قورقىت اتا اتىنداعى قىزىلوردا ۋنيۆەرسيتەتى جاساندى ينتەللەكت ينستيتۋتىنىڭ 2-كۋرس ستۋدەنتتەرى نۇربول وڭالبەكوۆ پەن نۇربەك ابىلداەۆ جۋىردا قاۋىپتى سايتتار مەن سىلتەمەلەردى انىقتايتىن باعدارلاما ازىرلەدى. ولاردىڭ ايتۋىنشا, «PhishGuard AI» – تسيفرلىق الاياقتىققا قارسى جۇمىس ىستەيتىن ينتەللەكتۋالدى قورعانىس جۇيەسى.
بۇعان دەيىن دە توپ بولىپ ەرەكشە بالالاردى قاشىقتان وقىتۋ باعدارلاماسىن جاساعان جاستار جاڭا باعدارلاما ارقىلى الاياقتىقتىڭ الدىن كەسكىسى كەلەدى.
«وسىعان دەيىن جاساعان جوبامىز ۋنيۆەرسيتەتتە ۇيىمداستىرىلعان سايىستا ءبىرىنشى ورىن العان. ال نۇربەك ەكەۋمىز جاساعان مىنا پلاتفورما ۆەب-رەسۋرستار مەن تولەم بەتتەرىن تالداپ, جالعان سايتتاردى, كۇماندى دەرەكتەر ەنگىزۋ فورمالارىن جانە الەۋمەتتىك ينجەنەريا بەلگىلەرىن انىقتايدى. كوپدەڭگەيلى تالداۋ نەگىزىندە تاۋەكەل دەڭگەيى ەسەپتەلىپ, قورىتىندى جاسالادى. جوبا تسيفرلىق قارجىلىق وپەراتسيالار مەن ءوزارا ونلاين ارەكەتتەسۋدىڭ قاۋىپسىزدىگىن ارتتىرۋعا باعىتتالعان», دەيدى نۇربول وڭالبەكوۆ.
جوبانى كادىمگى نوۋتبۋكپەن وبلىستىق جاستار ورتالىعىندا ازىرلەگەن. ونىڭ بارىسىندا مەنتورلارى المات قۋانىشباەۆ كوپ كەڭەس بەرىپ, جول سىلتەپتى. وسىلايشا, اي ىشىندە دايىندالعان ينتەللەكتۋالدى قورعانىس جۇيەسىنىڭ اۆتورلارى جۋىردا «InnoFest Qyzylorda» يننوۆاتسيالىق جوبالار فەستيۆالىندە 2-ورىنعا يە بولدى.
جوبا اۆتورلارى براۋزەرلىك كوسىمشا سايتتىڭ قاۋىپتى ەكەنىن انىقتاسا, دەرەۋ جاۋىپ تاستايتىنىن ايتادى. وسىدان كەيىن قولدانۋشى ول سايتقا كىرە المايدى. قازىر «سىيلىعىڭدى الىپ كەت» دەگەن مازمۇنداعى سىلتەمەنىڭ سوڭىندا قاجەتتى اقپارات تولتىرۋ, قارجى جىبەرۋدى سۇرايتىندار جيىلەگەن. ونداي سايتتاردى وسى قوسىمشانىڭ كومەگىمەن تەكسەرۋگە بولادى.
قازىر جاستار جوبانى جەتىلدىرۋ ۇستىندە. جاڭالىقتى قۇلاعى شالعاندار سۇرانىس بەرىپ تە ۇلگەرىپتى. الدا باعدارلاما بىرنەشە سىناقتان وتكەن سوڭ العاشقىلار قاتارىندا وبلىستىق پوليتسيا دەپارتامەنتى قولدانىپ كورمەك.
قىزىلوردا