اپەننين تۇبەگىندە اسىعىمىز الشىسىنان تۇسە مە؟

تاۋەلسىز مەملەكەت ءارى دەربەس كوماندا رەتىندە ەلىمىز تۇڭعىش رەت 1994 جىلى نورۆەگيانىڭ ليللەحاممەر قالاسىندا الاۋى تۇتانعان حVII قىسقى وليمپيا ويىندارىندا بوي كورسەتتى. اشىلۋ راسىمىندە مەملەكەتتىك تۋىمىزدى شاڭعىمەن ترامپليننەن سەكىرۋشى قايرات بيەكەنوۆ ۇستادى. جارىس جولىنا 28 جەرلەسىمىز شىقتى. بۇل دودادا بىزگە ءۇش جۇلدە بۇيىردى. ۇشەۋىن دە داڭقتى شاڭعىشى ۆلاديمير سميرنوۆ جەڭىپ الدى. ول 10 شاقىرىمدىق كلاسسيكالىق ءادىس پەن 15 شاقىرىمدىق ەركىن ادىسپەن جۇرۋدە كۇمىس مەدالدى يەلەندى. جارىستىڭ سوڭعى كۇنى 50 شاقىرىمدىق ماسس-ستارتتا وتانداسىمىزعا تەڭ كەلەر ەشكىم تابىلمادى. ءسويتىپ, سميرنوۆتىڭ ەسىمى تاۋەلسىز ەلىمىز تاريحىنداعى تۇڭعىش وليمپيادا چەمپيونى رەتىندە سپورتتىق شەجىرەگە التىن ارىپتەرمەن جازىلدى.

سكانديناۆيا تۇبەگىندە جا­لاۋى جەلبىرەگەن جارىستا ۆلاديمير سميرنوۆتىڭ وسى ءۇش جۇلدەسىنىڭ ارقاسىندا ەلىمىزدىڭ قۇراماسى جالپى كوماندالىق ەسەپتە 12-ورىنعا تابان تىرەدى. ليللەحاممەردەگى دودادا ەڭ ۇزدىك ناتيجەگە رەسەي (11 التىن+8 كۇمىس+4 قولا) قول جەتكىزدى. ەكىنشى, ءۇشىنشى ورىنداردا – گەرمانيا (10+11+5) مەن نورۆەگيا (9+7+8). وزىق بەستىكتى يتاليا (7+5+8) مەن اقش (6+5+2) تۇيىندەدى.

1998 جىلعى وليمپيادانى جاپونيانىڭ ناگانوسى قابىل­دادى. شىنى كەرەك, وسى ساپار بارىسىندا بىزدە ۇمىتتەن گورى كۇدىك باسىم ەدى. سەبەبى ول كەزدە ۇزاق جىل بويى قىسقى سپورتىمىزدى جالعىز ءوزى ورگە سۇيرەگەن ۆلاديمير سميرنوۆ شاۋ تارتىپ قالعان ەدى. ول اسا ءىرى حالىقارالىق تۋرنيرلەردە جۇلدەلi ورىنعا بiردە iلiگiپ, بiردە iلiكپەي ءجۇردi. بۇل جاعداي جانكۇيەرلەردى قاتتى الاڭداتتى. العاشقى كۇندەرi سول قاۋiپتiڭ شىندىققا اينالىپ بارا جاتقانىن اڭعارعانداي بولدىق. ايگiلi شاڭعىشى 30 شاقىرىمدىق قاشىقتىقتى ون ەكىنشى بولىپ اياقتادى. 10 شاقىرىمعا جۇگiرگەندە ءتورتiنشi ورىننان اسا المادى. الايدا ۆ.سميرنوۆتىڭ سول قاشىقتىقتاعى كورسەتكiشi وعان گۋندەرسون تاسiلiمەن 15 شاقىرىمدىق جارىستا جۇلدەلi ورىنعا تالاسۋعا مۇمكiندiك بەردi. سول مۇمكiندiگiن ۇتىمدى پايدالانعان جەرلەسiمiز مارەگە ءۇشiنشi بولىپ جەتتi. ارداگەر سپورتشى ءوزiنiڭ سوڭعى وليمپياداسىندا حالقىنا قولا مەدالدى تارتۋ ەتتi. كوپ ۇزاماي كونكيشi ليۋدميلا پروكاشەۆا ءوز جانكۇيەرلەرىن قۋانتتى. ول 5000 مەتر قاشىقتىقتا ءۇشiنشi ناتيجە كورسەتتi.

جاپونيادا ەلىندە قوس قولانى قورجىنعا سالعان جەرلەستەرىمىز جالپى كوماندالىق سايىستى 21-ورىنمەن قورىتىندىلادى. نا­گانودا گەرمانياعا (12+9+8) تەڭ كەلەر ەل تابىلمادى. نورۆەگيا (10+10+5) مەن رەسەي (9+6+3) نەمىستەرگە اجەپتاۋىر قارسىلىق كورسەتتى. ودان كەيىنگى ساتىلارعا كورشىلەس قوس مەملەكەت – كانادا (6+5+4) مەن اقش (6+3+4) جايعاستى.

