بىلتىر جەدەل مەديتسينالىق جاردەم بريگادالارى ۇزىن-سانى 7 467 926 شاقىرتۋعا بارىپ, تۇرعىندارعا ءتيىستى قومەك كورسەتكەن. شامامەن 1 375 401 شاقىرتۋعا ەمحانالاردىڭ جانىنداعى ءموبيلدى بريگادالار جۇمىلسا, باسقاسىنا جەدەل مەديتسينالىق جاردەم قىزمەتى جەتكەن.
شاقىرتۋلار استانا, الماتى قالاسىندا, تۇركىستان وبلىسىندا ءجيى تىركەلگەن. جان ساقتاۋ كورسەتكىشى 8,2%-عا ءوسىپ, 60,3%-دى قۇراعان. شۇعىل سانات بويىنشا جەدەل مەديتسينالىق جاردەم بريگاداسىن شاقىرتۋدىڭ ورتاشا ۋاقىتى – 1,7 مينۋت, جەدەلدىكتىڭ ءبىرىنشى ساناتى بويىنشا جەتۋدىڭ ورتاشا ۋاقىتى 8,8 مينۋتتى قۇرايدى. شاقىرۋلاردىڭ باسىم ۇلەسى تىنىس الۋ اعزالارىنىڭ اۋرۋلارىنا تيەسىلى. جەدەل جاردەم ءدال وسىنداي سەبەپپەن 1 778 189 مەكەنجايعا بارعان. بۇل پايىزعا شاققاندا جالپى شاقىرۋدىڭ 23,8%-ى. سول سەكىلدى جۇرەك-قان تامىرلارى اۋرۋلارى سەبەبىمەن – 1 434 483 (19,2%), باسقا اۋرۋلار – 1 249 223 (16,7%), جاراقاتتار, ۋلانۋ, جازاتايىم وقيعالار – 735 183 (9,8%), سونىڭ ىشىندە جول-كولىك وقيعالارى – 40 972, نەۆرولوگيالىق اۋرۋلار – 714 915 (9,6%).
وتكەن جىلى جول-كولىك وقيعالارى سالدارىنان 52 097 ادام زارداپ شەكسە, ونىڭ 64,3%-ى ستاتسيونارلارعا جەتكىزىلگەن. قازا تاپقانداردىڭ ۇلەسى زارداپ شەككەندەر سانىنىڭ 2,4%-ىن قۇرادى. جول-كولىك وقيعاسى كەزىندە جەتۋدىڭ ورتاشا ۋاقىتى – 8 مينۋت. وسىعان قوسا, جەدەل جاردەم قىزمەتى ءجىتى ميوكارد ينفاركتىسى جونىندە 27 378 شاقىرتۋعا, ينسۋلتكە قاتىستى 52 207 شاقىرتۋعا قىزمەت كورسەتىپتى.
بۇگىندە ەلىمىز كولەمىندە ءبىر اۋىسىمدا 1 618 كوشپەلى بريگادا, ونىڭ ىشىندە 258 مامانداندىرىلعان دارىگەرلىك, 1 360 فەلدشەرلىك توپ جۇمىس ىستەيدى. جەدەل مەديتسينالىق جاردەم قىزمەتىنىڭ كادرلارمەن قامتىلۋى 86,8%-دى قۇرايدى. ونىڭ ىشىندە دارىگەرلەرمەن قامتىلۋى – 74,8%, ورتا مەديتسينا قىزمەتكەرلەرىمەن قامتىلۋى – 88,1%.