اتىراۋدا جوعالعان وتباسى مۇشەلەرىنىڭ تەلەفونى سوڭعى رەت شىمكەنتتەن سيگنال بەرگەن

ءوڭىردىڭ باس پوليتسەيى وڭال بەكيەۆ جەدەل كەڭەس وتكىزىپ, وندا تەرگەۋ بارىسى مەن قۇقىق قورعاۋ ورگاندارىنىڭ الداعى ارەكەتتەرى تالقىلاندى.

«كەڭەس بارىسىندا جۇرگىزىلىپ جاتقان جەدەل-ىزدەستىرۋ شارالارىنىڭ ناتيجەلەرى تىڭدالىپ, تەرگەۋدىڭ نەگىزگى باعىتتارى ايقىندالدى. دەپارتامەنت باسشىسى قىلمىستىق ءىستى قاتاڭ زاڭ تالاپتارىنا ساي, جان-جاقتى ءارى وبەكتيۆتى تەرگەۋدى قامتاماسىز ەتۋدى, كەلىپ تۇسەتىن ءاربىر جەدەل اقپاراتتى مۇقيات جانە ۋاقتىلى تەكسەرۋ قاجەتتىگىن اتاپ ءوتتى», دەلىنگەن پوليتسيانىڭ ءباسپاسوز قىزمەتى تاراتقان حابارلامادا.

قازىرگى ۋاقىتتا قىلمىستىق ءىس اتىراۋ وبلىسى پوليتسيا دەپارتامەنتىنىڭ ەرەكشە باقىلاۋىندا. جەدەل-ىزدەستىرۋ جانە تەرگەۋ شارالارى تاۋلىك بويى جۇرگىزىلىپ جاتىر.

ەسكە سالا كەتەيىك, ءبىر ايدان استام ۋاقىت بۇرىن ءوڭىردىڭ ءتورت تۇرعىنى حابار-وشارسىز كەتكەن. 25 جەلتوقساندا اتىراۋ قالاسىنىڭ تۇرعىنى پوليتسياعا جۇگىنىپ, اعاسىنىڭ وتباسىمەن بىرگە ۇزاق ۋاقىت بويى بايلانىسقا شىقپاعانىن حابارلاعان. ولار قاراشا ايىندا ۇيلەرىنەن شىعىپ كەتىپ, ءالى كۇنگە دەيىن ورالماعان. قازىرگى تاڭدا قازا بولعان ەرلى-زايىپتىنىڭ 33 جانە 35 جاستاعى قىزى مەن كۇيەۋ بالاسىنا ىزدەۋ جاريالانعان.

جوعالعانداردىڭ ۇيالى تەلەفوندارى قازاقستان اۋماعىندا قوسىلىپ-ءوشىرىلىپ وتىرعان, سوڭعى رەت شىمكەنت قالاسىندا تىركەلگەن.

ىزدەۋدە جۇرگەن كۇيەۋ بالا سۇلتان سارسەماليەۆ تۋرالى اقپارات باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ ورگاندارىنىڭ پورتالىندا جاريالانعان. ىزدەۋ ءىسى 2026 جىلعى 8 قاڭتاردا تىركەلگەن.

قازا تاپقانداردىڭ تۋىستارى 66 جاستاعى ماقسوت مۇقانعاليەۆ پەن ونىڭ جۇبايى قايتىس بولعاننان كەيىن دە داۋىس حابارلامالارىن العاندارىن ايتقان. جاقىندارىنىڭ سوزىنشە, حابارلامالار كەلىنىنىڭ تەلەفونىنان جىبەرىلگەن, الايدا بولجام بويىنشا, ول كەزدە ايەلدىڭ ءوزى دە قازا تاپقان, ال بەلگىسىز بىرەۋ بۇرىن جازىلىپ الىنعان اۋديوحابارلامالاردى جىبەرگەن بولۋى مۇمكىن.

2026 جىلعى 17 قاڭتاردا وبلىستىق توتەنشە جاعداي دەپارتامەنتى 32 جاستاعى ناۋرىز مۇقانعالي مەن 35 جاستاعى مەيرامگۇل قارابالينانى رەسمي تۇردە ىزدەۋ توقتاتىلعانىن حابارلادى.