باتىس قازاقستان وبلىسىنداعى اقجايىق اۋدانىنا قاراستى بازارشولان اۋىلىندا ورتا مەكتەپ عيماراتى جاڭعىرتۋ جۇمىسىنان كەيىن سۋ جاڭا كەيىپكە ەندى.
مەملەكەت باسشىسى قاسىم-جومارت توقاەۆتىڭ تاپسىرماسىمەن ەلىمىزدە 2025–2027 جىلدارى 1 300 مەكتەپ جاڭعىرتۋدان وتكىزىلۋى كەرەك بولاتىن. وسى تاپسىرما اياسىندا باتىس قازاقستان وبلىسىندا 86 مەكتەپ رەنوۆاتسيادان وتەدى. 2025 جىلى وبلىستا العاشقى 6 مەكتەپ جاڭعىرتۋدان ءوتىپ ۇلگەردى. سونىڭ ءبىرى – بازارشولان اۋىلىنداعى عابدوللا ماحامبەتوۆ اتىنداعى ورتا مەكتەپ عيماراتى.
اتىنا زاتى ساي, جاڭارعان مەكتەپتىڭ عيماراتى عانا كۇردەلى جوندەلىپ قويماي, بۇكىل جابدىعى تۇگەلىمەن جاڭادان الىنىپ, زاماناۋي كەيىپكە ەنگەن. وتكەن جىلدىڭ ناۋرىز ايىنان بەرى ءار جەردە وقۋعا ءماجبۇر بولعان اۋىل بالالارىنىڭ قۋانىشىندا شەك جوق. جوبانىڭ جالپى قۇنى – 772,2 ملن تەڭگە بولىپتى. كۇردەلى جوندەۋ جۇمىسىن الماتىلىق «نسك «MBM Construction» جشس اتقارعان.
– جوندەۋ جۇمىسىنىڭ ساپاسىنا كوڭىلىمىز تولدى. قۇرىلىسشىلار ءبىزدىڭ تالاپ-تىلەگىمىزدى ەسكەرىپ, مەكتەپ ىشىندەگى كەيبىر كابينەتتى ءوز قالاۋىمىزشا جاساتتىق. قازىر بىزدە 232 وقۋشى ءبىلىم الىپ جاتىر. مەكتەپالدى دايارلىق سىنىبىندا 16 بالا تاربيەلەنەدى. ۇجىمدا 40 پەداگوگ بار, – دەيدى مەكتەپ ديرەكتورى وراز ناۋرىزباي ۇلى.
– 2026 جىلى اقجايىق اۋدانىندا تاعى 4 مەكتەپ – تايپاق اۋىلىنداعى بايسىقوۆ مەكتەبى, قاراۋىلتوبە اۋىلىنداعى تايپاق مەكتەبى, اۋدان ورتالىعىنداعى م.اۋەزوۆ اتىنداعى گيمنازيا جانە جاڭابۇلاق مەكتەبى جاڭعىرتۋدان وتەدى. 2027 جىلى تاعى 7 مەكتەپ جاڭارادى. سوندا ءبىر عانا اقجايىق اۋدانىندا ءۇش جىلدا 12 مەكتەپ جاڭعىرتىلادى, – دەيدى وبلىستىق ءبىلىم باسقارماسىنىڭ باسشىسى ەلدوس سافۋللين.
جاڭارتىلعان مەكتەپ زاماناۋي تالاپتارعا ساي جابدىقتالعان. پاندىك كابينەتتەردە دارىستەردى تەوريالىق جانە پراكتيكالىق تۇرعىدا وتكىزۋگە بارلىق جاعداي جاسالعان. ال كومپيۋتەرلىك تەحنولوگيالار جانە بيولوگيا كابينەتتەرىندە ورناتىلعان قۇرىلعىلار تىپتەن كەرەمەت – زاماناۋي كومپيۋتەرلەر, اۋديو-ۆيزۋال تەحنولوگيالار, تسيفرلىق ميكروسكوپ, ت.ب. ءبارى بار. مەملەكەت باسشىسى ايتىپ جۇرگەن الەۋمەتتىك تەڭسىزدىك – اۋىل بالاسى مەن قالا بالاسىنىڭ بىردەي ساپالى ءبىلىم الۋىنا كەدەرگى جويىلعان دەۋگە بولادى.
مەكتەپ عيماراتىنىڭ قايتا اشىلۋىنا وراي وتكەن سالتاناتتى شارادا وبلىستىق ءبىلىم باسقارماسىنىڭ باسشىسى ەلدوس سافۋللين مەن اقجايىق اۋدانىنىڭ اكىمى مۇرات سەردالين ءوڭىر باسشىسى اتىنان مەكتەپ ديرەكتورىنا سۋ جاڭا «گازەل» اۆتوكولىگىنىڭ كىلتىن تابىستادى. بۇل ميكرواۆتوبۋس وكرۋگ اۋماعىنداعى بايانتوبە اۋىلىنان قاتىناپ وقيتىن بالالاردى تاسيتىن بولادى.
وڭىردە كەيىنگى جىلدارى ءبىلىم سالاسىنا جاسالىپ جاتقان قامقورلىق كوپ. ماسەلەن, 2023 جىلدان بەرى وبلىستا 30 جاڭا مەكتەپ سالىنعان ەكەن. ونىڭ 9-ى – «كەلەشەك مەكتەپتەرى» ۇلتتىق جوباسى اياسىندا بوي كوتەردى. جاڭا ءبىلىم وشاقتارىنىڭ 22-ءسى اۋىلدا اشىلعان. «سەبەبى اۋىلعا جاعداي جاساۋ – اۋىل بالالارىنا قالا وقۋشىلارىمەن تەڭ مۇمكىندىك بەرۋ دەگەن ءسوز. اتقارىلعان جۇيەلى جۇمىستىڭ ناتيجەسىندە وڭىردە 11 اپاتتىق, 6 ءۇش اۋىسىمدى جانە 12 بەيىمدەلگەن مەكتەپ عيماراتىنىڭ ماسەلەسى تولىق شەشىلدى. بيىلدىڭ وزىندە وبلىستا 8 جاڭا مەكتەپتىڭ قۇرىلىسى ءجۇرىپ جاتىر. بۇدان بولەك وتكەن جىلى جەرگىلىكتى بيۋدجەت پەن «قازاقستان حالقىنا» قوعامدىق قورى ەسەبىنەن 7,8 ملرد تەڭگەگە 514 پاندىك كابينەت ساتىپ الىندى», دەيدى ءوڭىر باسشىسى ناريمان تورەعاليەۆ.
باتىس قازاقستان وبلىسى