مەديتسينا سالاسىنداعى وزىق تەحنولوگيالاردىڭ قارىشتاپ دامۋى مەن تۇرعىندار سۇرانىسىنىڭ ارتۋى وتاندىق دەنساۋلىق ساقتاۋ جۇيەسىنە تىڭ سەرپىن بەرىپ وتىر. دەگەنمەن زاماناۋي ەمدەۋ مەكەمەلەرىن سالۋمەن قاتار توزىعى جەتكەن ەسكى عيماراتتاردى كۇردەلى جوندەۋدەن وتكىزىپ, جاڭارتۋ – كەزەك كۇتتىرمەيتىن وزەكتى ماسەلە.
ماسەلەن, الماتى شاھارىنداعى تاۋلىك بويى قالتقىسىز قىزمەت كورسەتەتىن №4 قالالىق كلينيكالىق اۋرۋحاناسىنىڭ تىنىسى كەڭەيدى. جىلىنا 12 500-گە دەيىن كۇردەلى وپەراتسيا جاسايتىن ىرگەلى مەكەمە جۋىردا تولىقتاي كۇردەلى جوندەۋدەن ءوتىپ, ادام تانىماستاي وزگەردى. كوپسالالى ستاتسيوناردى جاڭعىرتۋ جۇمىسىنىڭ ناتيجەسىندە اۋرۋحانانىڭ قابىلداۋ مۇمكىندىگى ەداۋىر ارتىپ, ەندى ءبىر مەزەتتە 250 ەمەس, 450 ادامعا دەيىن ەم-دوم كورسەتە الاتىن دەڭگەيگە جەتتى.
جاڭارعان عيماراتتاعى ەڭ ماڭىزدى جاڭالىق – حالىقارالىق «Triage» جۇيەسىنىڭ ەنگىزىلۋى. پاتسيەنتتەردى سۇرىپتاۋدىڭ بۇل ءادىسى ناۋقاستار لەگىن قىزىل, سارى, جاسىل ايماقتارعا ءبولۋ ارقىلى جۇزەگە اسادى. ناتيجەسىندە, اۋىر حالدەگى ناۋقاستارعا شۇعىل كومەك كورسەتىلىپ, اسقىنۋلار مەن ءولىم-ءجىتىم قاۋپى سەيىلەدى, سونداي-اق توسەكتىك ورىن قورى ءتيىمدى پايدالانىلىپ, ستاتسيوناردا جاتۋ مەرزىمى قىسقارادى.
بۇعان قوسا مەديتسينا مەكەمەسىندە زاماناۋي وپەراتسيالىق بلوكتار, 12 ورىندىق انەستەزيولوگيا جانە رەانيماتسيا بولىمشەسى, قارقىندى تەراپيانىڭ شۇعىل ءبولىمى ىسكە قوسىلدى. تەرى ارقىلى جۇرەك تامىرلارىن ەمدەۋ ورتالىعىنىڭ اشىلۋى دا – ەل يگىلىگىنە جاسالعان ماڭىزدى قادام. بۇل جۇرەك-قان تامىرلارى سىرقاتى بار ازاماتتارعا جوعارى تەحنولوگيالىق مەديتسينالىق كومەكتى قولجەتىمدى ەتە تۇسەدى.
«مەملەكەت باسشىسىنىڭ تاپسىرماسىنا سايكەس الماتىدا حالىقارالىق ستاندارتتار مەن زاماناۋي تالاپتاردى ەسكەرە وتىرىپ, مەديتسينالىق ينفراقۇرىلىمدى جۇيەلى جاڭارتۋ جۇمىسى جۇرگىزىلىپ جاتىر. وتكەن جىلى 4 العاشقى مەديتسينالىق-سانيتارلىق كومەك ورتالىعى مەن 1 ەمحانا پايدالانۋعا بەرىلدى. سونىمەن قاتار تاعى 32 نىساندى سالۋ, قايتا جاڭعىرتۋ جوبالارى ازىرلەنىپ جاتىر», دەدى قالا اكىمى دارحان ساتىبالدى.
شاھارداعى يگى وزگەرىستەر مۇنىمەن شەكتەلمەيدى. بۇگىندە الماتىنىڭ «التاي» شاعىن اۋدانىندا بۇرىنعى ەسكى عيماراتتىڭ ورنىنا, ءبىر اۋىسىمدا 500 ادامدى قابىلداۋعا قاۋقارلى جاڭا ەمحانانىڭ قۇرىلىسى قىزۋ ءجۇرىپ جاتىر.
جاڭا نىسان ۋلترادىبىستىق زەرتتەۋ اپپاراتتارى, تسيفرلىق فليۋوروگرافيا, مامموگرافيا, رەنتگەن, مرت, كت سىندى وزىق دياگنوستيكالىق جۇيەلەرمەن تولىق جابدىقتالادى. بۇل مەديتسينالىق تەكسەرۋلەردىڭ جىلدامدىعى مەن دالدىگىن ارتتىرىپ, العاشقى سانيتارلىق كومەكتىڭ بىرىڭعاي ستاندارتى اياسىندا ساپالى قىزمەت كورسەتۋگە مۇمكىندىك بەرەدى. قۇرىلىس جۇمىستارىن بيىلعى ءتورتىنشى توقسانىندا اياقتاۋ جوسپارلانىپ وتىر.
الماتى