردينوۆا – 19 جاستا. ون جەتى جىل بۇرىن, ازامات سوعىسى كەزىندە ونىڭ اكەسى قازا تاپتى. ءبىر جىلدان كەيىن اناسى قايتىس بولدى. ءۇش جاسار قىزدى اجەسى ءوز قولىنا الدى, ون جاسىندا مەكتەپكە بەردى. حاسيا الماتىدا دۇنيەگە كەلىپ, سوندا ءوستى. سول جەردە ول العاش رەت تەاترعا بارىپ, ۇلكەن اسەرگە بولەندى» – دەپ جازىلعان ەكەن. ال «سسسر نا سترويكە» فوتوجۋرنالىنىڭ 1939 جىلعى №8 سانى كەڭەس وداعىنىڭ قىزدارىنا ارنالىپتى. كەيىپكەر رەتىندە ءۇش قىز – رەسەيلىك تانيا پىجوۆا, ۋكراينالىق جەنيا ادامەنكو جانە قازاقستاندىق حاسيا كاماردينوۆا تاڭدالعان. ماقالادا حاسيانىڭ جاستايىنان اكتريسا بولۋدى ارمانداعانى جازىلعان. «ول تۇل جەتىم ەدى. ءبىر جاسىندا اكەسىنەن, ەكى جاسىندا اناسىنان ايىرىلدى. ءسويتىپ, الماتىدا اجەسىنىڭ تاربيەسىندە ءوستى. قىزدىڭ بار قيالى ساحنا بولاتىن...» دەي كەلىپ, حاسيانىڭ تەاتر اكتريساسى بولۋ ءۇشىن ماسكەۋگە بارعانىن جازعان. ول ۋاقىتتا ماسكەۋدەگى تەاتر ونەرى ينستيتۋتى جانىندا قازاق ستۋدياسى جۇمىس ىستەيتىن. حاسيا قىز عايني حايرۋللينا, گۇلجاھان عاليەۆا سەكىلدى قازاق قىزدارىمەن بىرگە وسى ستۋديادا وقىپ, 1938 جىلى وقۋىن ءتامامدادى.
ماسكەۋدە وقىعان جاس ونەرپازدار الماتىدا كارلو گولدونيدىڭ «ەكى مىرزاعا – ءبىر قىزمەتشى» پەساسىن قويدى. باستى ءرولدىڭ ءبىرىن حاسيا وينادى. قويىلىمنىڭ ءبىر كورىنىسى جامبىل اقىنعا ارنايى كورسەتىلدى. دالاعا كىلەم توسەلىپ, جاس ارتىستەر اقىننىڭ الدىندا ساحنا ونەرىن قويدى.
قويىلىمنان سوڭ حاسيا جامبىلمەن جەكە كەزدەسەدى. جىر الىبى قازاق قىزىنىڭ ونەرىنە ءسۇيسىنىپ, وعان جىردان شاشۋ شاشقان ەكەن. جامبىلدىڭ بۇل ارناۋى ورىس تىلىنە اۋدارىلىپ, «پەسنيا و دەۆۋشكە» («قىز تۋرالى جىر») دەگەن اتاۋمەن ورىس باسىلىمدارىندا جاريالانىپتى («سسسر نا سترويكە» جۋرنالى, №8, 1939 جىل). ولەڭ «پرەكراسنايا دەۆۋشكا يز كازاحستانا! تى يابلوني تونشە, نەجنەە تيۋلپانا. ي زنوينىم رۋميانتسەم كراسۋەشسيا تى, كاك سمۋگلوە يابلوكو الما-اتى» دەپ باستالادى. الايدا بۇل ولەڭنىڭ قازاق تىلىندەگى تۇپنۇسقاسىن اقىننىڭ كىتاپتارىنان كەزدەستىرە المادىق.
حاسيا كەيىن قازىرگى مۇحتار اۋەزوۆ, عابيت مۇسىرەپوۆ اتىنداعى تەاترلاردا, باسقا دا ونەر وردالارىندا قىزمەت ەتىپ, اكتريسا بولامىن دەگەن بالا كۇنگى ارمانىنا قول جەتكىزدى.