كونستيتۋتسيالىق كوميسسيانىڭ ەكىنشى وتىرىسى اياسىندا پارلامەنت سەناتىنىڭ دەپۋتاتى نۇرلان بەكنازاروۆ قازاقستاندا وكىلدىك بيلىكتى نىعايتۋعا جانە دەموكراتيالىق ينستيتۋتتاردى دامىتۋعا باعىتتالعان نەگىزگى باستامالار تۋرالى باياندادى, دەپ حابارلايدى Egemen.kz.
ونىڭ ايتۋىنشا, ۇسىنىلىپ وتىرعان وزگەرىستەر وكىلدىك بيلىكتىڭ ءتيىمدى مودەلىن قالىپتاستىرۋعا جانە ەلدە جاڭا ساياسي تەپە-تەڭدىكتى ورناتۋعا مۇمكىندىك بەرەدى.
«جوعارى وكىلدىك ورگان, ياعني قۇرىلتاي ۇسىنىستاردى قولداۋ تەتىگىنە يە بولادى, پالاتالاردى بىرىكتىرۋ كونستيتۋتسيالىق جولمەن جۇزەگە اسىرىلادى, ال بيلىك تارماقتارى اراسىنداعى وكىلەتتىكتەر قايتا بولىنەدى. بۇل وكىلدىك بيلىكتىڭ ءتيىمدى مودەلىن قامتاماسىز ەتىپ, ساياسي تەپە-تەڭدىكتىڭ جاڭا جۇيەسىن قالىپتاستىرادى», دەدى نۇرلان بەكنازاروۆ.
سەنات دەپۋتاتى پرەزيدەنتتىڭ جاڭا كونسۋلتاتيۆتىك ورگان – حالىق كەڭەسىن قۇرۋدى ۇسىنعانىن اتاپ ءوتتى. اتالعان ورگان قوعامدىق بىرلەستىكتەردى, ءماسليحاتتاردى, وڭىرلىك كەڭەستەردى جانە ەتنومادەني ورتالىقتاردى بىرىكتىرەدى.
نۇرلان بەكنازاروۆتىڭ ايتۋىنشا, حالىق كەڭەسى قازاقستان حالقى اسسامبلەياسى مەن ۇلتتىق قۇرىلتايدىڭ قۇقىقتىق مۇراگەرى بولادى, ال ونىڭ قىزمەتى كونستيتۋتسيالىق دەڭگەيدە بەكىتىلەدى.
سونداي-اق دەپۋتات جاڭا ورگانعا زاڭ شىعارۋ باستاماسى قۇقىعى بەرىلەتىنىن ايتتى. بۇل قۇقىققا زاڭ جوبالارىن ەنگىزۋ جانە رەسپۋبليكالىق رەفەرەندۋم وتكىزۋ جونىندە ۇسىنىس جاساۋ كىرەدى. مۇنىڭ بارلىعى قوعام مەن وڭىرلەردىڭ دامۋىنا قاتىستى ماڭىزدى ماسەلەلەردى جەدەل ءارى ءتيىمدى شەشۋگە مۇمكىندىك بەرەدى.
حالىق كەڭەسى ينستيتۋتى: ءمانى مەن ماڭىزى
ايتا كەتەيىك, بۇل وزگەرىستەر بيلىك ينستيتۋتتارىنا دەگەن سەنىمدى نىعايتۋعا جانە دەپۋتاتتاردىڭ جاۋاپكەرشىلىگىن ارتتىرۋعا باعىتتالعان.
«ەندى دەپۋتاتتىڭ داۋىس بەرۋگە قاتىسۋى تەك جەكە ءوزى ارقىلى جۇزەگە اسىرىلادى, ال دالەلدى سەبەپسىز وتىرىستارعا قاتىسپاۋ قاتاڭ تۇردە شەكتەلەدى. سونداي-اق داۋىس بەرۋ قۇقىعىن باسقا ادامعا بەرۋىنە تىيىم سالىنادى. مۇنىڭ بارلىعى كەڭەستىڭ جۇمىس ساپاسىن ارتتىرىپ, شەشىمدەردىڭ سانالى ءارى جاۋاپكەرشىلىكپەن قابىلدانۋىن قامتاماسىز ەتەدى», دەپ اتاپ ءوتتى نۇرلان بەكنازاروۆ.
ونىڭ سوزىنشە, تۇزەتۋلەر قۇرىلتايدىڭ جانە دەپۋتاتتاردىڭ قورعالۋىن دا كۇشەيتەدى.
«اسا اۋىر قىلمىستاردى قوسپاعاندا, قۇرىلتايدىڭ كەلىسىمىنسىز دەپۋتاتتى ۇستاۋعا نەمەسە جاۋاپكەرشىلىككە تارتۋعا بولمايدى. بۇل قۇرىلتاي جۇمىسىنىڭ تاۋەلسىزدىگى مەن تۇراقتىلىعىنا دەگەن سەنىمدى قالىپتاستىرادى», دەدى سپيكەر.
سونىمەن قاتار بەكنازاروۆ جاڭاشىلدىقتار دەپۋتاتتاردىڭ جاۋاپكەرشىلىگىن ارتتىرىپ, ۇدەرىستى ازاماتتار ءۇشىن اشىق ەتەتىنىن اتاپ ءوتتى. ول دەپۋتاتتىق مانداتتان ايىرۋ تەك وبەكتيۆتى سەبەپتەر بولعان جاعدايدا عانا مۇمكىن ەكەنىن ايتتى. مۇنداي سەبەپتەرگە تۇراقتى تۇرۋ ءۇشىن شەتەلگە كوشۋ, ازاماتتىقتان ايىرىلۋ, ساياسي پارتيا قىزمەتىنىڭ توقتاتىلۋى نەمەسە ايىپتاۋ ۇكىمىنىڭ زاڭدى كۇشىنە ەنۋى جاتادى. بۇل تالاپتاردىڭ بارلىعى وكىلدەردىڭ ادال ءارى اشىق جۇمىس ىستەۋىنە كەپىلدىك بەرەدى.
كونستيتۋتسيالىق رەفورما: «قۇرىلتاي» مەن «حالىق كەڭەسى»
دەپۋتاتتىڭ ايتۋىنشا, ورتالىق سايلاۋ كوميسسياسى دەپۋتاتتاردىڭ ەتيكانى ساقتاۋىن باقىلاۋدى جانە جاۋاپكەرشىلىك شارالارىن قولدانۋدى جالعاستىرادى, ال قۇرىلتاي كونستيتۋتسيا مەن زاڭدارعا وزگەرىستەر ەنگىزۋ ۇدەرىسىن اناعۇرلىم ءتيىمدى جۇزەگە اسىرا الادى.
«قازاقستان ازاماتتارى ءۇشىن بۇل شەشىمدەردىڭ كاسىبي دەڭگەيدە, قوعام مۇددەسىن ەسكەرە وتىرىپ قابىلداناتىنىن جانە ءاربىر دەپۋتات ءوز داۋىسى ءۇشىن جەكە جاۋاپكەرشىلىك كوتەرەتىنىن بىلدىرەدى», دەپ تۇيىندەدى ول.