ەلىمىزدە حالىقارالىق عىلىمي سەرىكتەستىك كەڭەيىپ كەلەدى. بيىل استانادا وكسفورد ۋنيۆەرسيتەتىنىڭ زەرتتەۋ ينستيتۋتى جۇمىسىن باستايدى. وندا ستۋدەنتتەر مەن زەرتتەۋشىلەرگە وقىتۋ, تاجىريبە الماسۋ, عىلىمي زەرتتەۋلەرگە قاتىسۋ مۇمكىندىگى ۇسىنىلادى. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك 24.kz تەلەارناسىنا بەرگەن سۇحباتىندا مالىمدەدى.
ءمينيستردىڭ ايتۋىنشا, بيىل ەلىمىزدە «Oxford Hub» اشۋ جوسپارلانىپ وتىر. بۇل الاڭ قازاقستان مەن الەمگە ايگىلى وكسفورد ۋنيۆەرسيتەتى اراسىنداعى عىلىمي ىنتىماقتاستىقتى جاڭا دەڭگەيگە كوتەرۋگە باعىتتالعان. جوبا اياسىندا وتاندىق اكادەميالىق ورتاعا وكسفوردتىڭ كەڭ عىلىمي ينفراقۇرىلىمىمەن تىكەلەي بايلانىس ورناتۋعا مۇمكىندىك بەرىلەدى. الداعى ۋاقىتتا وتاندىق عالىمدار مەن زەرتتەۋ ۇيىمدارى وكسفورد ۋنيۆەرسيتەتىنىڭ 32 كوللەدجى مەن 100-گە جۋىق زەرتتەۋ ينستيتۋتىمەن بىرلەسىپ عىلىمي جوبالاردى جۇزەگە اسىرا الادى. بۇل – حالىقارالىق دەڭگەيدەگى زەرتتەۋلەرگە قاتىسۋعا, تاجىريبە الماسۋعا جانە ورتاق عىلىمي باستامالاردى دامىتۋعا جول اشاتىن ماڭىزدى قادام. ساراپشىلاردىڭ پىكىرىنشە, «Oxford Hub»-تىڭ اشىلۋى ەل عىلىمىنىڭ جاھاندىق اكادەميالىق كەڭىستىككە ىقپالداسۋىن جەدەلدەتىپ, زەرتتەۋ ساپاسىن ارتتىرۋعا جانە جاس عالىمداردىڭ الەۋەتىن كەڭەيتۋگە سەرپىن بەرەدى. عىلىمداعى سەرىكتەستىك ەندى دەكلاراتسيا ەمەس, شىنايى ناتيجەگە جۇمىس ىستەيتىن جۇيەگە اينالادى.
«استانادا تاجىريبە الماسۋ, وقىتۋ, كونسالتينگ جانە عىلىمي جوبالاردى بىرلەسە جۇزەگە اسىرۋعا جول اشىلادى. بۇل – كەيىنگى ءۇش جارىم جىلدا اتقارىلعان جۇيەلى جۇمىستىڭ ەڭ ءىرى ناتيجەسى. ماڭىزدىسى سول, بۇل باستاما وكسفورد ۋنيۆەرسيتەتى تاريحىنداعى بىرەگەي قادام سانالادى. الەمگە ايگىلى ءبىلىم ورداسى وسى ۋاقىتقا دەيىن شەتەلدە فيليال دا, تۇراقتى وكىلدىك تە, زەرتتەۋ ورتالىقتارىن دا اشپاعان. ال استانادا ىسكە قوسىلاتىن ورتالىق – وكسفوردتىڭ حالىقارالىق دەڭگەيدەگى العاشقى وسىنداي تاجىريبەسى. جاڭا الاڭ قازاقستاندىق جانە شەتەلدىك عالىمدار ءۇشىن ورتاق پلاتفورماعا اينالىپ, ءبىلىم بەرۋ, عىلىمي ساراپتاما جانە زەرتتەۋ سالالارىنداعى سەرىكتەستىكتى تەرەڭدەتۋگە مۇمكىندىك بەرەدى. سونداي-اق قازاقستاننىڭ اكادەميالىق كەڭىستىكتەگى بەدەلىن ارتتىرىپ قانا قويماي, ەلوردانى وڭىرلىك عىلىمي-حاب دەڭگەيىنە كوتەرۋگە نەگىز بولادى», دەيدى مينيستر.
