اقش پرەزيدەنتى دونالد ترامپ New York Post باسىلىمىنا بەرگەن سۇحباتىندا ۆەنەسۋەلا باسشىسى نيكولاس مادۋرونى قولعا ءتۇسىرۋ وپەراتسياسى كەزىندە امەريكالىق اسكەريلەر جاڭا قۇپيا قارۋ پايدالانعانىن ايتقان, دەپ حابارلايدى Egemen.kz.
اق ءۇي باسشىسىنىڭ ايتۋىنشا, «دەزوريەنتاتور» (The Discombobulator) دەپ اتالاتىن قۇرىلعى وپەراتسيا بارىسىندا شەشۋشى ءرول اتقارىپ, قىتاي مەن رەسەيدە جاسالعان ۆەنەسۋەلالىق اسكەري تەحنيكانى ىستەن شىعارعان.
كونگرەستىڭ كەلىسىمىنسىز ۆەنەسۋەلاعا شابۋىلداۋعا بولمايدى: سەنات ترامپقا شەكتەۋ قويدى
ترامپ بۇل مالىمدەمەنى CNN ارناسىنىڭ اقش ىشكى قاۋىپسىزدىك مينيسترلىگى «گاۆان سيندرومىن» تۋىنداتۋى مۇمكىن قۇرىلعى ساتىپ العانى جونىندەگى حابارلارىنان كەيىن جاسادى. «گاۆان سيندرومى» العاش رەت 2016 جىلى كۋباداعى اقش ەلشىلىگىنىڭ قىزمەتكەرلەرىندە تىركەلگەن. ول قۇلاقتاعى شۋ, باس اينالۋ, باستىڭ قىسىم مەن ءدىرىل سەزىنۋى سەكىلدى بەلگىلەرمەن سيپاتتالادى. كەيبىر بولجامدارعا سايكەس, مۇنداي سيمپتومدار ميكروتولقىندى ساۋلەلەنۋدىڭ اسەرىنەن پايدا بولۋى مۇمكىن.
ترامپ ءوزىن ۆەنەسۋەلا پرەزيدەنتىنىڭ مىندەتىن اتقارۋشى دەپ مالىمدەدى
New York Post كەلتىرگەن وپەراتسيا كۋاگەرلەرىنىڭ ايتۋىنشا, قارۋدىڭ اسەرى ەرەكشە بولعان. ۆەنەسۋەلا پرەزيدەنتى كۇزەتشىلەرىنىڭ مۇرنىنان كەنەت قان كەتىپ, كەيبىرىنىڭ قان قۇسىپ, قاتتى السىرەگەنى بايقالعان. كۋاگەرلەردىڭ ءبىرى مۇنى «وتە قۋاتتى دىبىستىق تولقىن» دەپ سيپاتتاپ, «باس ىشتەن جارىلىپ كەتكەندەي اسەر بولدى» دەگەن.
ۆەنەسۋەلا قورعانىس مينيسترلىگىنىڭ مالىمەتىنشە, وپەراتسيا كەزىندە 83 ادام قازا تاپقان. ال دونالد ترامپ New York Post باسىلىمىنا بەرگەن تۇسىنىكتەمەسىندە «دەزوريەنتاتوردىڭ» جۇمىس ىستەۋ تەتىگى تۋرالى قوسىمشا مالىمەت بەرۋدەن باس تارتقان.