شىمكەنت قالاسىنىڭ اكىمى عابيت سىزدىقبەكوۆ 2025 جىلدى قورىتىندىلاعان بريفينگتە ءجۋرناليستىڭ كوممۋنالدىق ماسەلە توڭىرەگىندە قويعان ساۋالىنا كەلەشەكتە بۇل قىزمەت فرانتسۋزدىق كومپانياعا سەنىمگەرلىك باسقارۋعا بەرىلەتىنىن ايتقان, دەپ حابارلايدى Egemen.kz.
جۋىردا اكىم ورىنباسارى بەرىك بەركىمباەۆ كوممۋنالدىق جانە ينجەنەرلىك ينفراقۇرىلىمدى باسقارۋ سالاسىنداعى فرانتسۋزدىق «Veolia» كومپانياسىنىڭ وكىلدەرىمەن كەزدەستى. باسقوسۋدا تاراپتار زاماناۋي تەحنولوگيالار ەنگىزۋ, كوممۋنالدىق قىزمەتتەر ساپاسىن جاقسارتۋ, قالالىق ينفراقۇرىلىمدى جاڭارتۋعا بايلانىستى ينۆەستيتسيالىق جوبالاردى بىرلەسىپ جۇزەگە اسىرۋ ماسەلەسىن تالقىلادى.
كەزدەسۋ سوڭىندا «Veolia», شىمكەنت قالاسىنىڭ اكىمدىگى, «قازاقستاندىق تۇرعىن ءۇي-كوممۋنالدى شارۋاشىلىقتى جاڭعىرتۋ جانە دامىتۋ ورتالىعى» اق اراسىندا ءوزارا تۇسىنىستىك تۋرالى مەموراندۋمعا قول قويىلدى. كەلىسىم جىلۋمەن قامتۋ, سۋمەن جابدىقتاۋ, سۋ بۇرۋ جۇيەلەرىن ءتيىمدى باسقارۋ مەن جاڭارتۋ ماقساتتارىن كوزدەيدى.
بىرلەسكەن جوبا ناتيجەسىندە قالا ينفراقۇرىلىمى, ەنەرگيا ۇنەمدەيتىن تەحنولوگيالار جاقسارادى, مەگاپوليستىڭ تۇراقتى دامۋىنا جاعداي جاسالادى دەگەن بولجام بار.
جالپى «Veolia» كومپانياسىنىڭ شتاب-پاتەرى پاريج قالاسىندا ورنالاسقان. ەۋروپا, ازيا مەملەكەتتەرىندە, اقش-تا جوبالاردى جۇزەگە اسىرادى. ەكولوگيالىق زاماناۋي تەحنولوگيالار قولدانا وتىرىپ, كوممۋنالدىق, ونەركاسىپتىك نىساندارعا قىزمەت كورسەتەدى.
ەگەر شىنىمەن دە كوممۋنالدىق قىزمەت فرانتسۋزدىق كومپانيانىڭ سەنىمگەرلىك باسقارۋىنا وتسە, بيۋدجەتكە قاراستى «قۋاتجىلۋورتالىق» مەكەمەسى مەن سۋمەن جابدىقتاۋ سالاسىنداعى باسقارۋشى كومپانيا اۋىسۋى مۇمكىن. بۇل جەردە اڭگىمە «سۋ رەسۋرستارى - ماركەتينگ» جشس توڭىرەگىندە بولىپ وتىر. اتالعان كومپانيانىڭ سۋمەن جابدىقتاۋ قىزمەتىن مەملەكەتكە كەرى قايتارۋ ءۇشىن قالالىق اكىمدىك ءالى كۇنگە شەيىن سوتتاسىپ كەلەدى.