«تازا پاراقتان» رەتتەۋ: كاسىپكەرلەردەن قانداي وتىنىشتەر كەلىپ جاتىر؟

كەڭەس وتىرىسىندا وتپەلى كەزەڭدەگى سالىقتىق اكىمشىلەندىرۋگە ەنەتىن ناقتى تۇزەتۋلەر قاراستىرىلدى. «تازا پاراق» تۇزەتۋلەرى بويىنشا شاعىن جانە ميكرو بيزنەس 2026 جىلدىڭ 1 قاڭتارىنا دەيىن سالىقتىق جانە كامەرالىق تەكسەرۋلەردەن, سونداي-اق اكىمشىلىك جاۋاپكەرشىلىكتەن بوساتىلادى. دەگەنمەن, بۇعان دەيىن مەملەكەتتىك كىرىستەر كوميتەتى رەسمي ارنالار ارقىلى حابارلاعان بىرقاتار ەرەكشەلىك ساقتالادى.

«2025 جىلعى 17 جەلتوقساندا ۇكىمەت وتپەلى كەزەڭگە سالىقتىق اكىمشىلەندىرۋدى تۇزەتۋ تۋرالى شەشىم قابىلدادى. اتالعان شەشىمدى جۇزەگە اسىرۋ ماقساتىندا وسى جىلدىڭ 1 ساۋىرىنە دەيىن سالىق بەرەشەگىن تولەۋگە جاتاتىن ءوسىمپۇلدار مەن ايىپپۇلداردى ەسەپتەن شىعارۋ قاعيدالارى ازىرلەندى. كاسىپكەرلىك سۋبەكتىلەرىن تاراتۋ جانە توقتاتۋ راسىمدەرى قايتا قارالدى. سونداي-اق شاعىن جانە ميكرو بيزنەسكە قاتىستى كەڭسەلىك اۋديت جۇرگىزۋ تاسىلدەرىنە وزگەرىستەر ەنگىزىلدى. «اشىق نورماتيۆتىك قۇقىقتىق اكتىلەر» پورتالىندا ءتيىستى نورماتيۆتىك قۇقىقتىق اكتىلەردىڭ جوبالارى ورنالاستىرىلدى جانە اقپان ايىنىڭ باسىندا قابىلدانادى دەپ جوسپارلانىپ وتىر», دەدى مەملەكەتتىك كىرىستەر كوميتەتى توراعاسىنىڭ ورىنباسارى جانىبەك نۇرجانوۆ. ميكرو جانە شاعىن بيزنەس سالىقتىق اكىمشىلەندىرۋدى «تازا پاراقتان» باستايدى

2026 جىلعا دەيىن قوسىلعان قۇن سالىعى (ققس) بويىنشا ەسەپكە قويۋعا بايلانىستى بۇزۋشىلىقتار نەىگىزىندە اكىمشىلىك ىستەر قوزعالمايتىنى, ال بۇرىن مەملەكەتتىك كىرىستەر ورگاندارى شىعارعان ىستەر توقتاتىلاتىنى ايتىلدى. بۇل شارالار بيزنەستىڭ سالىقتىق اكىمشىلەندىرۋدىڭ جاڭا شارتتارىنا بارىنشا قولايلى ءوتۋىن قامتاماسىز ەتۋگە باعىتتالعان.

وتىرىس قورىتىندىسى بويىنشا مەملەكەتتىك كىرىستەر كوميتەتى مەن «اتامەكەن» ۇلتتىق كاسىپكەرلەر پالاتاسى كاسىپكەرلەردىڭ قاتىسۋىمەن نورماتيۆتىك ستاندارتتاردى «تازا پاراقتان» باستاپ قولدانۋ تاجىريبەسىن ءتۇسىندىرۋ ماقساتىندا كەڭەيتىلگەن كەڭەس وتكىزۋگە كەلىستى. 

ۇكىمەتتىڭ ءباسپاسوز قىزمەتىنىڭ مالىمەتىنشە, وتكەن اپتادا مەملەكەتتىك كىرىستەر كوميتەتىنە call-ورتالىعى مەن Salykbot Telegram بوتى ارقىلى – 19 400, ۇلتتىق ەكونوميكا مينيسترلىگىنە – 50, «اتامەكەن» ۇلتتىق كاسىپكەرلەر پالاتاسىنا – 14 ءوتىنىش كەلىپ تۇسكەن. 

كاسىپكەرلەردى كوبىنەسە سالىق رەجيمىن تاڭداۋ, سالىق تولەۋشىنىڭ شوتىندا جۇمىس ىستەۋ, ەلەكتروندى شوت-فاكتۋرالاردى شىعارۋ, قازىرگى پروتسەدۋرالىق ماسەلەلەر قىزىقتىراتىنى بەلگىلى بولىپ وتىر. مۇنداي وتىنىشتەر بويىنشا تۇسىنىكتەمەلەر دەرەۋ بەرىلگەن.