2002 جىلى اقش-تىڭ سولت-لەيك-سيتي قالاسىندا ۇزدىك بەستىكتى نورۆەگيا (13+5+7), گەرمانيا (12+16+8), اقش (10+13+11), كانادا (7+3+7), رەسەي (5+4+4) قۇرادى. 2006 جىلى يتاليانىڭ تۋرين قالاسىندا گەرمانيا (11+12+6), اقش (9+9+7), اۋستريا (9+7+7), رەسەي (8+6+8), كانادانىڭ (7+10+7) قارقىنى كۇشتى بولدى. بۇل جارىستاردا باعى جانباعان ەلىمىز­دىڭ سپورتشىلارى ەلگە قۇرالاقان ورالدى.

2010 جىلى اق وليمپيادانىڭ الاۋى كانادانىڭ ۆانكۋۆەر قالاسىندا تۇتاندى. باق سىناعان 37 سپورتشىمىزدىڭ اراسىنان ەلەنا حرۋستالەۆا سۋىرىلىپ شىقتى. بياتلونشى قىز 15 شاقىرىمدىق جەكە سايىستا كۇمىس مە­دال­دى يەلەندى. نا­تي­جەسىندە, جال­پى ەسەپتە 25-ورىندى قاناعات تۇتتىق. ۇيەڭكى جا­پىراقتار ەلىندە جارىس قوجايىندارى دەس بەرمەدى. ولار 14 التىن, 7 كۇمىس, 5 قولانى ولجالادى. ودان كەيىنگى ورىنداردى گەرمانيا (10+13+7), اقش (9+5+13), نورۆەگيا (9+8+6), وڭتۇستىك كورەيا (6+6+2) ەنشىلەدى.

2014 جىلى سوچيدە ۇيىم­داس­تىرىلعان وليمپيادا ەڭ داۋلى ويىن­دار رەتىندە تاريح­تا قالدى. وسى جارىستا جەڭىس تۇعىرىنا كوتەرىلگەن سپورت­شى­لاردىڭ ءبىرازى دوپينگ قول­دانعان ەكەن. ۋاقىت وزا بارلىق ءمان-جاي انىقتالعاننان كەيىن ولار اتاقتارىنان ايىرى­لىپ قانا قويماي, ابىرويدان دا جۇرداي بولدى. ناتيجەسىندە, مىنا كوماندالار وزدى: نورۆەگيا (11+6+9), رەسەي (10+10+9), كانادا (10+10+5), اقش (9+9+10), نيدەرلاند (8+7+9). وتانداستارىمىزدىڭ اراسىنان مانەرلەپ سىرعاناۋشى دەنيس تەن عانا جۇلدەلى ورىندى يەلەندى. جاپونيالىق يۋدزۋرۋ حانيۋ مەن كانادالىق پاتريك چاننان قالىپ قويعان ول قولا مەدالدى موينىندا جارقىراتتى.

2018 جىلعى وليمپيا ويىن­دارىنىڭ الاۋى وڭتۇستىك كورەيانىڭ پحيونچحان قالاسىندا تۇتاندى. بۇل جارىستا فريستايل-موگۋلدىڭ حاس شەبەرى يۋليا گالىشەۆا قولاعا قول سوزدى. جالپى ەسەپتە نورۆەگيا (14+14+11), گەرمانيا (14+10+7), كانا­دا (11+8+10), اقش (9+8+6), نيدەر­­لاندتىڭ (8+6+6) كورسەت­كىشتەرى جوعارى بولدى.

سوڭعى وليمپيادانىڭ الاۋى وسىدان ءتورت جىل بۇرىن, ياعني 2022 جىلى بەيجىڭدە تۇتاندى. قىتاي استاناسىندا 91 مەملەكەتتەن كەلگەن 2 871 سپورتشى باق سىنادى. ولار 109 جۇلدە جيىنتىعىن ساراپقا سالدى. جالپى ەسەپتە نورۆەگيانىڭ (16+8+13) ەكپىنىنە ەشكىم شىدامادى. ەكىنشى, ءۇشىنشى ورىنداردا – گەرمانيا (12+10+5) مەن اقش (9+9+7). ءتورتىنشى, بەسىنشى ساتىعا قىتاي (9+4+2) مەن شۆەتسيا (8+5+5) جايعاستى. وكىنىشكە قاراي, قىتاي ەلىندە ءبىزدىڭ قۇراماعا بىردە-ءبىر جۇلدە بۇيىرمادى. مىنە, قىسقاشا قايىرساق جەرلەستەرىمىزدىڭ قاتى­سۋىمەن وتكەن قىسقى وليمپيا ويىندارىنىڭ تاريحى وسىنداي.