بۇگىن ساعات 16:00-دەن باستاپ اۋا رايىنىڭ قولايسىزدىعىنا بايلانىستى اتىراۋ جانە ماڭعىستاۋ وبلىستارىنان وتەتىن رەسپۋبليكالىق تاسجولدا كولىكتىڭ بارلىق ءتۇرىنىڭ قوزعالىسى شەكتەلدى, دەپ جازادى Egemen.kz.
اتىراۋ وبلىسىنداعى «دوسسور – قۇلسارى – بەينەۋ – ساي-وتەس – شەتپە – جەتىباي – اقتاۋ» تاسجولىنىڭ 179-210 شاقىرىم ارالىعىندا (مايكومگەن اۋىلىنان ماڭعىستاۋ وبلىسىنىڭ شەكاراسىنا دەيىن) كولىك قوزعالىسى جابىلدى.
ماڭعىستاۋ وبلىسىنداعى «دوسسور – قۇلسارى – بەينەۋ – ساي-وتەس – شەتپە – جەتىباي – اقتاۋ» تاسجولىنىڭ 210-332 شاقىرىم ارالىعىندا (اتىراۋ وبلىسى شەكاراسىنان بەينەۋ اۋىلىنا دەيىن) دا كولىكتىڭ بارلىق ءتۇرى ءۇشىن قوزعالىس شەكتەلدى.
«قازاۆتوجول» كومپانياسىنىڭ مالىمەتىنشە, جولدى بۇگىن ساعات 20:00-دە اشۋ جوسپارلانعان.
«قازگيدرومەت» رمك بۇگىن ماڭعىستاۋ وبلىسىنىڭ باتىسىندا, سولتۇستىگىندە, ورتالىعىندا تۇندە جانە كۇندىز كوكتايعاق بولجانعان. وبلىستىڭ باتىسىندا, وڭتۇستىگىندە, ورتالىعىندا تۇمان ءتۇسىپ, اقتاۋدا دا كوكتايعاق بولاتىنىن حابارلاعان. ال اتىراۋدا قار بوراپ, بۇرقاسىن بولاتىنى بولجانعان.
ەسكە سالايىق, بۇگىن اۋا رايىنىڭ قولايسىزدىعىنا بايلانىستى باتىس قازاقستان, پاۆلودار, اقمولا جانە قوستاناي وبلىستارىنىڭ وقۋشىلارى ونلاين وقۋ فورماتىنا كوشىرىلدى.