كەڭەس وداعىنىڭ باتىرى ءاليا مولداعۇلوۆانىڭ 100 جىلدىق مەرەيتويىنا وراي ء«اليا مولداعۇلوۆا. وشپەس ەرلىك» اتتى ەنتسيكلوپەديالىق جيناق جارىق كوردى. كىتاپتىڭ سالتاناتتى تۇساۋكەسەرىنە سەنات دەپۋتاتتارى امانگەلدى نۇعمانوۆ پەن امانگەلدى ەسباي قاتىستى, دەپ جازادى Egemen.kz.
سەناتور ا.نۇعمانوۆ سوزىندە باتىر قىزدىڭ ءومىر جولى مەن ەرلىگى تاۋەلسىز ەلىمىزدىڭ ۇرپاقتارىنا ادامگەرشىلىك پەن نامىستىڭ باعدارى ەكەنىن اتاپ ءوتتى. ونىڭ ەسىمى ەلدى مەكەندەر مەن كوشەلەرگە, مەموريالدار مەن ەستەلىك ورىندارعا بەرىلىپ, ماڭگىلىككە ۇلىقتالعان. ال ءاليانىڭ جارقىن بەينەسى ادەبيەت پەن ونەردە كورىنىس تاۋىپ, حالىق جۇرەگىندە ماڭگىلىك رۋحاني قۇندىلىق رەتىندە ساقتالىپ كەلەدى.
قوبدا اۋىلىندا ءاليا مولداعۇلوۆانىڭ 100 جىلدىعى دۇركىرەپ ءوتتى
ء«اليا مولداعۇلوۆانىڭ ءومىر جولى مەن ەرلىگى − تاۋەلسىزدىك ۇرپاقتارى ءۇشىن ماڭگىلىك ساباق. باتىردىڭ قۇرمەتىنە اقتوبە وبلىسىنداعى اۋىل, استانا مەن ەلىمىزدىڭ باسقا دا قالالارىنداعى كوشەلەر اتالدى, سونداي-اق ونىڭ ەسىمى ماسكەۋ مەن سانكت-پەتەربۋرگ قالالارىندا دا ماڭگىلىككە ايشىقتالعان. باتىر قازا تاپقان جەردە مەموريالدىق كەشەن بوي كوتەردى, ال ونىڭ جارقىن بەينەسى ادەبيەت پەن ونەر تۋىندىلارىندا كورىنىس تاپتى», دەدى سەناتور.
بۇل ەڭبەكتە باتىردىڭ لەنينگرادتاعى وقۋ جىلدارى, مايدانداعى ەرلىگى, زامانداستارى مەن قارۋلاستارىنىڭ ەستەلىكتەرى, تۋعان-تۋىستارىنىڭ اڭگىمەلەرى جيناقتالعان. سونداي-اق جيناققا ءاليا مولداعۇلوۆانىڭ ەسىمى بەرىلگەن كوشەلەر, ءبىلىم بەرۋ جانە مادەنيەت نىساندارى, ەسكەرتكىشتەر تۋرالى مالىمەتتەر, سونىمەن قاتار باتىر بەينەسىن جىرعا قوسىپ, ونەر تۋىندىلارىنا ارقاۋ ەتكەن اقىن-جازۋشىلار مەن سۋرەتشىلەردىڭ شىعارمالارى ەنگەن.
«عاسىرلارعا جالعاسقان ەرلىك» رەسپۋبليكالىق فورۋمى ءاليا مولداعۇلوۆانىڭ 100 جىلدىعىنا ارنالدى
ايتا كەتەيىك, ەنتسيكلوپەديالىق جيناقتىڭ اۆتورلارى − سەناتور امانگەلدى نۇعمانوۆ پەن تاريح عىلىمدارىنىڭ دوكتورى اباي تاسبولاتوۆ.