جۇيەلى جۇرگىزىلگەن اقپاراتتىق-ءتۇسىندىرۋ جۇمىستارىنىڭ ناتيجەسىندە مەملەكەتتىك كىرىستەر كوميتەتىنە قاراستى call-ورتالىقتىڭ جۇكتەمەسى تومەندەگەن. بۇرىن كۇنىنە 5500-گە جۋىق قوڭىراۋ تۇسسە, قازىر كۇنىنە 4700-گە جۋىق قوڭىراۋ تۇسەدى.

ۇلتتىق ەكونوميكا مينيسترلىگى مەن «اتامەكەن» ۇلتتىق كاسىپكەرلەر پالاتاسىندا جۇيەلى ماسەلەلەر جيناقتالعان. ولاردىڭ قاتارىندا ۇزاقمەرزىمدى كەلىسىمشارتتار بويىنشا ققس مولشەرلەمەلەرىن قولدانۋ, ميب-كە سالىق سالۋ, مۇگەدەكتەردى جۇمىسقا الاتىن ۇيىمدارعا سالىق سالۋ شارتتارى, مەديتسينا سالاسىندا ءارتۇرلى ققس ستاۆكالارى مەن جەڭىلدىكتەردى قولدانۋ, سونداي-اق, ءوزىن-ءوزى جۇمىسپەن قامتىعاندار ءۇشىن قىزمەت تۇرلەرىنىڭ تىزبەسىن كەڭەيتۋ جاتادى. 

ققس: قانداي مەديتسينالىق قىزمەتتەر سالىقتان بوساتىلادى؟

وسىنداي ۇندەۋلەردىڭ ءبىر مىسالىن «اتامەكەن» ۇلتتىق كاسىپكەرلەر پالاتاسى توراعاسىنىڭ ورىنباسارى تيمۋر جاركەنوۆ كەلتىردى. ماسەلە مەديتسينا سالاسىنداعى ققس بويىنشا جەڭىلدىكتەردى جويۋعا قاتىستى. سالىق كودەكسىنە سايكەس, دارىلىك زاتتاردى وتكىزۋ جانە يمپورتتاۋ بويىنشا ققس بوساتۋ تەك تەگىن مەديتسينالىق كومەك كورسەتۋ مەن مىندەتتى مەديتسينالىق ساقتاندىرۋ مەملەكەتتىك قورى, سونداي-اق الەۋمەتتىك ماڭىزى بار جانە ورفاندىق اۋرۋلاردى ەمدەۋ قىزمەتىندە عانا ساقتالادى. بۇل رەتتە كوممەرتسيالىق سەگمەنتتە ساتىلاتىن دارىلىك زاتتارعا, مەديتسينالىق ماقساتتاعى بۇيىمدارعا, سونداي-اق ولاردى وندىرۋگە ارنالعان ماتەريالدار مەن كومپونەنتتەرگە 2026 جىلدان باستاپ 5% جانە ودان ءارى 10% ستاۆكا بويىنشا ققس سالىنادى. بۇل بيزنەس وكىلدەرىنىڭ پىكىرىنشە, تۇتىنۋشىلار ءۇشىن شىعىنداردىڭ وسۋىنە اكەلۋى مۇمكىن. سونىمەن قاتار بەلگىلەنگەن شەكتى باعالار بويىنشا كوممەرتسيالىق سەگمەنتتە دارىلىك زاتتار مەن مەديتسينالىق ماقساتتاعى بۇيىمدار تاپشىلىعىنىڭ تاۋەكەلدەرى, سونداي-اق فارماتسەۆتيكالىق سۋبستانتسيالار, ءدارى-دارمەكتەر مەن مەديتسينالىق ماقساتتاعى بۇيىمدار وندىرۋگە ارنالعان جابدىقتاردى وتكىزۋ جانە يمپورتتاۋ بويىنشا اينالىمدارعا 16% بازالىق مولشەرلەمە بويىنشا ققس سالىناتىنى قوسىمشا اتاپ ءوتىلدى.

سالىق جۇيەسى «تازا پاراقتان» قايتا قۇرىلادى

سەرىك جۇمانعارين سالىق ورگاندارىنىڭ اقپاراتتىق جۇيەلەرىن پايدالانۋ بويىنشا اۋقىمدى ءتۇسىندىرۋ جۇمىستارىن جۇرگىزۋ قاجەت ەكەنىن ايتتى. تسيفرلىق قىزمەتتەردىڭ بەلسەندى دامۋى كەزىندە بارلىق پايدالانۋشىنىڭ وزگەرىستەرگە بەيىمدەلۋگە ۋاقىتى بولا بەرمەيتىنى اتاپ ءوتىلدى. وسىعان بايلانىستى ناقتى وقىتۋ الگوريتمىن, ونىڭ ىشىندە تسيفرلىق كومەكشىلەردى پايدالانۋ, سونداي-اق بيزنەسپەن تۇراقتى كەرى بايلانىستى قامتاماسىز ەتۋ قاجەت.