سالتاناتتى جيىندا ءوڭىر باسشىسى جينالعان جۇرتشىلىقتى اۋىل بالالارىنىڭ جارقىن بولاشاعىنا جول اشاتىن جاڭا مەكتەپتىڭ اشىلۋىمەن قۇتتىقتاپ, ءبىلىم – ەل دامۋىنىڭ تۇعىرى ەكەنىن اتاپ ءوتتى. اۋداننىڭ الەۋمەتتىك-ەكونوميكالىق دامۋىنا ۇلەس قوسقان ازاماتتار وبلىس اكىمىنىڭ العىس حاتىمەن ماراپاتتالدى. وسىنداي قۇرمەت ءبىلىم ۇياسىن ساپالى, ءوز ۋاقىتىنان كەشىكتەرمەي سالىپ, ەل يگىلىگىنە بەرگەن مەردىگەر مەكەمە «باق-بەرەكە» سەرىكتەستىگىنىڭ ماماندارىنا دا كورسەتىلدى.
وقۋ-اعارتۋ ءمينيسترى جۇلدىز سۇلەيمەنوۆا ەلىمىزدە جۇزەگە اسىرىلىپ جاتقان ءبىلىم بەرۋ جوبالارىنا توقتالىپ, سىر وڭىرىندەگى سەرپىندى جۇمىستاردى جوعارى باعالادى.
«كەلەشەك مەكتەپتەرىنىڭ» ستاندارتىمەن سالىنعان وسى ءبىلىم ۇياسى حالىقارالىق تالاپتارعا ساي مەكتەپتىڭ اۋىلعا دا جەتكەنىنىڭ كۋاسى. مەملەكەت باسشىسى قاسىم-جومارت توقاەۆتىڭ ۇستازدارعا دەگەن قامقورلىعى ەرەكشە, سونىڭ ارقاسىندا مۇعالىمدەردىڭ قوعامداعى مارتەبەسى ارتا ءتۇستى. وسىنىڭ ارقاسىندا بۇگىندە پەداگوگ ماماندىعى ەلىمىزدەگى ەڭ تارتىمدى ماماندىقتاردىڭ بىرىنە اينالدى. جاڭا مەكتەپتىڭ ۇجىمىن, وقۋشىلاردى, اتا-انالاردى بۇگىنگى قۋانىشىمەن قۇتتىقتايمىن», دەدى مينيستر.
جالپى, بىلتىر ارال اۋدانىندا 4 مەكتەپ پايدالانۋعا بەرىلسە, بيىل وسىنداي جاڭالىق شالعاي اۋىل سانالاتىن مەرگەنسايدا بولىپ وتىر. بۇرىن ءبىر قاباتتى, ەسكى عيماراتتا وقىپ كەلگەن ەلدى مەكەن بالالارىنا جاڭا ۇلگىمەن بوي كوتەرگەن ءبىلىم وشاعى ەستەن كەتپەس ەرەكشە تارتۋ بولدى.
«وتكەن جىلى قولدانىسقا بەرىلگەن 4 مەكتەپتىڭ ەكەۋى – «كەلەشەك مەكتەبى». ال 686 تۇرعىنى بار مەرگەنسايدا وسىنداي ۇلگىدە ءبىلىم وشاعىنىڭ بوي كوتەرۋى مەملەكەتتىڭ ءبىلىم سالاسىنا اسا ماڭىز بەرىپ وتىرعانىن كورسەتەدى. سونىمەن قاتار بىلتىر عاسىردان استام تاريحى بار №14 مەكتەپ كۇردەلى, تاعى 4 مەكتەپ اعىمداعى جوندەۋدەن ءوتىپ, جاڭا كەيىپكە ەندى. بيىل ساپاق اۋىلىندا دا مەكتەپ قۇرىلىسىن باستاۋ جوسپارلانىپ وتىر», دەيدى اۋداندىق ءبىلىم ءبولىمىنىڭ باسشىسى سانيرا جاننازاروۆا.
سالا ءمينيسترى وسى ساپارىندا بايقوڭىر قالاسىنداعى №277 مەكتەپ-ليتسەي جۇمىسىمەن دە تانىستى. «قازاقستان حالقىنا» قورى بۇل وقۋ ورداسىنا 245 ملن تەڭگە كولەمىندە قاراجات ءبولىپ, پاندىك جانە شىعارماشىلىق كابينەتتەر تولىق جابدىقتالعان. قور قولداۋىمەن يننوۆاتسيالىق وبسەرۆاتوريا, زىمىران ۇلگىلەۋ, STEM, حيميا, بيولوگيا, روبوتتەحنيكا, ماتەماتيكا, فيزيكا, گەوگرافيا, تاريح, باستاۋىش سىنىپ كابينەتتەرى, كىتاپحانا, ارنايى تەلەستۋديا ورناتىلىپ, مەكتەپتىڭ ماتەريالدىق-تەحنيكالىق بازاسى جاڭاردى.
مۇنداي قولداۋلار اۋىل مەن قالا اراسىنداعى ءبىلىم بەرۋ ساپاسىنداعى الشاقتىقتى ازايتىپ, ءاربىر بالاعا تەڭ مۇمكىندىك جاساۋعا نەگىز بولادى.
قىزىلوردا وبلىسى,
ارال اۋدانى