ءمامس جۇيەسىندەگى ولقىلىقتاردان كەيىن قورعا جاڭا باسشى تاعايىندالدى

قارجى مينيسترلىگى اپپاراتىنىڭ باسشىسى ەرنار ەرجانوۆ «الەۋمەتتىك مەديتسينالىق ساقتاندىرۋ قورى» كەاق ۇجىمىنا باسقارما توراعاسى قىزمەتىنە تاعايىندالعان گۇلميرا سابدەنبەكتى تانىستىردى.

«ونىڭ بەيىندى مەديتسينالىق ءبىلىمى بار, قوعامدىق دەنساۋلىق ساقتاۋ ماگيسترى (MPH) دارەجەسىن العان, سونداي-اق دەنساۋلىق ساقتاۋ سالاسىندا باسقارۋشىلىق تاجىريبەسى مول. ءار جىلدارى جەتەكشى لاۋازىمداردى اتقارىپ, ۇلتتىق مەديتسينالىق حولدينگتىڭ ستراتەگيالىق دامۋ دەپارتامەنتىن باسقاردى, «ۇلتتىق عىلىمي كارديوحيرۋرگيا ورتالىعى» اق باسقارما توراعاسىنىڭ ورىنباسارى بولدى», دەپ حابارلادى قارجى مينيسترلىگىنىڭ ءباسپاسوز قىزمەتى.

بۇعان دەيىن پرەزيدەنت اكىمشىلىگىنىڭ الەۋمەتتىك-ەكونوميكالىق ساياسات ءبولىمى مەڭگەرۋشىسىنىڭ ورىنباسارى قىزمەتىن اتقارعان گۇلميرا سابدەنبەك الەۋمەتتىك ساياسات پەن ورنىقتى دامۋ, مەملەكەتتىك اۋديت جانە قارجىلىق باقىلاۋ ماسەلەلەرىنە جەتەكشىلىك ەتكەن.

قور ۇجىمىنا باسقارما توراعاسىنىڭ ءبىرىنشى ورىنباسارى رەتىندە ايدار مەكەبەكوۆ تە تانىستىرىلدى.

ونىڭ قارجى مينيسترلىگى جۇيەسىندە كوپجىلدىق ەڭبەك ءوتىلى بار. ەڭبەك جولىن سالىق ينسپەكتورىنان باستاپ, مەملەكەتتىك كىرىستەر جانە قارجىلىق باقىلاۋ ورگاندارىنىڭ بولىمشەلەرىن باسقارۋعا دەيىن كوتەرىلگەن. قارجى مينيسترلىگىنىڭ قارجىلىق مونيتورينگ كوميتەتى توراعاسىنىڭ ورىنباسارى قىزمەتىن اتقارعان. بۇگىنگە دەيىن «قازاقمىس كورپوراتسياسى» جشس-دە ۇرلىققا قارسى ءىس-قيمىل دەپارتامەنتىنىڭ ديرەكتورى بولعان.

«الەۋمەتتىك مەديتسينالىق ساقتاندىرۋ قورىنىڭ قىزمەتى حالىقتىڭ ناقتى قاجەتتىلىكتەرىن ەسكەرە وتىرىپ, قارجى قاراجاتىن ماقساتتى ءارى اشىق بولۋگە, سونداي-اق ساپالى مەديتسينالىق كومەكتى قامتاماسىز ەتۋگە باعىتتالادى», دەلىنگەن قارجى مينيسترلىگىنىڭ ءباسپاسوز حابارلاماسىندا.

ەسكە سالايىق, بۇعان دەيىن الەۋمەتتىك مەديتسينالىق ساقتاندىرۋ قورىن تەكسەرۋ بارىسىندا جۇيەدە جاپپاي تارتىپسىزدىك انىقتالعان ەدى. استانادا ءبىر دارىگەر ءبىر كۇندە 1 442 ناۋقاستى «قابىلداعان», ال ەكىنشىسى ءبىر ايدا 4 832 قابىلداۋ جۇرگىزگەن بولىپ شىققان. قۇجاتتاردا قايتىس بولعان ادامدارعا كورسەتىلگەن مەديتسينالىق قىزمەتتەر, جىنىسىنا سايكەس كەلمەيتىن جۇزدەگەن مىڭ سكرينينگتەر تىركەلگەن, ءتىپتى ەر ادامدارعا مامموگرافيا جاسالعانى كورسەتىلگەن. سونداي-اق بالالارعا دارىلەردى جاپپاي نەگىزسىز جازۋ جانە ءبىر ادامعا ءبىر تاۋلىكتە مىڭداعان پرەپارات «ەسەپتەن شىعارىلعان» جاعدايلار انىقتالعان.

ءمامس جۇيەسىندەگى ولقىلىقتار: قايتىس بولعان ادام دارىگەر قابىلداۋىندا بولعان

وسىدان كەيىن پرەمەر-مينيستر ولجاس بەكتەنوۆ انىقتالعان زاڭبۇزۋشىلىقتار بويىنشا ماتەريالداردى قۇقىق قورعاۋ ورگاندارىنا بەرۋدى جانە قارجىلىق اعىنداردى تولىق باقىلاپ, جۇيەدە ءتارتىپ ورناتۋ ءۇشىن قوردى قارجى مينيسترلىگىنىڭ قاراماعىنا وتكىزۋدى تاپسىردى.

20 قاڭتاردا پرەزيدەنت قاسىم-جومارت توقاەۆ مىندەتتى الەۋمەتتىك مەديتسينالىق ساقتاندىرۋ قورىنىڭ ء(مامس) قارجى مينيسترلىگىنىڭ قاراماعىنا بەرىلۋى تۋرالى پرەمەر-ءمينيستردىڭ شەشىمىن قولدادى.

مىندەتتى مەديتسينالىق ساقتاندىرۋ قورى نەگە قارجى مينيسترلىگىنە بەرىلدى؟

مەملەكەت باسشىسىنىڭ ايتۋىنشا, قوردا «كوپتەگەن زاڭبۇزۋشىلىقتار مەن اسىرا پايدالانۋلار», سونىڭ ىشىندە «قاراپايىم قوسىپ جازۋ مەن مەملەكەتتىك قاراجاتتى اسا ءىرى كولەمدە جىمقىرۋ ماقساتىندا قۇجاتتاردى ورەسكەل قولدان جاساۋ فاكتىلەرى» انىقتالعان.

«ەل ەكونوميكاسىنىڭ ساپالى ءوسۋى مەن ينفراقۇرىلىمدىق جوبالاردى ىسكە اسىرۋعا, دەنساۋلىق ساقتاۋدى دامىتۋعا بۇكىل ەل كۇش پەن قاراجات جۇمىلدىرىپ جاتقاندا, الەۋمەتتىك سالاعا بولىنەتىن وراسان زور قارجى قاراپايىم تۇردە تالان-تاراجعا سالىنىپ جاتىر», دەگەن ەدى پرەزيدەنت.

ايتا كەتەيىك, 2024-2025 جىلدارى تەك دەنساۋلىق ساقتاۋ سالاسىن دامىتۋعا مەملەكەت 7,8 ترلن تەڭگە بولگەن.

مەديتسينالىق ساقتاندىرۋ قورىنداعى زاڭسىزدىق