23 قاڭتارداعى ساۋدا سەسسياسىنىڭ اشىلۋىندا التىننىڭ قۇنى 4 954 دوللارعا دەيىن جەتىپ, تاريحتاعى ەڭ جوعارى كورسەتكىشتى جاڭارتتى, دەپ حابارلايدى Egemen.kz.
دونالد ترامپتىڭ ەۋروپالىق وداقتاستارعا قاتىستى يمپورتتىق باج سالىعىن ەنگىزبەۋ تۋرالى مالىمدەمەسىنە قاراماستان, باعالى مەتالدىڭ قارقىنى باسىلار ەمەس. ساراپشىلاردىڭ پايىمىنشا, بۇل شەشىم گرەنلاندياعا قاتىستى رامالىق كەلىسىممەن بايلانىستى. اتالعان كەلىسىمنىڭ ەگجەي-تەگجەيى ءالى تولىق جاريالانعان جوق. دانيا بيلىگى ارالدىڭ ەگەمەندىگى ماسەلەسى تالقىلانباعانىن مالىمدەدى.
التىنمەن قاتار كۇمىس (96,5 دوللار) پەن پلاتينا (2 601 دوللار) دا ءوز رەكوردتارىن جاڭارتتى.
ۇلتتىق بانكتىڭ 22 قاڭتارداعى رەسمي دەرەكتەرىنە سايكەس, قازاقستاندا 1 گرامم التىننىڭ باعاسى 79 185,42 تەڭگەنى قۇرايدى. 9 قاڭتاردان بەرى التىننىڭ 1 گراممى شامامەن 6 700 تەڭگەگە قىمباتتاعان.
ەلىمىزدە التىننىڭ باعاسى قىمباتتادى
2025 جىلدىڭ III توقسانىنىڭ قورىتىندىسى بويىنشا ۇلتتىق بانك ەكىنشى دەڭگەيلى بانكتەر مەن جەكەلەگەن بانكتىك ەمەس ايىرباستاۋ پۋنكتتەرىنە جالپى سالماعى 438,4 كەلىنى قۇرايتىن 8 302 ولشەمدى التىن قۇيماسىن ساتتى. ساتۋ كولەمىنىڭ باسىم بولىگى الماتىعا (71%), استاناعا (7%) جانە قاراعاندى وبلىسىنا (6%) تيەسىلى. حالىق اراسىندا ەڭ كوپ سۇرانىسقا يە قۇيما – 10 گراممدىق التىن, ونىڭ ۇلەسى جالپى ساتىلىمنىڭ 26%-ىن قۇرايدى.
ۇلتتىق بانكتىڭ مالىمەتىنشە, التىن قۇيمالارى – ينۆەستيتسيالاۋدىڭ سەنىمدى قۇرالى.
Goldman Sachs پەن J.P. Morgan سەكىلدى الەمدىك قارجى الپاۋىتتارى التىننىڭ باعاسى 2026 جىلدىڭ سوڭىنا قاراي ۋنتسياسىنا 5000 – 5400 دوللارعا دەيىن جەتەدى دەپ بولجاپ وتىر.
بۇگىنگى تەڭگە باعامى قانداي؟