وسىلايشا, وتاندىق ستۋدەنتتەر ءۇشىن الەمدىك دەڭگەيدەگى ونلاين بىلىمگە جول اشىلادى. ەلىمىزدە 95 ۋنيۆەرسيتەتتىڭ ءبىلىم الۋشىلارى وكسفورد ۋنيۆەرسيتەتىنىڭ «Saïd Business School» ونلاين بيزنەس مەكتەبىمەن بىرلەسىپ ازىرلەنگەن زاماناۋي كۋرستارعا قول جەتكىزە الادى. اتالعان جوبالار «Coursera» حالىقارالىق ونلاين وقىتۋ پلاتفورماسىمەن ىنتىماقتاستىقتى تەرەڭدەتۋ اياسىندا جۇزەگە اسىرىلادى. باعدارلامالار جاساندى ينتەللەكت, تەحنولوگيالىق مەنەدجمەنت جانە بلوكچەين, مالىمەتتەردى جەلىدە تىزبەكتەپ ساقتاۋ تەحنولوگياسى باعىتتارىن قامتيدى. بۇل كۋرستار ستۋدەنتتەردىڭ تسيفرلىق ساۋاتتىلىعىن ارتتىرىپ قانا قويماي, جاڭا تەحنولوگيالاردى باسقارۋ مەن يننوۆاتسيالىق شەشىمدەردى تۇسىنۋگە مۇمكىندىك بەرەدى. ناتيجەسىندە, وتاندىق جوعارى ءبىلىم جۇيەسى جاھاندىق ءبىلىم كەڭىستىگىمەن تىعىز ىقپالداسا تۇسەدى.
«جوبانىڭ نەگىزگى ماقساتى – قازاقستاندا ناقتى ناتيجەگە قول جەتكىزۋ. باستاما اياسىندا ستۋدەنتتەردىڭ ءبىلىم الۋىنا جان-جاقتى قولداۋ كورسەتىلىپ, ءوڭىردىڭ اكادەميالىق الەۋەتىن ارتتىرۋ كوزدەلگەن. وقۋ بارىسىن كۇشەيتۋ ءۇشىن قوسىمشا ءبىلىم بەرۋ ماتەريالدارى, تالدامالىق ينسايتتار جانە عىلىمي زەرتتەۋلەر ۇسىنىلادى. بۇل ماتەريالدار ستۋدەنتتەردىڭ ءبىلىمىن تەرەڭدەتىپ, وقۋ ساپاسىن جاقسارتۋعا باعىتتالادى. ءبىز جۇمىستىڭ باستالۋىن اسىعا كۇتەمىز. سەرىكتەستىك قازاقستاندىق جوعارى ءبىلىم بەرۋ جۇيەسىنە جاڭا سەرپىن بەرىپ, ستۋدەنتتەرگە جاڭا مۇمكىندىك بەرەدى دەپ ويلايمىن», دەيدى Saïd Business School ونلاين مەكتەبىنىڭ اتقارۋشى ديرەكتورى كەرولاين ۋيليامس.
سونىمەن قاتار «بولاشاق» باعدارلاماسى اياسىندا ءبىلىم الىپ جۇرگەن وتاندىق عالىمداردى جاساندى ينتەللەكت پەن اتوم سالاسى بويىنشا تاعىلىمدامادان وتكىزۋگە ارنايى كۆوتا بولىنگەن. زەرتتەۋشىلەر وسى باعىتتا وكسفورد ۋنيۆەرسيتىندە بىلىمدەرىن شىڭداي الادى.